Read Makhuwa-Shirima Marku 16 Bible Online

Marku 16 - Makhuwa-Shirima bible

Marku 16

¹Nimalaka nihuku na eSaabadu, Mariya oMagadalene, Salome, ni Mariya amayawe Yakobe, yaathuma itthu soowunkhelaxa weera ettikitthele muttembo wa Yeesu.

²Vanihukuni noopacera na esimana, oyaaka ni oxa, nsuwa nikhumaka, awo yaarowa onihiyeni.

³Yaakohana yaaworu: “Taani anaanipirikixele nluku na mulako wa nihiye?”

⁴Erowakatho weera yoone, yaahoona weera nluku ntokotoko nne naapirikixiwa.

⁵Evolowakaru munihiyeni, yaamoona mulopwana awanreene ikuwo sootteelaxa akilaantheene moono mulopwana, ni yaatuthuwa.

⁶Owo aaweerela: “Muhoove. Munimwaasaasa Yeesu muNasarete, okhomeliwe. Owo oovenyerera! Khamomo. Moone nipuro awo yaamwiikaanthaaya.

⁷Murowe ni mwaaleele oohuseraawe ni Pedru: Owo onoorowa oGalileiya ohoolowanyu. Weiwo mmwamoone ntoko Owo ooleenlaaweni.”

⁸Ethukumelaka ni etuthuwaka, asithiyana yaakhuma ni yaatthawa munihiyeni. Khayaamuleenle mutthu, niwoko yaahoovaxa. [

⁹Yeesu avenyererakaru oyaaka ni oxa wa nihuku noopacera na esimana, aahiixoonihera toko wa Mariya oMagadelene, mwa yoowo Yeesu aamoomolenlaawe minepa soonanara mithannamiili.

¹⁰Owo aarowa ni aahaaleela yaawo yaari ni Yeesu. Awo yeera elalamikaka ni yiinlaka.

¹¹Yiiwalaaya weera Yeesu ori ni okumi ni aahooniwa ni Mariya oMagadalene, khayaaroromenle yeeyo.

¹²Vahoolowaya Yeesu aahiixoonihera ni ekhalelo ekina wa eeli a yaawo yeettaka mphironi, erowaka omatta.

¹³Awo yaahokolowa ni yaahaaleela yeeyo, akinatho khayaaroromenle hata yaawo.

¹⁴Vahoolotho Yeesu aahiixoonihera wa muloko nimmoha, ereene woocaani. Aahaahiiha niwoko na ohiroromelawaya ni wuumawaya murima, woonaka weera khayaaroromenle yaawo yaamoonne Yeesu avenyererakaru.

¹⁵Aaweerela: “Murowe mweelaponi yootheene ni mwaalaleere atthu ootheene masu ooreeraxa.

¹⁶Yoowo onroromela ni ompatisiwa, anaavuluxiwe, vaheera yoowo ohinroromela, anaathorihiwe.

¹⁷Ineneero iya sineera saahoole yaawo anroromela: Mwa Nsinanaka eniyeereke woomola minepa soonanara, wuuluma muulumo manyowani,

¹⁸ovara inowa, ni yawura itthu soowiiva, khasirwa saapakela naari etthu yoonanara emoha. Awo eniwiikaathere matata aretta, ni yaawo eniilamihiwe.”

¹⁹Emalihakaru wuuluma ni yaawo, Apwiya Yeesu yaawelihiwa wiirimu, ni yaakilaathi moono mulopwana wa Muluku.

²⁰Vano oohusera yaavenya ni yaalaleiya mapuro ootheene. Apwiya yaavara muteko vamoha ni yaawo, ni yaalipihera maswaaya ni ineneero saahoola masweene yaale.]