Read Makhuwa-Shirima Luuka 1 Bible Online

Luuka 1 - Makhuwa-Shirima bible

Luuka 1

¹Ancipale yaaheerera olepa nyaha sa sookhumelela sookwaniheriwa variyariwahu,

²ntoko nileeliwaahu ni yaale yaari anamoona ni arumeiyi a masu okhuma ompacereroni.

³Miyotho muneenaaka koowehaweha nnenesene sootheene okhuma ompacereroni, ni kohuupuwela, Teyofilu oottittimiheyaxa, weera koolepeleni sootheene sookawanyeiya nnene,

⁴weera nyuwo musuwele nnenesene ekhaikhai ya itthu mwaaxuttihiwaanyu.

⁵Mweehuhuni ya Herodi, mwene a oYudeiya, aakhala musaserdoti* iitthaniwa Zakariya, aari mmoha a mpatta wa asaserdoti* a Abiya. Amwaariyetho, Elisabeti, yaari a ekhapira ya Aharoni.

⁶Ooweeli yaari oororomeleya vamaithoni wa Muluku, yiiwelelaka nnenesene malamulo ootheene ni soolamulela sootheene sa Apwiya.

⁷Awo khayaarino anamwane, niwoko Elisabeti khaayara, nitho ooweeli yaahuuluvala.

⁸Nihuku nimoha, ereene emaara ya mpatta wa Zakariya, owo eera arumeelaka ntoko musaserdoti* vamaithoni wa Muluku.

⁹Aapakiwa mwaathanle, ntoko ekhovelelo ya asaserdoti* weera avolowe Mpaani mwa Apwiya ni ahisere mwiixi woowunkhelaxa.

¹⁰Ephiyaka ehuhu yoohisera mwiixi woowunkhelaxa, atthu a muloko wootheene yeera evekelaka vaate.

¹¹Vano aahiixoonihera wa yoowo ndyelo a Apwiya, eemenleene moono mulopwana wa altaari* a erubani*.

¹²Zakariya amoonakaru, aatuthuwa ni aahoova.

¹³Ndyelotho aamweerela: “Muhoove Zakariya, nivekelonanyu nohiiwiwa. Amwaarinyu Elisabeti animooyarelani mwaana mulopwana, ni muntthuneya omutteha nsinanawe Yohaane.

¹⁴Owo anaakhale otteeliwa murimaanyu ni ohakalalawanyu, ni ancipale eniitteeliwe niwoko na oyariwawawe.

¹⁵Vano, anaakhale mutokweene vamaithoni wa Apwiya. Owo kharwa awura eviinyu, hoye hoye yoowura ekina. Anaakhale oosareya ni Munepa Wootteela okhuma ohinaaye oyariwawawe.

¹⁶Niwoko na yoowo, atthu ancipale a muloko wa aYixrayeli eniihokoleele wa Apwiya Mulukwaaya.

¹⁷Anaahoole Apwiya mmunepani ni mukuruni sa Eliya. Anaahokoloxe mirima sa asitiithi wa asinamwanaaya, ni mirima sa oohiiwelela wa miruku sa atthu a ekhaikhai. Owo anaahiyere Apwiya muloko wooreherereiya.”

¹⁸Zakariya aamukoha ndyelo: “Nkisuwele hai yeeyo? Miyo ni amwaaraka nohuuluvala.”

¹⁹Ndyelo aamwaakhula: “Miyo Gabriyeli, kinkhala ohoolo wa Muluku mahuku ootheene. Koorumihiwa weera kooleeleni ni koovaheeni masu ooreera ala.

²⁰Vano, nyuwo mmwikhale oohuuluma. Khamunrowa owera wuuluma mpaka nihuku nenenenno eneeraaya ekhumelele yeeyo, niwoko khamwaakhulenle maswaaka, eneera ekwaniheriwe ehuhu yeeyo entthuneya.”

²¹Yeereiyaka yeeyo, muloko wa atthu waangweherera Zakariya, otikhinaka mwaha wa opisawawe Mpaani mwa Muluku.

²²Akhumaka, khaawera wuuluma. Awo yaasuwela weera owo aakhenle eyoonihero Mpaani mwa Muluku. Owo aawoonihera ni ineneero, mene aari oohuuluma.

²³Amalihaka ehuhuwaawe ya muteko, aahokoleela owaani.

²⁴Vahoolowaya amwaariye, Elisabeti, yaarupala, ni sikwanaka nyeeri mithanu, yaahiipitha.

²⁵Owo aaheera: “Apwiya aakipakela yeeyo. Wa mahuku ala Awo aakiweha miyo ni aamaliha wuulihiwawaka muru vamaithoni wa atthu.”

²⁶Wa mweeri wanaathannamosa Muluku aamurumiha ndyelo Gabriyeli oNasarete, esidada ya oGalileiya.

²⁷Aarowa wa mwaamwali oowiikosoopa aatthomeriwe ni mulopwana iitthaniwa Yoseefe, aari a ekhapira ya Davide. Nsina na mwaamwali oowiikosoopa naari Mariya.

²⁸Ndyelo, amukhuveelaka yoowo, aamweerela: “Muhakalale nyuwo mwaakhenle mahala matokotoko! Apwiya ari ni nyuwo!”

²⁹Mariya aatuthuwa niwoko na masu ale, uupuwelaka weera entaphulela eheeni esalaama ela.

³⁰Vano ndyelo aamweerela: “Muhoove Mariya, niwoko Muluku oowooniherani mahala matokotoko.

³¹Nyuwo munoorupala ni munoomuyara Mwaana Mulopwana, ni munoomutteha Nsinanawe Yeesu.

³²Owo anaakhale Mutokweene, ni aniitthaniwe Mwaana a Musulusulu. Apwiya Muluku eniimvahe ehice ya atithawe Davide.

³³Owo anaalamule empa ya Yakobe mahuku ootheene. Olamulawawe onuukhale woohimala.”

³⁴Mariya aamukoha ndyelo: “Eniikhumelele hai yeeyo, woonaka weera miyo nkinatoko okonano mulopwana?”

³⁵Ndyelo aamwaakhula: “Munepa Wootteela onimoorweelani ni ikuru sa Musulusulu nsookhuneeleni ni erungwaawe. Hiiho, Yoole Ootteela anaayariwe, aniitthaniwe Mwaana a Muluku.

³⁶Mmusaanyu Elisabeti anaamuyaretho mwaana mulopwana ngwuuluvalani. Yoole akina ammweerelaaya weera ole khangyara, ori ni mweeri wanaathannamosa.

³⁷Kheewowo eri yoohiwereya wa Muluku.”

³⁸Mariya aamwaakhula: “Miyo murumeiyi a Apwiya. Ekikhumelele miyo ntoko wuulumawanyu.” Vano ndyelo aamuhiya.

³⁹Mahukweene yaale, Mariya aahiireherera ni aarowa woowaakuveya wa esidade emoha yaari mweelaponi ya nyaako sa oYudeiya,

⁴⁰weiwo aavolongwaawe mpaani mwa Zakariya ni aamuulumiha Elisabeti.

⁴¹Iiwaka Elisabeti esalaama ya Mariya, mwaana aattikinyeiya mmirimani mwa yoowo, ni Elisabeti aasareya ni Munepa Wootteela.

⁴²Vano owo aakhuwela ni nsu ntokotoko: “Ooreelihiwa ti nyuwo variyari wa athiyana, ni ooreelihiwa ti Mwaana nyuwo muneeraanyu mungyare.

⁴³Heeni miyo kooniheriwaaka mahala matokotoko ala weera mpaka amayaya Apwiyaaka aakixekura?

⁴⁴Kiiwakaru esalaamaanyu, mwaana ori mmirimanimwaka oottikinyeiya ni ohakalala.

⁴⁵Ooreelihiwa ti yoole ororomenle weera eniikwaniheriwe yeeyo Apwiya yaamuleenlaaya.”

⁴⁶Vano Mariya aaheera: “Okumaaka ongwunnuwiha Apwiya.

⁴⁷Munepaaka onghakalala mwa Muluku, Mvuluxaaka.

⁴⁸Owo ohoona wiiyeviha wa murumeiyaawe. Okhuma vaanaano vaava mpaka ohoolo ikhapira sootheene nsikiitthane ooreelihiwa,

⁴⁹niwoko Muluku a ikuru sootheene ookipakela miyo itthu sitokotoko. Nsinanawe ti nootteela.

⁵⁰Ikhararisawe simphiyera ikhapira sootheene sa yaawo ammoova.

⁵¹Owo aapaka itthu sa ikuruxa ni moonowaawe. Aahaamwaramwaxa yaawo ari oowiixoona mmirimanimwaya.

⁵²Aahaakuruxa mamwene muhicenimwaya, mene aahaaweliha oowiiyeviha.

⁵³Aahaavoniha ni itthu sooreera yaawo yaavoliwe etala, aawoomolatho anamapuha ni matata oohikhalano etthu.

⁵⁴Owo aamukhavihera murumeiyaawe Yixrayeli, uupuwelelaka ommorela ikharari

⁵⁵Abrahaamu ni ikhapirasawe mahuku ootheene ntoko aaweerenlaawe makholowaahu.”

⁵⁶Mariya aakhala ni Elisabeti saattamelaka nyeeri miraru, ni vahoolowaya aahokoleela owaani.

⁵⁷Ephiyaka ehuhu ya oyara wa Elisabeti, aamuyara mwaana mulopwana.

⁵⁸Atthu aattamannaaweno ni amusaawe yaahiiwa suulummwaka sa ikharari sitokotoko Apwiya yaamoonihenraaya, ni yaamuhakalalela yoowo.

⁵⁹Wa nihuku nanaathannaararu yaarowa weera yamwiinele mwaana, ni yaatthuna omutteha nsina na atithawe, Zakariya.

⁶⁰Amayawetho yaahaakhula: “Hoye! Owo aniitthaniwe Yohaane.”

⁶¹Awo yaamweerela: “Khawowo naari mmusaanyu mmoha orino nsina nna.”

⁶²Vano yaawoonihera ni ineneero atithawe mwaana weera esuwele nsina heeni yaatthunaaya weera attehiwe.

⁶³Owo aavekela etthaabwa ekhaaneene, ni aatikhinihaka ootheene, aalepa: “Nsinanawe Yohaane.”

⁶⁴Woowaakuveya eyanowaawe yaahuleiya, ni nlumi naataphuwa, anapacera wuuluma, amuttottopelaka Muluku.

⁶⁵Aattamannaaweno ootheene yaasareya ni woova, ni mweelaponi yootheene ya nyaako sa oYudeiya suulummwa sa seiyo.

⁶⁶Ootheene yiiwa yeeyo yannakoha: “Anaakhale taani mwaana ola?” Vano Apwiya yaari ni yoowo.

⁶⁷Atithawe, Zakariya, yaasareya ni Munepa Wootteela ni yaathaliha otthuna wa Muluku yeeraka:

⁶⁸“Oottottopeliwa ekhale Apwiya, Muluku a aYixrayeli, niwoko yaaxekura ni yaavuluxa muloko wa atthwaaya.

⁶⁹Awo aaniwerela hiyo ovuluxiwa otokotoko mwa muloko wa murimeiyaaya Davide,

⁷⁰ntoko yuulumaaya ni maprofeeti ootteela a khalayi:

⁷¹ovuluxiwa wa amwiittanaahu ni mmatatani a ootheene yaawo annithanya,

⁷²weera ewoonihere ikhararisawe makholowaahu ni yuupuwelele wiiraanawaya wootteela,

⁷³eyo tiiyo olipela yaalipenlaaya atithihu Abrahaamu:

⁷⁴Aanivuluxa mmatatani a amwiittanaahu weera hiyo naarumeele Apwiya nihoovaka,

⁷⁵neettaka mootteelani ni mweekhaikhaiyini vamaithoniwaya mahukwaahu ootheene.

⁷⁶Ni weyo, mmiravo, ngwiitthaniwe mprofeeti a Musulusulu niwoko onuurowe ohoolo wa Apwiya weera waarehererele Yaawo ephiro,

⁷⁷nitho weera evahe muloko wa atthwaaya esuwelo ya ovuluxiwa ongwa niwoko na elevelelo ya sootthekasaya.

⁷⁸Elevelelo ele ti niwoko na omoreliwa ikharari sa Mulukwaahu. Owo anaanixekure wa osulu ntoko nsuwa nikhumaka

⁷⁹weera aamwaleele yaale ari mpiphini ni mmunttuusini wa okhwa, ni weera aneettihe mphironi ya murettele.”

⁸⁰Vano, mmiravo annunnuwa ni annalipa mmunepani. Aakhala munikareni mpaka ehuhu eeraawe iixoonihere wa aYixrayeli.