Read Makhuwa-Shirima Marku 8 Bible Online

Marku 8 - Makhuwa-Shirima bible

Marku 8

¹Wa mahuku ale yaathukumanatho atthu ancipalexa. Woonaka weera khayaarino etthu weera ece, Yeesu aawiitthana oohuseraawe ni aaweerela:

²“Kinaamorela ikharari atthu ancipale ala. Aamala mahuku mararu ereene ni Miyo ehicaaka.

³Miyo kaalamulela orowa owaani ni etala, eniikomoke mphironi, niwoko akina a yaawo yaakhumme ottai.”

⁴Oohuseraawe yaamwaakhula: “Woowi aneeraawe aphwanye mutthu yooca yookwana waavaha atthu ancipale ala vanipuroni nna na ottai?”

⁵Yeesu aahaakoha: “Ipaawu ihayi murinaanyu?”Awo yaamwaakhula: “Ithannapiili.”

⁶Yeesu aahaalamula atthu ancipale weera ekilaathi vathi. Aakuxa ipaawu ithannapiili, ni atthapenleene, aameyanyiha ipaawu ni aahaavaha oohuseraawe weera yaakawele atthu ancipale, ni awo yaapaka hiiho.

⁷Yaakhalanotho ihopa sikina sikhaanene. Owo aatthapelatho mooteene yoole, ni aaweerela oohuseraawe weera yaakawele.

⁸Muloko wa atthu waahooca mpaka waavona. Ni yaathukumanyiha mipapara mithannamiili soosareya mivithe saahanle.

⁹Yaakhalawo wookwanaka asilopwanaru macira miloko mixexe yaari vaavaale. Aalaxerakaru atthu ancipale,

¹⁰Yeesu aavolowa munikulani vamoha ni oohuseraawe ni yaarowa elapo ya oDalmanutha.

¹¹aFarisi* yaahoowa ni yaapacera omukohakoha Yeesu. Etthunaka omweerera, yaamvekela eneneero ya wiirimu.

¹²Aahihimeraxa ni aaweerela: “Heeni ekhapira ela emvekelaaya eneneero yootikhiniheiya? Miyo kinooleelani ni ekhaikhai weera hata eneneero emoha kheemvahiwa ela.”

¹³Vano aasusa wa yaawo, anahokoleela munikulani analapuwela okhopela.

¹⁴Oohusera yaattiwala okuxa ipaawu, ehikhanle epaawu emoha yaarinaaya munikulani.

¹⁵Yeesu aawooperera oohusera eeraka: “Mukhale oowiisuwela, ni mwiipasoope wa eferementu ya aFarisi* ni ya atthu a Herodi.”

¹⁶Awo yaaheerelana yaaworu: “Ti niwoko na ohikhalanawahu epaawu?”

¹⁷Asuwelaka wuulumawaya, Yeesu aahaakoha: “Heeni munuulumaanyu mwaha wa ohikhalanawanyu epaawu? Nlelo khamuniiwexexa, naari khamunsuwela? Mirimasanyu siri soowuuma?

¹⁸Nyuwo mookhalano maitho, vano khamunoona? Mookhalano maaru, vano khamuniiwa? Khamunuupuwelela?

¹⁹Kaameiyanyinghaaka ipaawu ithanu wa atthu macira miloko mithanu, mipapara mihayi saasareiye mivithe mwaathukumanyinghaanyu?” Awo yaamwaakhula: “muloko ni miili.”

²⁰“Kaameiyanyinghaaka ipaawu ithannapiili wa atthu macira miloko mixexe, mipapara mihayi saasareiye mivithe mwaathukumanyinghaanyu?” Awo yaamwaakhula: “Mithannamiili.”

²¹Owo aaweerela: “Nlelo khamuniiwexexa?”

²²Awo yaarowa oBetisayida, ni atthu akina yaamuruuhela Yeesu mutthu oohoona, emdyoonttelelaka weera amutave.

²³Owo aavara ntata na mutthu oohoona ni aamukhumihera vaate wa mmuttettheni. Amusenyelakaru mmaithoni mwa mulopwana ni amwiikaatherakaru matata, Yeesu aamukoha: “Nyuwo munimoona etthu?”

²⁴Aahula maitho ni aamwaakhula: “Kingwoona atthu; awo anlikana ntoko nyiri seettaka.”

²⁵Yeesu aamwiikaatheratho matata mmaithoni mwa mulopwana. Vano maithwaawe yaahuliwa ni ohoonawawe waalamihiwa, ni owo aahoona sootheene nnenesene.

²⁶Yeesu aamurumiha owaani eeraka: “Muhivolowe mmuttettheni.”

²⁷Yeesu ni oohuseraawe yaarowa wa mittetthe soowaattamela sa oSesareya-Filipe. Yeettaka, Owo aahaakoha: “Atthu ankeera Miyo taani?”

²⁸Awo yaamwaakhula: “Akina aneera Yohaane mpatisa, akina Eliya, ni akinatho mprofeeti mmoha.”

²⁹Vano Yeesu aahaakoha: “Ankha nyuwo? Munkeera Miyo taani?” Pedru aamwaakhula: “Nyuwo ti Kristu.”

³⁰Yeesu aawooperera weera ehaaleele akina mwaha wa Yoowo.

³¹Owo aapacera waaxuttiha weera waatthuneya Mwaana a mutthu ohaawa ni itthu sincipale, okhoottiwa ni asitokweene, ahooleli a asaserdoti* ni anamawera a nlamulo*, okhwa, ni ovenyerera nihuku nanaararu.

³²Owo aahuuluma nnenesene mwaha wa yeeyo. Vano Pedru, amwiitthanaka okhwipi, aapacera omooperera.

³³Wa soothesene, Yeesu aarukunuwa, aahaaweha oohuseraawe ni aamuhiiha Pedru, eeraka: “Osuseke wa Miyo, Satana! Weyo khoonuupuwela itthu sa Muluku, mene sa atthu.”

³⁴Vano aawiitthana atthu ancipale vamoha ni oohusera ni aaweerela: “Akhala mukina ontthuna okitthara Miyo, iikhootte muneenaawe, akuxe muttandaawe ni akitthare.

³⁵Vanonto, yoowo ontthuna ovuluxa okumaawe, anaayeleele, mene yoowo ongyeleela okumi niwoko na Miyo ni na masu ooreeraxa, anaavuluxe yoowo.

³⁶yooreera heeni mutthu owina elapo yootheene, ayeleelakatho okumaawe?

³⁷Hoye hoye mutthu anaavahe eheeni yoowaakakhanyiha ni okumaawe?

³⁸Akhala mukina variyari wa ekhapira yooraruwa ni yoottheka ela onuuliwa muru niwoko na Miyo, naari na maswaaka, Mwaana a mutthu anuuliwetho muru wa yoowo aawaaka vamoha ni andyelowaawe ootteela moovuwani mwa Atithawe.”