Read Makhuwa-Shirima Marku 7 Bible Online

Marku 7 - Makhuwa-Shirima bible

Marku 7

¹aFarisi* ni akina a anamawera a nlamulo* erweelaka oYerusaleemu yaathukumana ni Yeesu.

²Yaawoona oohuseraawe akina ecaaka ni matata oohitteela, eyo tiiyo woohinyawa.

³Vano, aFarisi* ni aYuda ootheene khaanca ehinyangwe mmatatani, ettharihaka hiiho ekhovelelo ya asitokweene.

⁴Yaahokolowaka omerekadu, khaanca ehinaaye onyawa. Antthariha ikhovelelo sikina sincipale ntoko orapiha ikoomixi, nyaapu ni ipirinka sa eyuuma.

⁵Vano aFarisi* ni anamawera a nlamulo* yaamukoha Yeesu: “Heeni oohuseraanyu ahinttharihaaya ikhovelelo sa asitokweene, ecaaka yooca ni matata oohitteela?”

⁶Owo aawaakhula: “Mprofeeti Yesaya aahuuluma nnene mwaha wa nyuwo, anamwiixeera, aalempaawe: ‘Muloko ola onkittittimiha ni eyano, mene mirimasaya sookirakamela.

⁷Ankilapa siiyo. Mahusihowaaya ari malamulo a atthu paahi.’

⁸Nyuwo munkhootta malamulo a Muluku ni muntthariha ikhovelelo sa atthu.”

⁹Ni aaweerelatho: “Nyuwo munnavaanela nnenesene weera mukhootte malamulo a Muluku weera muttharihe ikhovelelosanyu.

¹⁰Vano Moisesi aaheera: ‘Mwaattittimihe atithinyu ni amayinyu,’ ni ‘yoole onaaveiha atithawe, naari amayawe anaathorihiwe mpaka okhwa.’

¹¹Nyuwotho munaakhulela mukina aweerelaka atithawe, naari amayawe: ‘yakhalaru ekhavihero nyuwo muneeraanyu mwaakhele wa miyo ti Korobani’ (eyo entaphulela: yootteeliheriwa Muluku).

¹²Hiiho nyuwo khamunimunyesereriha yoole waakwaniherela yakhalaru etthu atithawe, naari amayawe.

¹³Hiihotho nyuwo munkhaliha a siiyo masu a Muluku ni ekhovelelowaanyu nyuwo mummwaramwaxaanyu. Mumpakatho itthu sincipale ntoko yeela.”

¹⁴Yeesu aawiitthanatho atthu ancipale ni aaweerela: “Mukiiweke ootheene ni mwiiwexexe ela:

¹⁵Kheewowo yakhalaru etthu eri omokoni wa mutthu eneera yavolowa mwa yoowo, enoowera omutatuxa oohitteela. Ohiyanawaya, ti yeeyo enkhuma mwa mutthu enimutatuxa oohitteela.”*

¹⁷Aahiyaka atthu ancipale ni evolowaka mpaani, oohusera yaamvekela Yeesu weera aathalihere yoolikanyiha ele.

¹⁸Yeesu aahaakoha: “Weeraka nyuwotho khamungwera wiiwexexa? Khamunsuwela weera kheewo etthu emvolowa mwa mutthu engwera omtatuxa ole oohitteela?

¹⁹Kheemvolowa mmurimanimwawe, mene munipwiipwini, ni vahoolo eniikhume.” Ahimaka yeeyo, Yeesu aaheera weera sooca sootheene ti sootteela.

²⁰Owo aapwaherera eeraka: “Itthu sinkhuma wa mutthu sinimutatuxa oohitteela.

²¹Vano, ti wa mmurimani wa mutthu sinkhumaaya soowuupuwela soonanara, olavilavi, soowiiya, soowiiva, sooraruwa,

²²wiinlela mihakhu, soonanara murima, soolokottha, soohiisuumaaliha, nrima, waapa, wiixoona ni ololo.

²³Soonanara sootheene iya sinkhuma mpuwa ni sinimutatuxa mutthu oohitteela.”

²⁴Yeesu aavenya nipuro nne ni aarowa elapo ya oTiro. Aavolowa mpaani ni khaatthuna weera akina emusuwele. Wa soothesene, aahooceela wiivitha weera ahisuweliwe.

²⁵Mwa yeeyo, iiwakaru wuulummwa sa Yoowo, muthiyana mmoha, mwanawe muthiyana aarino munepa woonanara, aahoowa ni aahuuwela vanaawoniwawe.

²⁶Muthiyana ole aari muGrego, aayariwe oSiro-Fenisiya, ni aamdyoonttelela Yeesu weera oomole munepa woonanara wa mwanawe ole.

²⁷Owo aamweerela: “Mwaahiye toko weera anamwane ece mpaka evone, niwoko khoontthuneya ovenxa yooca ya anamwane ni waavonyera alapwa.”

²⁸Owo aamwaakhula: “Apwiya, mene mpaka alapwa vathi vameesa anca inyenyeeri sa anamwane.”

²⁹Vano Owo aamweerela: “Niwoko na yoowaakhula ela, nyuwo muroweke, munepa woonanara woovenya wa mwaninyu.”

³⁰Owo aarowa owaani ni aamphwanya mwanawe iixaatalenleene vabeettini, ni munepa woonanara omuhiyaleene.

³¹Vahoolowaya Yeesu aavenya mweelaponi mwa oTiro ni aaheetteetta oSidoni, mpaka ephareiya ya oGalileiya ni elapo ya oDekapolisi.

³²Weiwo atthu akina yaamuruuhela Yoowo mulopwana aari oohiiwa ni oohuuluma nnene, emudyoonttelelaka weera Owo amwiikaathere matata.

³³Amuronghakaru mulopwana okerekhere, ottaiwene wa atthu ancipale, Yeesu aamvoleiha ikathasawe mmaarunimwawe. Vahoolowaya, Yeesu aasenya, anatava nlumi na mulopwana,

³⁴anattukhula maitho, awehaka wiirimu, ni ahihimeraxaka, aamweerela mulopwana: “Efata,” entaphulela: “Muhuleiyeke!”

³⁵Ni hiiho, maaru a mulopwana yaahuleiya, nluminawe naataphuleiya, ni owo aapacera wuuluma nnenesene.

³⁶Yeesu aahaalamula weera ehaaleele akina. Wa soothesene, atepaka waahiiha, awo yaatepaxatho wuuluma.

³⁷Muloko wa atthu waatikhinaxa ni waaheera: “Owo ompaka sootheene sooreera. Onoowera mpaka omwiiwiha oohiiwa ni omuulumiha oohuuluma.”