Read Makhuwa-Shirima Marku 5 Bible Online

Marku 5 - Makhuwa-Shirima bible

Marku 5

¹Awo yaalapuwa ephareiya ni yaarowa elapo ya oGeraseno.

²Akhuruwakaru Yeesu munikulani, mutthu aarino munepa woonanara aahoowa wa Yoowo, akhumelelaka omahiyeni.

³Mulopwana owo annakhala variyari wa mahiye. Khaawo yaangwera omutthuka, hata ni onyooro,

⁴niwoko imaara sincipale yaamutthukaaya ni onyooro munaawoni ni mmatatani, mene owo annapasa onyooro ni iyuuma sa mmanaawoni. Khaawo aarino ikuru weera angwere.

⁵Ohiyu ni othana owo anneetta variyari wa mahiye ni mattumuxa, akhuwelaka ni iithikilaka ni maluku.

⁶Amoonakaru Yeesu ottaiwene, aatthimaka ni aamukokhorela vahoolowawe,

⁷anakhuwela vancipale: “Nyuwo ni miyo muntthuna eheeni, Yeesu, Mwaana a Muluku musulusulu? Kinoodyoonttelelani ni Muluku weera muhikittaruxe.”

⁸Munepa ole wuulumale yeeyo niwoko Yeesu aaheerela: “Okhume wa mulopwana ola, munepa woonanara!”

⁹Vano Yeesu aakoha: “Nsinanawo taani?” Owo waamwaakhula: “Nsinanaka ti Elexawu*, niwoko nri minepa sincipale.”

¹⁰Ni munepa woonanara waamudyoonttelelaxa Yeesu weera Owo ahilamulele ovenya elapo ele.

¹¹Vano, nakupa mutokotoko a ikhumba eera acaaka vanttumuxani nookhuveela.

¹²Minepa soonanara saamudyoonttelela Yeesu: “Munoomolele okhumbani weera navolowe mwemmo.”

¹³Owo aatthunihera, ni minepa soonanara saakhuma ni saavolowa mukhumbani. Nakupa oophiyera macira miloko miili a ikhumba aatthimaka arowaka oxepani, anakhumbwela mpareiyani ni anamireiya mwemmo.

¹⁴Yaawo yaakukhula ikhumba, yaatthawa ni yaathaliha itthu iye osidade ni mmamattani, ni muloko wa atthu waarowa weera woone yeeyo yeereiye.

¹⁵Omwaattamelaka Yeesu, waamoona vaavaale mulopwana aarino Elexawu* ya minepa soonanara, akilaantheene, awanreene ni uupuwelaka nnenesene, ni waahoova.

¹⁶Yaawo yoonne yaathalihera muloko wa atthu yeeyo yeereiye ni mulopwana ole aarino minepa soonanara, ni yaahuulumatho mwaha wa ikhumba.

¹⁷Vano muloko wa atthu waapacera omudyoonttelela Yeesu weera avenye elapwaaya ele.

¹⁸Yeesu avolowaka munikulani, mulopwana aarino minepa soonanara aamudyoonttelela weera amutthunihere orowa vamoha ni Yoowo.

¹⁹Yeesu khaamutthunihenre, mene aamweerela: “Murowe owaani wa emusaanyu ni mwaaleele yeeyo Apwiya yoopankaayani, ni moota yoomorenlaayani ikharari nyuwo.”

²⁰Mulopwana ole aarowa ni aapacera olaleiya elapo ya oDekapolisi yeeyo Yeesu aamupakenlaawe. Vano ootheene yaatikhina.

²¹Ahokoleenleenetho Yeesu okhopela munikulani, atthu ancipale yaathukumana emurukureenreene Owo areene mukerekhere wa ephareiya.

²²Vano aaphiya vaavaale muhooleli mmoha a eSinagoga* iitthaniwa Yairu. Amoonakaru Yeesu, aamukokhorela inaawosawe

²³ni aamudyoonttelela ni ovilela, eeraka: “Mwanaka muthiyana ohanle vakhaani okhwa. Dyoontte, murowe ni mwamwiikaathere matata weera alamihiwe ni akhale ni okumi.”

²⁴Vanonto Yeesu aarowa ni yoowo. Atthu ancipale yaamutthara ni yaahaamaana ni Yoowo.

²⁵Aakhala vaavaale muthiyana mmoha aahaawa iyaakha muloko ni piili eretta ya okhuma ephome.

²⁶Annahaawa vancipale niwoko na weereriwa ni mameediku, ni aananariha sootheene aarinaawe, mene ohiya olama, aamweera otepa.

²⁷Owo iiwalaawe wuulummwa sa Yeesu, aaphiya ottuli wa Yeesu variyari wa atthu ancipale, anatava soowarasawe,

²⁸niwoko uupuwela: “Miyo paahi katavaru soowarasawe, kinoolama.”

²⁹Woowaakuveya, yaamaala okhuma ephome, ni owo aahiiwelela mweerutthunimwawe weera aalama mohaawanimwawe.

³⁰Ehuhu emoharu yeele Yeesu aasuwela weera saakhuma ikuru wa Yoowo. Aahaarukunuwela atthu ancipale ni aahaakoha: “Taani otamve soowarasaka?”

³¹Oohuseraawe yaamwaakhula: “Ngwoone atthu ancipale amaraanne variyariwanyu, ni munookohatho: ‘Taani okitamve?’”

³²Yeesutho aapwaherera awehawehaka mukhwipimwawe weera amoone taani aapanke yeeyo.

³³Muthiyana asuwelaka yeeyo yaamukhumelenle, aamwaattamela, anamukokhorela inaawosawe, ni athukumelaka ni woova, anamuthalihera ekhaikhai yootheene.

³⁴Vano Owo aamweerela: “Mwaana, nroromelonanyu nohoolamihani. Murowe mmuretteleni ni mukhale oolamihiwa ni ohaawawanyu.”

³⁵Yeesu nlelo eera uulumaka, yaaphiyalaaya atthu akina a muhooleli a eSinagoga*. Awo yaamweerela: “Mwaninyu ohookhwa. Khoontthuneyatho omuxupa Muhusiha.”

³⁶Ahipwatthaka etthu yeeyo awo yeenraaya, Yeesu aamweerela muhooleli a eSinagoga*: “Muhoove, muroromele paahi.”

³⁷Khaatthunihenre akina omutthara Yoowo, ahikhanle Pedru, Yakobe, ni axunneiye Yohaane.

³⁸Yaaphiyalaaya owannyawe muhooleli a eSinagoga*, Yeesu aaphwanya onyakula otokotoko ni atthu yiinlaka ni elalamikaka vancipale.

³⁹Vanonto aavolowa ni aaweerela: “Heeni onyakula otokotoko ni olalamika wu? Mwaana khakhwiiye, mene onookona.”

⁴⁰Vaheera awo yaamutheiya. Awoomolakaru ootheene, aahaakuxa atithawe ni amayawe mwaana, ni oohusera yaari ni Yoowo. Aavolowa weiwo aaraawe mwaana.

⁴¹Aamvara ntata anamweerela: “Talita kumi!” entaphulela: “Mwaamwali, Miyo kinoolamula weera ovenye!”

⁴²Woowaakuveya mwaamwali, aarino iyaakha muloko ni piili, aavenya anapacera weetta. Eyo yaahaatikhinihaxa akina yaari mwemmo.

⁴³Owo aahaalamulelaxa weera ahikhale aneera asuwele, nitho weera emvahe etthu ace.