Read Makhuwa-Shirima Matheyo 5 Bible Online

Matheyo 5 - Makhuwa-Shirima bible

Matheyo 5

¹Awoonaka atthu ancipale, Yeesu aawela vamwaakoni, anakilaathi. Oohuseraawe yaamwaattamela,

²ni Owo aapacera waaxuttiha, eeraka:

³“Ooreelihiwa ti yaale ansuwela omuhaawelawaya Muluku, niwoko omwene wa wiirimu ti wawaya.

⁴Ooreelihiwa ti yaale aniinla, niwoko eniimaalihiwe.

⁵Ooreelihiwa ti yaale aniiyeviha, niwoko eniiphwanye elapo ya vathi ntoko yoohiyeriwa*.

⁶Ooreelihiwa ti yaale anghaawelaxa weera yaakhuleliwe ni Muluku, niwoko eniivonihiwe.

⁷Ooreelihiwa ti yaale ammorela ikharari, niwoko eniimoreliwe ikharari.

⁸Ooreelihiwa ti yaale ari ootteela murima, niwoko eniimoone Muluku.

⁹Ooreelihiwa ti yaale ampaka murettele variyari wa atthu, niwoko eniyiitthaniwe anamwane a Muluku.

¹⁰Ooreelihiwa ti yaale ansoondiwa mwaha wa opaka otthuna wa Muluku, niwoko omwene wa wiirimu ti wawaya.

¹¹Ooreelihiwa ti nyuwo akina yooruwanakani, yoosoondakani ni yaawuulumelakani soonanara ni soowootha niwoko na Miyo.

¹²Muhakalale ni musarihiwe ni ohakalala, niwoko ntthuvelonanyu nri ntokotoko wiirimu. Yaahaasoonda mooteene yoowo maprofeeti yaakhala muhinaaye nyuwo.

¹³Nyuwo muri maakha a elapo ya vathi. Maakha yamala osivawaya, mmweelele hai weera esivetho? Khaamvareliwa etthu, ohikhanle ovonyeriwa vaate ni onyikaliwawo ni atthu.

¹⁴Nyuwo muri waara wa elapo ya vathi. Khoongwereya ovitha esidade eri vasulu vamwaako.

¹⁵Navetho khaawo ompattiha onyaari ni anapopheela vathi wa elaata. Ohiyanawaya, oniikaathi vanipuroni na nnene weera waamwaleele ootheene ari mpaani.

¹⁶Hiihotho mwaarihe waarawanyu ohoolo wa atthu, weera yooneke mitekosanyu sooreera ni yaavuwihe Atithinyu ari wiirimu.

¹⁷Muhuupuwele weera kaaweenle omaliha nlamulo, hoye hoye maprofeeti. Nkiweenle omaliha, mene okwanihera seiyo.

¹⁸Kinooleelani ekhaikhai: wiirimu ni vathi onuumale, mene hata yooruma, naari nlepo nimoha na nlamulo na Muluku khanimala mpaka sineeraaya sikwaniheriwe soothesene.

¹⁹Ootheene ahiniiwelela yakhalaru a malamulo ala ni anaaxuttiha akina opaka moota mmoha, eniyiitthaniwe ooyevaxa moomweneni wa wiirimu. Vaheera ootheene aniiwelela ni anxuttiha malamulo ala, eniyiitthaniwe asitokweene moomweneni wa wiirimu.

²⁰Vanonto kinooleelani weera opakawanyu otthuna wa Muluku waahipwahaxa wa aFarisi* ni anamawera a nlamulo*, khoongwereya hata vakhaani weera nyuwo muvolowe omwene wa wiirimu.

²¹Nyuwo mohiiwa yeeyo yaahimmwale ni makholowaanyu: ‘Muhiive; ni yoowo aniive, anaathorihiwe.’

²²Mene Miyo kinooleelani weera khula mutthu anaamunyoonyeriwe munneiye, anaathorihiwe. Nitho, akhalaru mutthu anaamuruwane munneiye, anaaronghiwe wa alipa oowuuluma milattu, ni akhalaru mutthu ommweerela munneiye: ‘naanepa!’ omphwanela orowa omooroni.

²³Tivawo, nyuwo mooniheraka sooveleelasanyu valtaarini*, ni vaavaawo munuupuwelela weera munninyu ookhalano etthu mmurimani ni nyuwo,

²⁴muhiye toko soovahasanyu vaavaawo valtaarini*, ni murowe weera mwiiraane ni munninyu. Vahoolowaya, muhokoleeleke ni moonihereke soovahasanyu.

²⁵Mwiiwanane woowaakuveya ni mwiittanaanyu atthunaka wooronghani wa alipa oowuuluma milattu. Mpake yeeyo nyuwo nlelo murowaka wa yaawo, niwoko wavirikanawo onimooveleelani wa mphuki, ni mphuki onimooveleelani wa mpilixa, ni nyuwo munoovonyeriwa okaliposo.

²⁶Kinoororomelihani weera nyuwo khamurwa mukhumamo muhinaaye oliva soothesene.

²⁷Nyuwo mohiiwa yeeyo yaahimmwale: ‘Muhiraruwe,’

²⁸mene Miyo kinooleelani: akhalaru mutthu oningwehexexa muthiyana amuhaawelaka, ooraruwano mmurimanimwawe.

²⁹Niithonanyu na moono mulopwana nootthekihani, muzoole ni murihele vaate. Fataari oriha mpatta mmoha wa erutthwaanyu, ohikhanle weera erutthwaanyu yootheene eriheliwe omooroni.

³⁰Ntatananyu na moono mulopwana nootthekihani, mukwitule ni murihele vaate. Fataari oriha mpatta mmoha wa erutthwaanyu, ohikhanle weera erutthwaanyu yootheene eriheliwe omooroni.

³¹Yaahimmwa: khula mulopwana anaamwalane ni mwaariye ontthuneya weera amvahe ekaratta ya omwalana.

³²Mene Miyo kinooleelani weera khula mutthu anaamwalane ni mwaariye, ohikhanle mwaha wa oraruwa, onimukhaliha namararuwa. Vano yoowo onimuthela muthiyana omwalanne, onooraruwano.

³³Nyuwo mohiiwatho yeeyo yaahimmwale ni makholowaanyu: ‘Muhihiye soolipelasanyu, mene mukwanihere seiyo nyuwo mulipenlaanyu vamaithoni wa Apwiya.’

³⁴Mene Miyo kinooleelani: muhilipeleru naari etthu — naari ni wiirimu, niwoko ti ehice ya Muluku;

³⁵naari ni elapo ya vathi, niwoko ti yoonyikalelaawe ya inaawosawe; naari ni oYerusaleemu, niwoko ti esidade ya Mwene Mutokweene.

³⁶Muhilipele ni muruwaanyu, niwoko khamungwera oceendya niihi nimoha weera nikhale nootteela, hoye hoye nooriipa.

³⁷Mweera: “aani,” okhaleke “aani” ni mweera: “hoye,” okhaleke “hoye.” Sootheene simvira mwa yeeyo, siri sa mutakhali.

³⁸Nyuwo mohiiwa yeeyo yaahimmwale: ‘Niitho wa niitho, ni niino wa niino.’

³⁹Mene Miyo kinooleelani: muhimwiinlele ikukuttula mutakhali. Yoowo anoomaneeni nrama na moono mulopwana, mmwinnyereretho nrama nikina.

⁴⁰Akhala mukina anoorongheni wa alipa oowuuluma milattu weera ooruleeni mukaandyo, mumvahetho ekuwaanyu.

⁴¹Mukina anoonyesereriheni weetta ni yoowo vakhiviru, mweetteno ottaiwene.

⁴²Mumvahe yoowo onoovekelani, ni muhimwiimane yoowo onoovekelani wooliha etthu.

⁴³Nyuwo mohiiwa yeeyo yaahimmwale: ‘Munsivele mukhwiinyu, ni munthanye mwiittanaanyu.’

⁴⁴Mene Miyo kinooleelani: mwaasivele amwiittanaanyu, ni mwaavekelele yaawo anoosoondani,

⁴⁵weera nyuwo mukhale anamwane a Atithinyu ari wiirimu. Vano, Yaawo anaariha nsuwanaya nnaamwaleela oonanara murima ni ooreera murima, ni animwaarupihela epula oororomela ni oohiroromela.

⁴⁶Nyuwo mwaasivela paahi yaale anoosivelani, ntthuvelo heeni muneeraanyu mwaakhele? Anamaliviha a musokotho ampaka yeeyo.

⁴⁷Nyuwo mwawuulumiha paahi axunninyu — mumpaka eheeni yooreera waapwaha akina? Amalapo ampaka hiihaawotho!

⁴⁸Tivawo, mukhale ookwanela, ntoko Atithinyu ari wiirimu.