Read Makhuwa-Shirima Luuka 12 Bible Online

Luuka 12 - Makhuwa-Shirima bible

Luuka 12

¹Ehuhuweene yeele, ethukumanneene atthu ancipale moota wooweera yaapacera okwattulana mukina ni mukhwaawe, Yeesu aapacera wuuluma toko ni oohuseraawe eeraka: “Mwiipasoope ni eferementu ya aFarisi* eyo tiiyo yoowiixeera.

²Itthu sootheene siri wiiphini, nsooneleliwe, nitho itthu sootheene soovithiwa, nsisuwelihiwe.

³Yeeyo muhimmaanyu mpiphini, eniyiiwiwe othana, ni seiyo nyuwo mwaapiyaanyu mpaani, nsilaleiwe vanipathoni.

⁴Miyo kinooleelani, asinthamwenaaka, muhiwoove yaawo aniiva erutthu ni vahoolowaya kheewo angweraaya.

⁵Vano Miyo kinoowooniherani taani ontthuneya omoova. Mmoove Yoole oneera iiva erutthu, onooweratho ovonyera mmooroni. Aani, Miyo kinooleelani: mmooveke Yoowo.

⁶Khaanthumihiwa masiri mathanu wa makhoobiri meeli? Wa soothesene, khaniwowo naari nimoha a yaale ninttiwaliwa ni Muluku.

⁷Mpaka mayihi ootheene a mmurumwanyu ari oowaalikeliwa. Muhoove, nyuwo mootthuneyaxa opwaha masiri mancipale.

⁸Miyo kinooleelani: ootheene onkilapa vamaithoni wa atthu, Mwaana a mutthutho anaamuromole vamaithoni wa andyelo a Muluku.

⁹Vaheera yoole onkikhootta vamaithoni wa atthu, anaakhoottiwe vamaithoni wa andyelo a Muluku.

¹⁰Yoole ommuulumela Mwaana a mutthu, anaaleveleliwe, mene yoole omveiha Munepa Wootteela, kharwa aleveleliwa.

¹¹Mwaaronghiwaka muSinagogani* ni ohoolo wa asitokweene ni atthu anlamula, muheeteteiye ni moota heeni muneeraanyu mwiixaakihe, hoye hoye mweere,

¹²niwoko ehuhuweene yeeyo Munepa Wootteela oniwooxuttiheni yeeyo entthuneya weera muhime.”

¹³Mukina a atthu ancipale aamweerela: “Muhusiha, munleele munnaka weera akikawele yoohiyeriwa*.”

¹⁴Yeesu aamwaakhula: “Mulopwana, taani okithanlale okhala Mphukaanyu, hoye hoye Namakawaanyu?”

¹⁵Vano aaweerela: “Mwiipasoope! Musembe wakhalaru moota wa wiinlela mihakhu, niwoko okumi wa mutthu ti woopwahaxa sooreelasawe.”

¹⁶Aahaathalihera yoolikanyiha ela: “Ematta ya namapuha mmoha yaaruwera vancipale.

¹⁷Owo aahuupuwela muneenaawe: ‘Keereke hai? Nkinono woothokorora soohephasaka.’

¹⁸Vano aaheera: ‘Koosuwela kineeraaka kipake. Kinrowa okankhanyula matathaaka ni oteka makina matokweene, ni mmo kinoothokorora etriguwaaka ni sooreelasaka.

¹⁹Miyo nkiixeerele: ‘Nyuwo mookhalano sooreela sincipale soothokororiwa wa iyaakha sincipale. Mwiitthuuwe, muce, ngwure ni muhakalale.’

²⁰Wa sootheene, Muluku aamweerela: ‘Mulolo! Ohiyuweene yoola munimookhwa. Vano, anaahalane taani ni yeeyo mureherenraanyu?’

²¹Hiihaawo onimweereiya ni yoole onthokorora mihakhusawe, mene vamaithoni wa Muluku khahiyono namapuha a mmunepani.”

²²Vano Yeesu aaweerela oohuseraawe: “Tivawo Miyo kinooleelani: muhiixeeteteele ni okumaanyu, mwa yeeyo muneeraanyu muce, hata ni erutthwaanyu yoowaraanyu.

²³Okumi ori wootthuneyaxa opwaha yooca, ni erutthu yoopwaha soowara.

²⁴Mwaawehe anakhuku — awo khaanaala, hata khaanghepha; khaanono empa yoothokorora itthu, hata matatha. Wa soothesene, Muluku onnaaciha. Nyuwo mootepa otthuneyaxa waapwaha apalame!

²⁵Taani a nyuwo ongwera waandyeerera okumaawe ni ewoora emoha niwoko na weeteteiya?

²⁶Woonaka weera khamungwera opaka etthu ekhaaneene ela, heeni muneeteteelaanyu itthu sootheene sikina?

²⁷Ngwehe moota heeni sinunnuwaaya ithutu: iyo khasimvara muteko, hata khasintthava. Wa sootheene, Miyo kinooleelani weera, hata Salomoni moovuwanimwawe wootheene, khaawanre ntoko emoha ya seiyo.

²⁸Muluku awariha hiiho malaxi a ntuphini olelo ariwo, omaalotho anoovonyeriwa mmooroni, wootepaxa anoowariheni nyuwo, atthu a nroromelo vakhaani?

²⁹Muhaasaase eheeni muneeraanyu muce, hoye hoye ngwure. Muhiixeeteteele ni yeeyo.

³⁰Vano, ti amalapo antthara itthusene seiya. Atiithitho ansuwela weera nyuwo muntthuna seiya.

³¹Ohiyanawaya, mwaasaase omwene wa Muluku, ni itthu seiya mmwaandyeerereliwe.

³²Muhoove, muhuwo mukhaaneene, niwoko waahaasiveliha Atiithi woovahani omwene.

³³Muthumihe murinaanyu ni mvahe samahala. Mwiipakele mahottha ahinrowa othaala yaaviraka ehuhu, aani muhakhu woohimala wiirimu, weiwo khaawo namwiiya onkhuveela, hata tthumpwiha ohintthumpwihaawemo.

³⁴Vano, onkhalaayawo muhakhwaanyu, weiwotho onuukhale murimaanyu.

³⁵Mukhale oolikaneene weera murumeele ni onyaaraanyu opwaherere ovarela,

³⁶ntoko onyaari wa yaale anaaweherera apwiyaaya ohokolowa ofestani ya othelana, weera yaaphiyakaru ni yamana nsele, awo ewere ohula woowaakuveya.

³⁷Ooreelihiwa ti arumeiyi awo apwiyaaya yaaphiyakaru eneeraaya yaaphwanye elipelelaka. Miyo kinoororomelihani weera apwiya ale eniiwarele yoorumeela, eniyaakilaathihe vameesa ni eniyaarumeele.

³⁸Hata awo ephiye ohiyu eriyari, hoye hoye oyaaka ni oxa, ooreelihiwa ti yaale Apwiya eneeraaya yaaphwanye yiireherenreene.

³⁹Tivawo, mwiiwexexe yeeyo: Muneene a empa aasuwenle ewoora heeni aneeraawe aphiye namwiiya, khaatthunihera weera yiiyiwe empa.

⁴⁰Nyuwotho mwiireherere, niwoko Mwaana a mutthu onimoowa ehuhu yoohiweherereya.”

⁴¹Pedru aahaakoha: “Apwiya, munnithalihera yoolikanyiha ela hiyo, hoye hoye wa atthu ootheene?”

⁴²Apwiya yaamwaakhula: “Vanonto, murumeiyi taani oororomeleya ni a miruku, Apwiya amukhalinghaaya muhooleli a arumeiyi weera aavahe yoocaaya wa ehuhu yootthuneya?

⁴³Ooreelihiwa ti murumeiyi mwa yoowo Apwiyaawe yaaphiyaka, eneeraaya emphwanye apakaka hiiho.

⁴⁴Miyo kinoororomelihani weera awo eniimukhalihe mutokweene a sooreelasaya sootheene.

⁴⁵Noone hatho weera murumeiyi owo oniixeerela muneenaawe: ‘Apwiyaaka anoopisa ohokolowa.’ Vano, onoopacera waamana arumeiyi alopwana ni arumeiyi athiyana, acaaka, awuraka ni ahapaliwaka.

⁴⁶Apwiya a murumeiyi owo animoowa ehuhu ohinaawehereraawe nitho ohisuwenlaawe. Awo eniimuthikile eriyariru ni eniimwiikaathi vanipuroni na atthu oohiroromeleya.

⁴⁷Murumeiyi owo onsuwela otthuna wa apwiyaawe ni ahinareherera, hata ahinapaka yeeyo antthunaaya, onoowaxuliwa moota woowoopiha.

⁴⁸Yooletho ohisuwenle otthunawaya ni ompaka itthu soophwanela ottaruxeliwa, anaawaxuliwe vakhaani. Mwa yoowo ovahiwe sincipale, anaanyesereriwe sincipale, ni mwa yoowo ovahereriwe sincipale, anaavekeliwe soopwahaxa.

⁴⁹Kirweenle oruuha mooro mweelaponimu, ni hapo kaatthunaxa weera mooro owo opattihiwe!

⁵⁰Ontthuneyatho weera kipatisiwe, ni moota kihooxiwaaka murimaaka mpaka owo oneeraaya okwaniheriwe!

⁵¹Nyuwo munuupuwela weera kirweenle oruuha murettele mweelaponimu? Miyo kinooleelani: Hoye! Ohiyanawaya, kirweenle oruuha ohiiwanana.

⁵²Okhuma vaanaano vaava mpaka ohoolo eniikhale amusi athanu oohiiwanana mukina ni mukhwaawe: araru yiinanaka ni eeli, ni eeli yiinanaka ni araru.

⁵³Eniikhale oohiiwanana atiithi ni mwaana mulopwana ni mwaana owo ni atithawe; amaayi ni mwaana muthiyana ni mwaana owo ni amayawe; pwiyamwaana ni mwaara a mwanawe ni mwaara owo ni pwiyamwaanaawe.”

⁵⁴Owo aaweerela atthu ancipale: “Nyuwo moonaka nihutte nikhumaka ninkela nsuwa, muneera woowaakuveya: ‘Enoorupa!’ ni hiihaawo enimweereya.

⁵⁵Yoopaka epheyo ya ohitto, muneera: ‘onoovihaxa’ ni hiihaawo onimweereya.

⁵⁶Anamwiixeera! Moosuwela otaphulela mikhalelo sa elapo ni sa wiirimu. Muhinsuwela hai otaphulela ehuhu ya vaanaano?

⁵⁷Niwoko heeni muhinthorihaanyu muneenaanyu yeeyo eri ya ekhaikhai?

⁵⁸Mukina a nyuwo, aarowaka ni mwiittanaawe wa mulipa oowuuluma milattu, mweerere weera mwiiraane ni yoowo mphironi weera owo ahoorongheni wa mphuki, ni mphuki ahiwinnyerereni wa mpilixa, ni mpilixa ahoovonyereni okaliposo.

⁵⁹Miyo kinooleelani weera khamunrowa okhuma muhinaaye oliva nikhoobiri noomalihera.”