Read Makhuwa-Shirima Marku 4 Bible Online

Marku 4 - Makhuwa-Shirima bible

Marku 4

¹Yeesu aapaceratho oxuttiha mukerekhere wa ephareiya. Yaathukumana emurukureenreene atthu ancipale, moota wooweera aavolowa munikulani ni mwemmo aakilaathi. Nikula naari mphareiyani, atthu ereene mukerekhere wa ephareiya.

²Owo aahaaxuttiha itthu sincipale ni soolikanyiha, eeraka munihusihonimwawe:

³“Mwiiwe, namwaala aavenya weera aale.

⁴Aalaka mmiso, mpatta mmoha waamorela mukerekhere wa ephiro, ni ipalame saahoowa ni saahooca.

⁵Mpatta mukina waamorela vamasorosoroni yahaakhanlewo etthaya yincipale, ni woowaakuveya waamela, niwoko etthaya khayiixenre.

⁶Naakhumalaaya nsuwa, mmiso ole waamenle waanyaala ni waahuuma, niwoko khawaarino mikwankhwaari.

⁷Mpatta mukina waamorela vanyiiwani ni, sunnuwaka, saavuvura mmiso ole moota wooweera khawiimale.

⁸Mpatta mukinatho waamorela vatthayani yooreera, waamela, waahunnuwa ni waahiima, ovahaka soohepha sooreera ophiyera mukina imaara miloko miraru, mukina imaara miloko mithannamosa ni mukinatho mpaka imaara ncira.”

⁹Woottharelana Yeesu aaheera: “Yoowo orino maaru oowiiwela, iiweke!”

¹⁰Yaapwahaaya atthu ancipale, muloko neeli ni yaawo yaari mukhwipimwawe Yeesu yaamukoha mwaha wa soolikanyiha seiye.

¹¹Owo aaweerela: “Wa nyuwo moovahiwa exiiri ya omwene wa Muluku, mene wa yaawo ari vaate, sootheene anleeliwa ni soolikanyiha

¹²weera: ‘hata yoonaka, khaanoonexexa, ni yiiwaka, khaaniiwexexa, weera ehirukunxe murima ni ehileveleliwe.’

¹³Vano Yeesu aahaakoha: “Nyuwo khamuniiwexexa yoolikanyiha ela? Vanonto, mmwiiwexexe hai yakhalaru yoolikanyiha ekina?

¹⁴Namwaala onaala masu.

¹⁵Atthu akina ari yaawo mukerekhere ephiro weiwo masu yaalingwaaya. Yiiwaru masu, Satana onimoowa ni onoovenxa masu yaalingwe mwa yaawo.

¹⁶Akina, ntoko mmiso woomisiwa vamasorosoroni, aniiwa masu ni woowaakuveya anaakhelela ni ohakalala.

¹⁷Wa soothesene, woonaka weera awo khaanono mikwankhwaari asineenaaya, khaankhala ehuhu yincipale. Waakhumelelaka ohaawa, hoye hoye ottharatthariwa niwoko na masu, woowaakuveya anoohiya ale.

¹⁸Akina ntoko mmiso woomisiwa vanyiiwani, aniiwa masu,

¹⁹mene saaphiyaka sooweeteteela sa okumi ola ni olokottha wa opuha ni ohaawela itthu sikina, sinoovuvura masu, etatuxaka ale oohiima.

²⁰Atthu akina, ntoko mmiso woomisiwa vatthayani yooreera, aniiwa masu, anaakhulela ni anruwera soohepha sa imaara miloko miraru, imaara miloko mithannamosa ni mpaka imaara ncira.”

²¹Yeesu aaweerela: “Taani ongwiiha onyaari weera apopheelele owo ni elaata, hoye hoye vathi vabeetti? Hoye! Muniikaathi nipuro nootthuneya.

²²Vano, itthu sootheene sa wiiphiini nsithupululiwe, nitho itthu sootheene soovithiwa nsilaleiwe.

²³Mukina orino maaru oowiiwela, iiweke!”

²⁴Yeesu aapwaherera eeraka: “Muupuweleke nnenesene yeeyo muniiwaanyu. Muringo munringelaanyu, nyuwo mmuringeliwe, ni mmwaandyeereriwetho.

²⁵Owo orino, onimwaandyeereriwatho. Owo ohikhalanne, mpaka yeeyo orinaawe onimwaakhiwa.”

²⁶Owo aapwaherera eeraka: “Omwene wa Muluku onlikana ni mulopwana onaala mmiso vatthayani.

²⁷Ohiyu ni othana, akonaka, hoye hoye avenyaka, mmiso onoomela ni onimunnuwa, naari owo ahisuwelaka moota heeni.

²⁸Etthaya eneenaaya enooruwera etrigu: woopacera muropo, vahoolowaya nikala, ni ommaleloni inuku soosareya munikalani.

²⁹Yiitthwaru etrigu, mulopwana onoopacera waanyuula, niwoko yoophiya ehuhu ya ohepha.”

³⁰Aaheeratho: “Nnilikanxe ni eheeni omwene wa Muluku? Yoolikanyiha heeni nneeraahu nivarele muteko weera nithalihe owo?

³¹Ori ntoko enuku ya emostarda* eri ekhaani yoopwaha inuku sootheene sinaaliwa vatthayani.

³²Wa sootheesene, yaaliwaka, ela enimunnuwa ni enoothatuwa mwiri mutokotoko woopwaha nyiri sootheene sa nttimbeni ni iphandi sitokotoko, moota wooweera ipalame sa wiirimu sinoowera omaka mmunttuusinimwaya.”

³³Ni soolikanyiha sincipale ntoko iya Yeesu aalaleera masu, yeeyo awo yaaweraaya wiiwexexa.

³⁴Khaaleela etthu, ohikhanle ni soolikanyiha. Vano, aakhalaawe ni oohuseraawe paahi, annaathalihera sootheene.

³⁵Vanihukuni nne, wiilaka, Owo aaweerela oohuseraawe: “Nrowe nilapuwele okhopela.”

³⁶Yaahiyaka atthu ancipale, yaamukuxa munikulani mooteene yoowo aaraawe. Makula makinatho yaamuhoola.

³⁷Yaapacera ettheku, ni mitekuteku saavolowa munikulani moota wooweera nikula naahanle vakhaani osareya maahi.

³⁸Yeesu aari mpatta wa ottuli wa nikula akonaka, ni muruwaawe iikaathiyeene vakuwoni. Oohusera yaamvenxa ni yaakhuwela: “Muhusiha, khamumpwattha weera hiyo ninooriheya?”

³⁹Owo aavenya, aahiiha epheyo ni aaheerela ephareiya: “Omaale ni wiikhalele.” Epheyo yaamaala, ni sootheene saakhala soomaaleleyaxa.

⁴⁰Vano aahaakoha oohuseraawe: “Heeni nyuwo munoovaanyu vancipale? Nlelo khamunroromela?”

⁴¹Awo yaahoova vancipale ni yaakohana: “Ola taani? Mpaka epheyo ni ephareiya enoomwiiwelela!”