Read Makhuwa-Shirima Matheyo 8 Bible Online

Matheyo 8 - Makhuwa-Shirima bible

Matheyo 8

¹Aakhuruwalaawe vamwaakoni, atthu ancipale yaamutthara Yoowo.

²Namakokho mmoha aamwaattamela Yoowo, anamukokhorela amweerelaka: “Apwiya, mwatthuna, munoowera okilamiha!”

³Yeesu aahookola moono ni aamutava, eeraka: “Kinootthuna. Mulamihiwe!” Woowaakuveya aalamihiwa makokhwaawe.

⁴Vahoolowaya Yeesu aamweerela: “Mwiiwe, muhaaleele iya akina, mene mwiixoonihere wa musaserdoti* ni mvahe sooveleela aaruminghaawe Moisesi, weera iyo sikhale onamoona wa yaawo.”

⁵Yeesu avolowaka oKafarnawu, aarowa wa Yoowo kenturiyoni* mmoha avekelaka ekhavihero,

⁶amweerelaka: “Apwiya murimeiyaaka ori owaani ahiweraka weetta ni moohaawaxani otokotoko.”

⁷Yeesu aamweerela: “Miyo nkirowe omulamiha.”

⁸Aamwaakhula kenturiyoni*: “Apwiya, nkiphwanenle owaakhelelani owannyaka. Muulumetho nsu nimoha paahi, ni murumeiyaaka anaalamihiwe.

⁹Vano, miyo kookhalano asitokweenaaka kimphwanelaaka owiiwelela. Ni kookhalanotho anakhotto ankiiwelela miyo. Kimmweerela mukina: ‘Orowe!’ ni onoorowa; ni wa mukina: ‘Owe!’ ni onimoowa. Kimmweerela murumeiyaaka: ‘Opake ela!’ ni onoopaka.”

¹⁰Woowiiwa seiyo, Yeesu aatikhina, ni aaweerela yaamutthara: “Kinooleelani ekhaikhai: nkimphwannye oYixrayeli mutthu orino nroromelo hiihaawo.

¹¹Miyo kinooleelani weera animoowa atthu ancipale ninkhuma nsuwa ni ninkela nsuwa, ni anookilaathi vameesa vamoha ni Abrahaamu, Isaaki ni Yakobe moomweneni wa wiirimu.

¹²Yaawotho oororomelihiwa yeera yaakhele omwene, eniivonyeriwe vaate, mpiphini, weiwo onuukhale wiinla ni okhuuriha maino.”

¹³Yeesu aamweerela kenturiyoni*: “Murowe! Eniyeereiye hiiho ntoko muntthunaanyu.” Ehuhuweene yeele, murumeiyi ole aalamihiwa.

¹⁴Yeesu avolowaka empa ya Pedru, aahaaphwanya apwiyamwaanaawe Pedru ereene vabeettini, evoreiwaka oviha wa erutthu.

¹⁵Aavaraka Yeesu ni ntatanaya, eretta ele yaamaala. Awo yaavenya ni yaapacera omurumeela Yeesu.

¹⁶Wiilalaaya, aawiiheriwa Yoowo atthu ancipale yaarino minepa soonanara, ni Owo aahoomola minepa iye ni nsu nimoha, nitho aahaalamiha aretta ootheene.

¹⁷Ti hiiho yaakwaniheriwaaya yeeyo yaahimmwale ni mprofeeti Yesaya: “Owo aakuxa irettasahu ni aathatela ikwereresahu.”

¹⁸Yeesu awoonaka atthu ancipale emurukurenreene, aahaalamulela weera elapuwele okhopela wa ephareiya.

¹⁹Vano namawera a nlamulo* mmoha aamwaattamela Yoowo, eeraka: “Muhusiha, miyo kinimoottharani weiwo muneeraanyu murowe.”

²⁰Yeesu aamwaakhula: “Akhwatte aakhalano mapuro ankonaayamo, ni ipalame sa wiirimu sookhalano ipuurusaya, mene Mwaana a mutthu khakhalanne nipuro noowiitthuuwiha muru.”

²¹Oohusera mukina aamweerela: “Apwiya, mukihiye toko kaavithe atithaka.”

²²Vano Yeesu aamweerela: “Mukitthare, ni muhiye mittembo sivithe mittembosaya.”

²³Yeesu aavolowa munikulani, ni oohuseraawe yaamutthara.

²⁴Wootutuxereya, yaapacera ettheku etokotoko mphareiyani, moota wooweera mitekuteku saapacera okhuneela nikula. Wa soothesene, Yeesu eera akonaka.

²⁵Oohusera yaarowa omvenxa, ekhuwelaka: “Apwiya, munivuluxe! Nnooriheya!”

²⁶Yeesu aahaakoha: “Heeni munoovaanyu vancipale, atthu a nroromelo vakhaani?” Vano aavenya, anahiiha epheyo ni ephareiya, ni yaamaaleleya vancipale.

²⁷Axilopwana yaatikhinaxa ni yaakohana: “Taani Ola? Mpaka epheyo ni ephareiya omwiiwelela!”

²⁸Aphiyaka okhopela wa elapo ya oGadarene, atthu eeli yaarino minepa soonanara, ewaaka omahiyeni, yaarowa okumana ni Yoowo. Awo yaari oonanara moota wooweera khaawo aawera ovira ephiro ele.

²⁹Vano awo yaakhuwela: “Mwaana a Muluku, muntthuna eheeni ni hiyo? Mwaaweenle va onihooxa ehinaaye ophiya ehuhuwaahu?”

³⁰Vakhiviru ni vale aakukhuliwa nakupa a ikhumba sincipale.

³¹Minepa soonaanara saamudyoonttelela Yeesu: “Nyuwo mwaanoomolaka hiyo, munilamule weera hiyo nivolowe mukhumbani.”

³²Yeesu aaweerela: “Mpwaheke!” Iyo saapwaha ni saavolowa mukhumbani. Vano nakupa ootheene aatthimaka akhuruwaka mwaako, amorelaka mphareiyani ni aamireya.

³³Awo yaakukhula ikhumba yaatthimakela osidade ni yaathaliha sootheene seiye, nitho yeeyo yeereiye ni asilopwana eeli yaarino minepa soonanara.

³⁴Atthu ootheene a esidade yaarowa okumana ni Yeesu. Emoonaka Yeesu, yaamudyoonttelela, ottimula mwa elapwaaya.