Read Makhuwa-Shirima Matheyo 9 Bible Online

Matheyo 9 - Makhuwa-Shirima bible

Matheyo 9

¹Avolowaka Yeesu munikulani, aalapuwa ni aarowa osidade ya owannyawe.

²Atthu akina yaamuruuhela mutthu ooheetta aataleliweene munrepani. Oonaka Yeesu nroromelo yaakhalannaaya, aamweerela mutthu ooheetta: “Olipihe murimaawo mwanaka! Sootthekasawo sooleveleliwa.”

³Vahoolowaya, akina a anamawera a nlamulo* yaaheerelana: “Mulopwana ola onimuveiha Muluku!”

⁴Asuwelaka soowuupuwelasaya, Yeesu aaweerela: “Heeni munuupuwelaanyu soonanara mmirimanimwanyu?

⁵Eheeni yookhweya weera: ‘Sootthekasawo sooleveleliwa,’ hoye hoye ‘Weemele ni weette’?

⁶Weeratho musuwele weera Mwaana a mutthu ookhalano vathi ikuru soolevelela soottheka…,” vano aamweerela mutthu ooheetta: “Weemele, okuxe nrepanawo ni orowe owaani.”

⁷Owo aaheemela ni aarowa owaani.

⁸Yoonaka yeeyo, atthu ancipale yaahoova, ni yaamvuwiha Muluku aavanghe ikuru iye atthu.

⁹Avenyaka vaavaale, Yeesu aamoona mutthu iitthaniwa Matheyo akilaantheene nipuro nne waaliviwa musoko, anamweerela: “Mukitthare.” Matheyo aaheemela anamutthara.

¹⁰Areene Yeesu owaani, yaarowa oca ni Yoowo vamoha ni oohuseraawe, anamaliviha a musoko ni anamattheka ancipale.

¹¹Yoonaka yeeyo, aFarisi* yaahaakoha oohusera a Yeesu: “Heeni Muhusihaanyu oncaawe ni anamaliviha a musoko ni anamattheka?”

¹²Iiwalaawe yeeyo, Yeesu aaweerela: “Khaahiyono yaale ari ni okumi animuhaawela meediku, mene aani aretta.

¹³Murowe ni muupuwele etaphulelowaaya ela: ‘Kintthuna ikharari, sihikhanle sooveleela.’ Miyo nkaaweenle owiitthana atthu oororomeleya, mene anamattheka.”

¹⁴Vano oohusera a Yohaane yaahoowa omukoha: “Heeni hiyo ni aFarisi* nintthukaahu, mene oohuseraanyu naari?”

¹⁵Yeesu aawaakhula: “Khoongwereya weera oolattuliwa wa ootthomera okhala oohihakalala, ootthomera areene nlelo ni yaawo. Eniirwe mahuku ootthomera aneeraawe avenxiwe wa yaawo. Wa ehuhuweene yeeyo anootthuka.

¹⁶Khaawo onghela nipareyo nnyowani ekuwo ya khalayi, niwoko nipareyo nnaandyeerere waahula ekuwo ni waahuwa onootepa.

¹⁷Kheengheliwatho eviinyu enyowani mmirupani sa exapala ya khalayi. Apaka, mirupa nsithaale ni eviinyu eniiriheye, ni mirupa nsinanare. Ohiyanawaya, engheliwa eviinyu enyowani mmirupani sinyowani, ni hiiho sootheene sinoothokororeya.”

¹⁸Aalokololaawe yeeyo, aaphiya muhooleli mmoha. Aamukokhorela ohoolowawe eeraka: “Mwanaka ohookhwa vaanaano va. Ngwe ni muntave ni matataanyu, ni owo anaakhale ni okumi.”

¹⁹Yeesu aaheemela ni aarowa ni yoowo, nitho oohuseraawe yaarowa.

²⁰Mwa yeeyo muthiyana mmoha aamanle iyaakha muloko ni piili ahaawaka mweerutthunimwawe ekhumaka ephome, aaphiya ottuli wa Yeesu ni aatava nleembe na ikuwo aawanraawe.

²¹Vano owo aahiixeerela: “Miyo katava soowarasawe, nkilamihiwe.”

²²Arukunuwaka, Yeesu aamoona muthiyana ni aamweerela: “Olipihere murima, mwaana muthiyana, nroromelonawo nohoolamiha.” Wookhuma ehuhuweene yeele, muthiyana aalama.

²³Aphiyaka owannyawe muhooleli ni awoonaka alipa aampetta ni atthu ancipale yiinlaka,

²⁴Yeesu aaweerela: “Mpwaheke! Mwaana khakhwiiye, mene onookona.” Vanonto awo yaamutheiya.

²⁵Vano, aasusihalaawe atthu, Yeesu aavolowa ni aamutava mwaana ni matataawe, ni owo aaheemela.

²⁶Masu a sooweereiya yaamwaramwaxeya mweelaponi yootheene ele.

²⁷Yesu avenyaka vaavaale, atthu eeli oohoona yaamutthara, ekhuwelaka: “Munimorele ikharari hiyo, Mwaana a Davide!”

²⁸Avolowaka Yeesu mpaani, atthu oohoona yaamwaattamela, ni Yeesu aahaakoha: “Nyuwo munoororomela weera Miyo kinoowera opaka yeeyo?” Awo yaamwaakhula: “Aani, Apwiya!”

²⁹Ni Owo atavaka maithwaaya aaweerela: “Okhale ntoko muroromenlaanyu!”

³⁰Ni oohoona ooweeli yaahoona. Yeesu aahaaleela nnenesene: “Mwiipasoope weera ehikhale akina eneera esuwele yeeyo.”

³¹Wa soothesene, awo yaavenya ni yaamwaramwaxa masu mweelaponi yootheene ele.

³²Evenyaka ale, aaronghiwa wa Yeesu mutthu oohuuluma aarino munepa woonanara.

³³Munepa woonanara woomoliwaaya, oohuuluma aapacera wuuluma. Atthu ancipale yaatikhina yeeraka: “Kheenooniwe etthu yoolikana ela oYixrayeli.”

³⁴Vaheera aFarisi* yaaheera: “Ti ni ikuru sa mutokweene a minepa soonanara ole onoomolaawe minepa soonanara.”

³⁵Yeesu anneetteetta isidade ni mittetthe sootheene, axuttihaka muSinagogani*, alaleiyaka masu ooreeraxa a omwene, ni alamihaka ikwerere ni iretta sootheene.

³⁶Awoonaka atthu ancipale, Yeesu aahaamorela ikharari yaawo, niwoko yaakhala oohooxiwa ni oovololeene ntoko ikhondoolo soohikhalano mukukhuli.

³⁷Vano aaweerela oohuseraawe: “Sookhala soohepha sincipale, mene anamiteko ari vakhaani.

³⁸Mumvekele muneene a soohepha weera aarumihele atthu akina soohephasawe.