Read Makhuwa-Shirima Marku 1 Bible Online

Marku 1 - Makhuwa-Shirima bible

Marku 1

¹Epacerero ya masu ooreeraxa mwaha wa Yeesu Kristu, Mwaana a Muluku, yaari ha:

²Ntoko elempwalaaya mulivuruni ya Yesaya: “Nkimurumihe ohoolowanyu namutthengaaka, ni owo anaareherere ephirowaanyu —

³nsu ninkhuwela munikareni: ‘Mwaarehererele ephiro Apwiya! Ngwookolele ephiro Yaawo.’”

⁴Hiiho aahoowa Yohaane, apatisaka munikareni ni alaleiyaka opatiso wa orukunxa murima, weera atthu yaakhele elevelelo ya soottheka.

⁵Atthu a elapo yootheene ya oYudeiya ni muloko wootheene wa oYerusaleemu yaahoowa wa yoole. Elapaka sootthekasaya, yaapatisiwa ni yoowo mmoolokoni Yordanu.

⁶Yohaane aawara ikuwo sa ixapala sa ekamelu* ni laamba a exapala, ni aakhuura misoope nitho oravo wa ntuphini.

⁷Vano, mutthengaawe waari ola: “Ottuliwaka anaawe Mutthu ooweraxa okipwaha miyo. Nkimphwanela okokhora weera kitaphule miraamba sa ikwakwaattasawe.

⁸Miyo kinoopatisani ni maahi, mene Owo anoopatiseni ni Munepa Wootteela.”

⁹Ehuhuweene yeele, Yeesu aahoowa oNasarete elapo ya oGalileiya, ni aapatisiwa ni Yohaane muYordanu.

¹⁰Akhumakaru Yeesu mmaahini, aahoona wiirimu ohuleiyeene ni Munepa omukhuruwelaka Yoowo ntoko ekhunda.

¹¹Vano naakhuma nsu na wiirimu neeraka: “Weyo ori Mwanaka ootthuneyaxa. Mwa Weyo, onkisiveliha!”

¹²Woowaakuveya Munepa waamweettiha Yeesu mpaka munikareni.

¹³Weiwo aakhala mahuku miloko mixexe, eereriwaka ni Satana. Aakhala ni inama sa ntuphini, ni andyelo yaamurumeela.

¹⁴Yohaane atthukiweene, Yeesu aarowa oGalileiya, alaleiyaka masu ooreeraxa a Muluku.

¹⁵Owo anneera: “Yoophiya ehuhu! Omwene wa Muluku wookhuveela. Murukunxe murima, ni muroromele masu ooreeraxa!”

¹⁶Eettaka mukerekhere wa ephareiya ya oGalileiya, Yeesu aamoona Simeyoni ni munneiye Andreiya evonyeraka itthavi mphareiyani, niwoko yaari anamakoka.

¹⁷Vano Yeesu aaweerela: “Mukitthare, ni Miyo kinimookhalihani anamakoka a atthu.”

¹⁸Woowaakuveya yaahiya itthavisaya ni yaamutthara.

¹⁹Arowaka vahoolo vakhaani, Yeesu aamoona munikulani Yakobe, mwaana a Zebedeyo, ni munneiye Yohaane, erehereraka itthavisaya.

²⁰Woowaakuveya aawiitthana, ni awo yaamutthara, yaahiyaka atithaya ni anamiteko munikulani.

²¹Awo yaarowa oKafarnawu, ni niphiyaka nihuku na eSaabadu, Yeesu aavolowa muSinagogani* ni aapacera oxuttiha.

²²Ootheene yaatikhina mwaha wa nihusihonawe, niwoko aaxuttiha ntoko Mutthu a ikuruxa, ohikhanle ntoko anamawera a nlamulo*.

²³Ehuhu emoharu yeeyo muSinagogani*, mulopwana aarino munepa woonanara aakhuwela:

²⁴“Ontthuna eheeni ni hiyo, Yeesu a oNasarete? Waaweenle oniphwata? Koosuwela Weyo taani: ori Ootteela a Muluku.”

²⁵Vano Yeesu aahiiha: “Omaaleke ni okhume mwa yoowo!”

²⁶Munepa woonanara waamutathaxa mulopwana ni waakhuma mwa yoowo okhuwelaka.

²⁷Ootheene yaatikhina, moota wooweera yaakohana: “Eheeni yeeyo? Nihusiho nnyowani, nitho ni ikuru! Owo onoolamula mpaka minepa soonanara, ni seiyo sinoomwiiwelela!”

²⁸Vano ihaali mwaha wa Yeesu saamwaramwareiya woowaakuveya mweelaponi yootheene ya oGalileiya.

²⁹Woovenyani muSinagogani*, Yeesu aarowa vamoha ni Yakobe ni Yohaane mpaka vaate wa Simeyoni ni Andreiya.

³⁰Apwiyamwaanaawe Simeyoni yaari vabeettini, yaavihaka erutthu, ni oohusera yaamuleela Yeesu weera anoovoreiwa.

³¹Yeesu aawaattamela, anaavara ntata, anaakhavihera weera yeemele. Oviha wa erutthu waamaala, ni awo yaapacera waarumeela.

³²Wiilaka, nsuwa nineenleene, muloko wa atthu waahaarongha wa Yeesu aretta ootheene ni atthu yaarino minepa soonanara.

³³Atthu ootheene a esidade yaathukumana vamulako,

³⁴ni Yeesu aahaalamiha ancipale yaahaawa ni iretta soohiyanahiyana. Aahoomolatho minepa soonanara sincipale, mene khaatthunihera weera iyo suulume, niwoko minepa iyo saasuwela weera Yeesu taani.

³⁵Oyaaka ni oxa, Yeesu aaheemela, aakhuma mpaani ni aarowa wa nipuro na meekhaawe, ni iwe aavekela.

³⁶Simeyoni ni asikhwaawe yaarowa weera yaamwaasaase,

³⁷ni emphwanyakaru, yaamweerela: “Ootheene anoowaasani.”

³⁸Yeesu aawaakhula: “Nrowe wa nipuro nikina, wa mmittettheni soowaattamana, weera iwotho Miyo kalaleiye. Vano, Miyo kaarweenle yeeyo.”

³⁹Owo aheetteetta elapo ya oGalileiya yootheene, alaleiyaka muSinagogani* ni oomolaka minepa soonanara.

⁴⁰Namakokho mmoha aamwaattamela Yoowo ni aamukokhorela amudyoonttelelaka: “Mwatthuna, munoowera okitteeliha.”

⁴¹Asareiyeene ni ikharari, Yeesu aahookola moono, anamutava, anamweerela: “Kinootthuna, mukhale ootteelihiwa.”

⁴²Woowaakuveya makokho yaamuhiya, ni owo aatteelihiwa.

⁴³Woottharelana, Yeesu aamupwahiha yoowo ni aamooperera vancipale eeraka:

⁴⁴“Moone, muhaaleele yeeyo akina, mene murowe ni mwiixoonihere wa musaserdoti* ni mwavahe sooveleela sa otteelihiwawanyu ntoko Moisesi aalamulenlaawe, weera eyo ekhale eneneero wa atthu.”

⁴⁵Wa soothesene, owo aavenya, anapacera wuuluma mwaatthuni, amwaramwaxaka ihaali. Tivawo Yeesu khaawera ovolowatho hata esidade emoha, mene annakhala okerekhere, mmapuroni a meekhaawe. Hata hiiho, yannawa wa Yoowo atthu a ilapo sootheene.