Read Makhuwa-Shirima Matheyo 28 Bible Online

Matheyo 28 - Makhuwa-Shirima bible

Matheyo 28

¹Niviraka nihuku na eSaabadu, nittaandaka nihuku noopacera na esimana, Mariya oMagadalene ni Mariya mukina yaarowa woona nihiye.

²Vano waakhala otetereiya otokotoko, ni ndyelo a Apwiya aakhuruwa wiirimu ni aphiyaka vanihiyeni, aapirikixa nluku naawaleliwe ni aakilaathi vasuluwaya.

³Ekhalelowaawe yaari ntoko overinya ni ikuwosawe saari sootteela ntoko etthapwe.

⁴Anamalipelela yaathukumela ni woova ni yaahookhwa maririmela.

⁵Ndyelo aaweerela asithiyana: “Muhoove! Koosuwela weera nyuwo mummwaasa Yeesu okhomeliwe.

⁶Owo khaamomo, oovenyerera ntoko aahimalaawe. Ngwe, moone nipuro waaraaya muttembo.

⁷Murowe woowaakuveya ni mwaaleele oohuseraawe: ‘Owo oovenyerera mookhwaani ni onrowa ohoolowanyu mpaka oGalileiya, weiwo muneeraanyu mwamoone. Vano kohooleelani.”

⁸Hiiho, asithiyana yaavenya mmahiyeni yoovaka nitho ehakalalaka. Yaatthimaka ni yaahaaleela oohusera a Yeesu.

⁹Wootutuxereya Yeesu aahaakumanano asithiyana ni aaweerela: “Salaama!” Awo yaamwaattamela Yoowo, yaamukhubaara nyetto ni yaamulapa.

¹⁰Vano Yeesu aaweerela: “Muhoove. Murowe mwaaleele axunnaka weera erowe mpaka oGalileiya. Weiwo awo eniikoone.”

¹¹Asithiyana ale ereene nlelo mphironi, akina a anamalipelela yaarowa osidade ni yaahaathalihera ahooleli a asaserdoti* sootheene seiye seereiye.

¹²Ethukumanaka ahooleli a asaserdoti* ni asitokweene a muloko, yaavaanela weera yaavahe anakhotto musurukhu mwincipale,

¹³eweerelaka: “Nyuwo ontthuneya weera: ‘Oohuseraawe yaahoowa ohiyu ni yaahiiya muttembo, hiyo nikonaka.’

¹⁴Iiwa guvernadori yeeyo, hiyo ninoomuthalihera ni khamukhalano mulattu.”

¹⁵Hiiho anakhotto yaahaakhela musurukhu ni yaapaka ntoko yaalamuleliwaaya. Mwaha ola waamwaramwaxeya variyari wa aYuda mpaka olelo.

¹⁶Vano oohusera muloko ni mmoha yaarowa oGalileiya mpaka mwaako Yeesu aathoonyenraawe.

¹⁷Emoonaka Yeesu, yaamulapa, mene akina yaahovela.

¹⁸Yeesu aawaattamela yaawo ni aaweerela: “Koovahiwa ikuru sootheene sa wiirimu ni vathi.

¹⁹Tivawo, murowe ni mwaakhalihe oohusera a amalapo ootheene, mwaapatisaka mwa Nsina na Atiithi, na Mwaana ni na Munepa Wootteela,

²⁰mwaaxuttihaka wiiwelela sootheene Miyo koolamulenlaakani. Ni Miyo kinookhala ni nyuwo mahuku ootheene, mpaka ommaleloni wa ehuhu.”