Read Makhuwa-Shirima Marku 9 Bible Online

Marku 9 - Makhuwa-Shirima bible

Marku 9

¹Vano Yeesu aapwaherera eeraka: “Miyo kinoororomelihani weera akina ari va, kheerwa ekhwa hata vakhaani, ehinaaye woona omwene wa Muluku owaaka ni ikuru.”

²Amalihaka mahuku mathannamosa, Yeesu aamurowano Pedru, Yakobe ni Yohaane, ni aahaarongha vamwaako woorakamela, weiwo yaakhanlaaya yaawo paahi. Vale Owo aatatuxiwa ohoolowaya.

³Ikuwosawe saathatuwa sootteelaxa moota wooweera khawoworu namakattha eera awere otteeliha.

⁴Yaahiixoonihera ohoolowaya Moisesi ni Eliya, wa yaawo yaatthekula ni Yeesu.

⁵Vano Pedru aamweerela Yeesu: “Muhusiha, ti wooreera okhala vaava hiyo. Nrowe nipake mikottha miraru: mmoha wa Nyuwo, mukina wa Moisesi ni mukina wa Eliya.”

⁶Owo khaasuwenle yeeyo yaatthuneya weera, niwoko yaahoova.

⁷Vahoolowaya naahoowa nihutte nimoha ni naahaakhuneela. Wa nenne, naakhuma nsu nimoha neeraka: “Ola ti Mwanaka oosiveleya. Mmwiiwe Yoowo.”

⁸Wootutuxereya, ewehakaru mukhwipi, khayaamoonnetho mukina, ahikhanle Yeesu.

⁹Ekhuruwaka vamwaako, Yeesu aawooperera weera ehaaleele akina yeeyo yoonnaaya, mpaka ehuhuweene yeeyo Mwaana a mutthu aneeraawe avenyerere mookhwaani.

¹⁰Awo yaavitha mwaha ole yaaleru, evaanyihanaka entaphulela eheeni “ovenyerera mookhwaani.”

¹¹Awo yaamukoha: “Heeni anamawera a nlamulo* aneeraaya weera ontthuneya toko Eliya orwa?”

¹²Yeesu aawaakhula: “Mwa yeeyo, Eliya onimoowa toko ni onooreherera itthu sootheene. Vano, heeni elempwalaaya weera ontthuneya Mwaana a mutthu ohaawa vancipale ni okhoottiwa?

¹³Mene Miyo kinooleelani: Eliya ohoowa, ni awo yaampakela yoowo sootheene seiyo yaatthunaaya, ntoko elempwalaaya mwaha wa yoowo.”

¹⁴Yaaphiyalaaya weiwo yaaraayawo oohusera akina, yaawoona atthu ancipalexa yaarukureenreene ni anamawera a nlamulo* evaanyihanaka ni yaawo.

¹⁵Emoonakaru Yeesu, atthu ancipale yaatikhina ni yaamutthimakela weera yamuulumihe.

¹⁶Yeesu aahaakoha: “Eheeni mumvaanyihanaanyu?”

¹⁷Mulopwana mmoha eriyari ya atthu ancipale aamwaakhula: “Muhusiha, kihoowiiherani mwanaka orino munepa onimuhiiha wuuluma.

¹⁸Imaara sootheene munepa onimvaraaya, onoomvonyera vathi. Owo onnakhuma nimpheru mmwaano, onnakhuuriha maino, ni erutthwaawe ennakhala yoowuuma. Kohaavekela oohuseraanyu weera yoomole munepa, mene yaahooceela.”

¹⁹Yeesu aawaakhula: “Ekhapira yoohiroromela! Ihuhu ihayi kineeraaka kikhale ni nyuwo? Mpaka yaakhani kineeraaka koovileleni? Mukiwiihere mmiravo.”

²⁰Vano awo yaangwiihera. Omoonakaru munepa Yeesu, woowaakuveya waamuthukumeliha mwaana. Mwaana ole aamorela vathi ni aapacera wuupuruwa, akhumihaka nimpheru mmwaano.

²¹Yeesu aahaakoha atithawe mwaana: “Opacenre yaakhani eeraka hiiha?” Awo yaamwaakhula: “Opacenre areene mwaana.

²²Imaara sincipale munepa wannamvonyera mmooroni ni mmaahini weera omwiive. Mwawera opaka etthu, munimorele ikharari ni munikhavihere.”

²³“Mwawera?” Yeesu aamweerela. “Sootheene singwereya wa yoowo onroromela.”

²⁴Woowaakuveya atithawe mwaana yaakhuwela: “Koororomela, mukikhavihere owina ohiroromelawaka.”

²⁵Yeesu awoonaka atthu ancipale ekhuveelaka, aahiiha munepa woonanara, eeraka: “Munepa woohuuluma ni woohiiwa, Miyo kinoolamula weera okhume wa yoowo, ni ohimvolowetho mwaana ola.”

²⁶Munepa waakhuwela, onamutatha, onavenya. Mwaana aakhala ntoko muttembo, moota wooweera atthu ancipale yaaheera: “Ohookhwa.”

²⁷Yeesutho aamvara ntata, anamvenxa, ni owo aneemela.

²⁸Yeesu avolowaka mpaani, oohuseraawe yaamukoha wiiphiini: “Heeni nihiwenraahu woomola?”

²⁹Yeesu aawaakhula: “Moota ola omvenya paahi ni ovekela.”

³⁰Awo yaavenya nipuro nne ni yaaheetteetta oGalileiya. Yeesu khaatthuna weera akina ehikhale oosuwela weiwo yaaraayawo,

³¹niwoko eera aahusihaka oohuseraawe. Vano aaweerela: “Mwaana a mutthu anaavahereriwe mmatatani mwa atthu. Awo eniimwiive, ni akhwiyeene mahuku mararu, anaavenyerere.”

³²Mene awosa khayiiwexenxe yeeyo aatthunaawe ohima, ni yaamuhovela omukoha.

³³Yaaphiya oKafaranawu. Areene owaani, aahaakoha: “Eheeni mwaavaanyihanaanyu mphironi?”

³⁴Mene awosa yaamaala, niwoko mphironi yaavaanyihana mwaha wa mutokweene taani?

³⁵Aakilaanthaawe, Yeesu aawiitthana muloko neeli aweerelaka: “Akhala mukina ontthuna okhala oopacera, akhaleke oomalihera, ni murumeiyi a atthu ootheene.”

³⁶Vano, amukuxaka mwaana, aamweemexa eriyaraaya. Amukhubaaraka, aaweerela:

³⁷“Yoowo ommwaakhela mwaana mmoha ntoko ola mwa Nsinanaka, onkaakhela Miyo. Ni yoowo onkaakhela Miyo, khankaakhela Miyo, mene Yaale akiruminghe.”

³⁸Yohaane aamweerela Yeesu: “Muhusiha, naamoona mutthu oomolaka minepa soonanara mwa Nsinananyu. Naaheerera omooceeliha, niwoko owo khahiyono awihu.”

³⁹Yeesu aamweerela: “Muhimooceelihe. Khaawo ompaka yootikhiniha mwa Nsinanaka, ongwera okuulumela vahoolo vakhaani.

⁴⁰Vano, yoowo ohiittanne ni hiyo, onoonikhalela hiyo.

⁴¹Miyo kinooleelani ekhaikhai: yoowo onoovahani ekoomixi emoha ya maahi mwa Nsinanaka niwoko muri aKristu, vekhaikhai kharwa ayeleela ntthuvelonawe.

⁴²Akhala mukina onimutthekiha mmoha a asikhaani ala ankiroromela Miyo, waari fataari ovonyeriwa mphareiyani ni nluku ntokotoko ntthukeleliweene vaxiko.

⁴³Ntatananyu nootthekihani, mukwituleke. Fataari ovolowa mookumini oorakaleene, ohikhanle mureeneno matata meeli orowa mmooroni, weiwo mooro ohimmalaaya.

⁴⁴

⁴⁵Nnaawonanyu nootthekihani, mukwitule. Fataari ovolowa mookumini oorakaleene, ohikhanle mureeneno inaawo piili ovonyeriwa mmooroni.

⁴⁶

⁴⁷Niithonanyu nootthekihani, muzoole. Fataari ovolowa moomweneni wa Muluku ni niitho nimoha paahi, ohikhanle mureeneno maitho meeli, ovonyeriwa mmooroni,

⁴⁸weiwo nyuungusaya sihinkhwaayawo ni mooro ohinciphaayawo.

⁴⁹Ootheene eniyeeleeliwe ni mooro.

⁵⁰Maakha ti ooreera. Osivawayatho wamala, eniyeeleeliwe hai maakha ale? Mukhalane maakha mwa nyuwo muneenaanyu, ni mukhale ni murettele mukina ni mukhwaawe.”