Read Makhuwa-Shirima Marku 3 Bible Online

Marku 3 - Makhuwa-Shirima bible

Marku 3

¹Ehuhu ekina Yeesu aavolowa muSinagogani*, ni aakhala mwemmwe mulopwana aarino ntata nimoha noorakala.

²Akina a yaawo yannaasaasa nthowa weera emoothere Yeesu. Tivawo yaangwehexenxaaya weera yoone Owo aariki alamihe eSaabadu.

³Yeesu aamweerela mulopwana oorakala ntata: “Mweemele ni ngwe eriyari va.”

⁴Vano Yeesu aahaakoha: “Entthuniheriwa eheeni opaka eSaabadu: yooreera, hoye hoye yoonanara, ovuluxa okumi, hoye hoye wiiva?” Mene awosa yaamaala.

⁵Anyoonyiweene, aahaaweha yaawo yaamurukureenre, ni athananihiweene vancipale niwoko na mirimasaya soowuuma, Owo aamweerela mulopwana: “Mookole ntatananyu.” Owo aahookola, ni ntata naalamihiwa.

⁶Vano aFarisi* yaavenya ni yaapacera omvaanelela ni atthu a Herodi moota heeni yeeraaya emwiive Yeesu.

⁷Yeesu aavenya ni oohuseraawe, arowaka ophareiyani. Atthu ancipale eweelaka oGalileiya yaamutthara.

⁸Yiiwalaaya mwaha wa sootheene Owo aapakaawe, atthu ancipale eweelaka oYudeiya, oYerusaleemu, wIdumeiya, ilapo sa mukhwipi wa oYordanu ni sa mukerekhere wa oTiro ni oSidoni yaahoorwa wa Yoowo.

⁹Hapo yaakhala atthu ancipale, Owo aahaalamulela oohuseraawe weera yaasaase nikula nikhaani weera ahaamaane ni atthu.

¹⁰Vano Owo aahaalamiha ancipale, moota wooweera aretta yaamukakhana yeerelaka omutava.

¹¹Imaara sootheene saamoonaaya minepa soonanara Yeesu, saamukokhorela vahoolowawe sikhuwelaka: “Weyo Mwaana a Muluku!.”

¹²Vano Owo aalamulelaxa weera sihimuhime.

¹³Yeesu aawela vamwaakoni ni aawiitthana yaawo aatthunaawe, ni awo yaahoorwa wa Yoowo.

¹⁴Aahaathanla muloko neeli, aakhalihaka ntoko arummwa, weera ekhale ni Yoowo, ni erumihiwe olaleiya

¹⁵nitho weera ekhalane ikuru soowoomola minepa soonanara.

¹⁶Vano, muloko neeli aathanlalaawe ti ala: Simeyoni (aamuttenghaawe nsina na Pedru),

¹⁷Yakobe, mwaana a Zebedeyo ni munneiye Yohaane (wa yaawo aattenghaawe nsina na Bowanergesi, entaphulela anamwane a etari),

¹⁸Andreiya, Filipe, Bartolomeyo, Matheyo, Tomaxi, Yakobe mwaana a Alfeyu, Tadaiyo, Simeyoni Zeloti*,

¹⁹ni Yudasi Iskariyoti aamvarihale Yeesu.

²⁰Yeesu aavolowa mpaani, ni yaathukumanatho mwemmwe atthu ancipale, moota wooweera Owo ni oohuseraawe hata khayaawenre oca.

²¹Yiiwalaaya amusaawe mwaha wa yeeyo, yaavenya weera emvenxe, niwoko yeera: “Owo naanepa.”

²²Ni anamawera a nlamulo* yaarweenle oYerusaleemu yeeratho: “Owo ookhalano Beelzebuli. Ti ni ikuru sa muneene a minepa soonanara Owo onoomolaawe minepa soonanara.”

²³Vano Yeesu aawiitthana ni aawuulumela ni soolikanyiha: “Ongwereya hai Satana omoomola Satana?

²⁴Omwene wakawanyeiya muneenaayaru, khoongwereya opwaherera.

²⁵Vaate wakawanyeiya muneenaayaru, khoongwereyatho opwaherera.

²⁶Satana iiwananaka muneenaawe ni iikawanyiha muneenaaweru, khangwereya okhala; ommaleloniwawe woophiya.

²⁷Mwa yeeyo, khaawo ongwera ovolowa mpaani mwa mulopwana oolipa ni okuxamo sooreelasawe, ahinaaye toko omutthuka. Paahi hiiho onoowera omwiiyera empaawe.

²⁸Kinooleelani ni ekhaikhai weera onoowereya atthu waakhela elelevelo ya soottheka sootheene ni oveiha wootheene,

²⁹mene yoowo omveiha Munepa Wootteela, khanleveleliwaru: owo ookhalano nthowa na yoottheka yoohimala.”

³⁰Yeesu uulumale yeeyo niwoko awo yeenre: “Ole ookhalano munepa woonanara.”

³¹Yaaphiya amayawe ni axunneiye Yeesu. Ereene vaate, yaamurumiha mukina weera amwiitthane.

³²Yaakhala atthu ancipale ekilaantheene ni emurukureenreene Yeesu, awo yaamweerela: “Amayinyu ni axunninyu ari vaate ni anoowaasani.”

³³Vano Owo aahaakoha: “Amayaka ni axunnaka taani?”

³⁴Aahaaweha atthu yaakilaanthi emurukureenreene ni aaweerela: “Va ari amayaka ni axunnaka.

³⁵Yoowo oniiwelela otthuna wa Muluku, owo ti munnaka, murokoraka ni amayaka.”