Read Makhuwa-Shirima Marku 11 Bible Online

Marku 11 - Makhuwa-Shirima bible

Marku 11

¹Yaakhuveenlaaya oYerusaleemu ni ephiyaka oBetefage ni oBetaniya, wookhuveela omwaako wa Sooliveira, Yeesu aahaarumiha oohusera eeli

²aweerelaka: “Murowe mmuttettheni ori ohoolowanyu. Mwaavolowakaru, munoomphwanya buuru mwaaxaana atthukiweene, mwa yoowo khaawo atonke ongwela. Mwamutaphule ni mukiwiihere.

³Mukina ookohani: ‘Heeni mumpakaanyu yeeyo?’ mwamuleele: ‘Apwiya anoomutthuna ni eniimuhokoloxe woowaakuveya.’”

⁴Awo yaarowa ni yaamphwanya buuru mwaaxaana mmuseweni, atthukeleliweene vamulako. Emutaphulaka,

⁵akina yaari vaavaale yaahaakoha: “Mumpaka eheeni nyuwo, muntaphulaka buuru mwaaxaana ola?”

⁶Oohusera yaahaakhula ntoko Yeesu aaleenlaawe, ni awo yaahaahiya erowaka.

⁷Yaamuruuhela Yeesu buuru mwaaxaana, yaamvonyera mikaandyosaya, ni Yeesu aangwela.

⁸Ancipale yaahaatala mikaandyosaya mphironi. Akina yaamwaramwaxa iphandi yaathikinlaaya mmatta.

⁹Yaawo yaahoolenle ni yaawo yaamutthanre yaakhuwela: “Hosana*! Ooreelihiwa ti Yoowo ongwa mwa Nsina na Apwiya!

¹⁰Wooreelihiwa ti omwene wa atithihu Davide onrwa. Hosana* musulusulu!”

¹¹Yeesu aaphiya oYerusaleemu, anavolowa Mpaani mwa Muluku. Aaweha sootheene sa mukhwipimwawe, ni weenre wakhalaka oxekuwa, aavenya arowaka oBetaniya vamoha ni muloko neeli.

¹²Oxaawaya, evenyaka oBetaniya, Yeesu aavoliwa etala.

¹³Oonaka ottaiwene mwiri wa efiigu ni makukhu, aarowa weera oone saakhanleene soowiima sa efiigu. Aattamelaka, khaaphwannye etthu, ehikhanle makukhu, niwoko kayaahiyono ehuhu siniimaaya soowiima sa efiigu.

¹⁴Vano aaheerela: “Khaawo anaacetho soowiimasanyu.” Oohuseraawe yaamwiiwa uulumaka yeeyo.

¹⁵Aphiyaka oYerusaleemu, Yeesu aavolowa Mpaani mwa Muluku, ni mwemmwe aapacera owoomola yaathuma ni yaathumiha. Aapittula meesa a anamaceendya a musurukhu ni ihice sa anamathumiha ikhunda.

¹⁶Khaatthunihera weera ahikhale aneera ateexe itthu soothumiha Mpaani mwa Muluku.

¹⁷Ni aahaaxuttiha eeraka: “Kheelempwe: ‘Empaaka eniyiitthaniwe Empa ya Mavekelo wa miloko sootheene?’ Vano nyuwo mootatuxa nikhuku na anamwiiya!”

¹⁸Ahooleli a asaserdoti* ni anamawera a nlamulo* yaahiiwa masu ala ni yaapacera waasaasa mukhalelo weera emwiive, niwoko yaamoova, yeenre atthu ootheene ale yatikhinaka ni oxuttihawawe.

¹⁹Wiilaka, awo yaavenya osidade.

²⁰Oxeexelo, yeettaka hiihaale, yaahoona mwiri wa efiigu wuumaleene okhuma mikwankhwaarisaya.

²¹Uupuwelelaka Pedru, aamweerela Yeesu: “Muhusiha, moone! Mwiri wa efiigu mwalamphaanyu, wohuuma!”

²²Yeesu aamwaakhula: “Munroromele Muluku.

²³Kinoororomelihani weera mukina eerela mwaako ola: ‘Mvenye ni mwiivonyere mphareiyani,’ ni owo aahihovela mmurimanimwawe, mene aroromela weera sinimweereiya seiyo aahimaawe, hiiho nsimweereele.

²⁴Tivawo, kinooleelani: sootheene mumvekelaanyu munivekeloni, muroromele weera mohaakhela, ni hiiho mmwivahiwe.

²⁵Mwaavekelaka, mwakhalano mulattu ni mukina, munlevelele weeratho Atiithi ari wiirimu yooleveleleni sootthekasanyu.

²⁷Yaaphiyatho oYerusaleemu. Aviraka Yeesu Empa ya Muluku, yaamwaattamela Yoowo ahooleli a asaserdoti*, anamawera a nlamulo* ni asitokweene a muloko, ni yaamukoha:

²⁸“Ni ikuru heeni mumpakaanyu itthu iya? Ni taani yoovangheni ikuru weera mpake iya?”

²⁹Yeesu aawaakhula: “Miyotho kinimookohani etthu: Mukaakhule, ni kinimooleelani ni ikuru heeni kimpakelaaka itthu iya.

³⁰Opatiso wa Yohaane waari wa wiirimu, hoye hoye wa atthu? Mukileele!”

³¹Awo yaavaanyihana yaaworu, yeeraka: “Neera ‘wa wiirimu,’ Owo onoonikoha: ‘Vano, heeni mwahaamuroromenlaanyu yoowo?’

³²Vanonto, neera: ‘wa atthu…’” Awo yoova muloko wa atthu niwoko ootheene yaamweerela vekhaikhai weera Yohaane aari mprofeeti.

³³Awo yaamwaakhula Yeesu: “Khanisuwenle.” Vano Yeesu aaweerela: “Hata Miyo nkinooleelani ni ikuru heeni kimpakelaaka itthu iya.”