Read Makhuwa-Shirima Matheyo 7 Bible Online

Matheyo 7 - Makhuwa-Shirima bible

Matheyo 7

¹Muhaathorihe akina weera nyuwo muhithorihiwe.

²Vano, mooteene yoowo munthorihaanyu, nyuwo munoothorihiwa, ni muringo mumvarelaanyu muteko, onoovareliwatho muteko wa nyuwo.

³Niwoko heeni mungwehaanyu ekokhola eri muniithoni na munninyu, mene khamunoona mukhukulu ori muniithonimwanyu?

⁴Mungwera hai omweerela munninyu: ‘mukihiye kivenxeke ekokhola eri muniithonimwanyu,’ nyuwo mureeneno mukhukulu muniithonimwanyu mwaneenaanyu?

⁵Namwiixeera! Muvenxe toko mukhukulu muniithonimwanyu, ni vahoolowaya munimoona nnenesene weera mvenxe ekokhola eri muniithoni mwa munninyu.

⁶Muhaavahe itthu sooreera alapwa, niwoko anoorukunuwa yoolumekeni. Muhivonyere itthu sooreera ikhumba, niwoko sinoonyikalasa.

⁷Muvekele, ni mmwivahiwe. Mwaasaase, ni mmwiphanye. Mmane nsele, ni mmwihuleliwe.

⁸Vano, ootheene amvekela, animwaakhela; ootheene anaasa, anoophwanya; ni wa yoole ommana nsele, anaahuleliwe.

⁹Taani a nyuwo, mwaninyu avekela yooca, onoomvaha nluku?

¹⁰Hoye hoye, avekela ehopa, onoomvaha enowa?

¹¹Wakhala weera nyuwo mureene anamattheka moosuwela waavaha itthu sooreera anamwanaanyu, wootepaxa Atithinyu ari wiirimu eniyaavahe itthu sooreera yaawo anaavekela!

¹²Mwa soothesene, mwaapakele akina yeeyo muntthunaanyu weera yoopakeeni. Vano, ela ti ekwanihero ya malamulo ni maprofeeti.

¹³Muvolowe mulako woophureya, niwoko mulako woothanuwa ni ephiro yoothanuwa enrowa omooroni, ni ancipale ti yaawo amvolowa mwa yoowo.

¹⁴Mulakotho woophureya ni ephiro yoophureya enrowa wa okumi! Yaawo amphwanya, ari vakhaani.

¹⁵Mwiipasoope ni maprofeeti oolokottha. Awo angwa wa nyuwo ewanreene ixapala sa ikhondoolo, mene mpuwa ari miici soolumaxa.

¹⁶Nyuwo mmwaasuwele ni soowiimasaya. Atthu anoowera orukula iwuuva* mwa nyiri sa nyiiwa, hoye hoye ifiigu mwa malaxi?

¹⁷Hiihotho nyiri sooreera sootheene siniima soowiima sooreera, mene nyiri soonanara siniima soowiima soonanara.

¹⁸Mwiri wooreera khooniima soowiima soonanara, naari mwiri woonanara soowiima sooreera.

¹⁹Nyiri sootheene sihiniima soowiima sooreera, sinoothikiliwa, ni sinoovonyeriwa omooroni.

²⁰Hiihaawotho, nyuwo mmwaasuwele yaawo ni soowiimasaya.

²¹Khaahiyono ootheene ankeerela ‘Apwiya, Apwiya!’ eniivolowe moomweneni wa wiirimu, mene paahi yaawo ampaka otthuna wa Atithaka ari wiirimu.

²²Ancipale eniikeerele nihuku nenno: ‘Apwiya, Apwiya, khanilaleiye mwa Nsinananyu? Ni mwa Nsinananyu khanoomonle minepa soonanara, ni khanipanke sootikhiniha sincipale?

²³Vano Miyo nkaaleele nnenesene: “Nkinoosuweleni. Mususe wa Miyo, nyuwo mumpaka sootakhala.”

²⁴Tivawo, yoowo oniiwa maswaaka yaala ni oniiwelela, ori ntoko namiruku otenke empaawe vamwala.

²⁵Yaarupa epula, saasareya nyooloko, yaahoopa epheyo ni ikuru, emanaka empa ele, mene empa ele khayunttungwe, niwoko yaalipihiwa ni mwala.

²⁶Vaheera yoowo oniiwa maswaaka yaala ni ahiiwelela, ori ntoko mutthu oohileeleya otenke empaawe vamuhaavani.

²⁷Yaarupa epula, saasareya nyooloko, yaahoopa epheyo ni ikuru, emanaka empa ele, ni empa ele yaapittuwa, ni emorelowaaya yaari etokotoko.”

²⁸Yeesu amalihaka ohima itthu iye, atthu yaatikhina ni oxuttihawawe,

²⁹niwoko Owo aahaaxuttiha ntoko Mulopwana ookhalano ikuru, ohikhanle ntoko anamawera a nlamulo*.