Read Makhuwa-Shirima Luuka 14 Bible Online

Luuka 14 - Makhuwa-Shirima bible

Luuka 14

¹eSaabadu emoha, woovolowani mpaani mwa muFarisi* oottittimiheya weera ace, ootheene yannangwehexexa.

²Ohoolowawe aakhala mulopwana mmoha oovoreiwa epuulu.

³Yeesu aahaakoha aFarisi* ni anamawera a nlamulo*: “Onootthuniheya olamiha eSaabadu, naari hoye?”

⁴Mene awosa yaamaala. Hiiho Yeesu aamukuxa mulopwana, anamulamiha, anamweerela oroweke.

⁵Vano Yeesu aahaakoha: “Mmoha a nyuwo akhalano mwaana, hoye hoye emombe, ni eyo yamorela muhimeni nihuku na eSaabadu, owo khanrowa oruula woowaakuveya?”

⁶Ni awo khayaawenre waakhula etthu.

⁷Oonaka moota heeni yaalattuliwe yaathanlaaya ihice soopacera vameesa, Yeesu aahaathalihera yoolikanyiha ela:

⁸“Mukina oolattulani ofestani ya othelana, muhikilaathi nipuro noottittimiheyaxa, niwoko apaale oolattuliwa mukina oottittimiheyaxa woopwahani nyuwo.

⁹Wakhala hiiho, yoowo oolattunleni nyuwo eeli, anaawe ni aweereleni: ‘Mwaavirihe awo.’ Vano, muyevihiweene, onootthuneya weera nyuwo mukilaathi nipuro nanaaveeli.

¹⁰Nyuwotho mwalattuliwa, mukilaathi vanipuroni nanaaveeli weera awa yoole oolattunleni, owo anaaweereleni: ‘Nthamwene, mukilaathiki vanipuroni noottittimiheyaxa.’ Vano nyuwo munoottittimiheya vamaithoni wa atthu ootheene oolattuliwa.

¹¹Ootheene aniivuwiha, eniikhale ooyevihiwa, ni ootheene aniiyeviha, eniikhale oovuwihiwa.”

¹²Vano Yeesu aamweerela yoowo aamulattunle: “Nyuwo mwaarehereraka efesta, hoye hoye yooca ya oxekuwa, muhaalattule asinthamwenaanyu, axunninyu, hoye hoye asinaangolo, hata asikhwiinyu anamapuha. Mwaalattula, awotho emaaraaya anoowera woolattulani, ni hiiho mmwitthuveliwe.

¹³Mwaarehereraka yooca ya efesta, mwaalattule oohaawa, oorakala, ootuthunya ni oohoona.

¹⁴Nyuwo mmwikhale ooreelihiwa, niwoko awo khaanono moota woowootthuvelani. Ntthuvelonanyu nniwe moovenyererani wa oowaakhuleliwa ni Muluku.”

¹⁵Iiwaka yeeyo, mmoha a yaawo yaari vameesa vamoha ni Yeesu, aamweerela: “Ooreelihiwa yoole aneera ace yooca moomweneni wa Muluku.”

¹⁶Yeesu aamwaakhula: “Mutthu mmoha aareherera yooca ya efesta etokotoko, ni aahaalattula atthu ancipale.

¹⁷Ephiyaka ehuhu ya efesta, aamurumiha murumeiyi weera aaleele yaawo yaalattuliwe eeraka: ‘Ngweeke, niwoko sootheene soolikana.’

¹⁸Vano awo yaapacera mmoha-mmoha odyoonttelela weera khaningwa. Oopacera aaheera: ‘Koothuma vaanaano va ematta, ni kintthuna kirowe weera koone. Dyoontte, akilevelele.’

¹⁹Mukina aaheera: ‘Koothuma imombe muloko, ni kinoorowa weerera. Dyoontte, akilevelele.’

²⁰Mukinatho aaheera: ‘Kithenle vaanaano va, tivawo nkingwera orowawo.’

²¹Murumeiyi aahokolowa ni aahaaleela apwiyaawe. Vano mwaneene a empa aanyoonyiwa ni aamulamulela murumeiyaawe eeraka: ‘Orowe woowaakuveya mmiseweni ni mmiseweni sikhaaneene, ni waaruuhe wenno oohaawa, oorakala, oohoona ni ootuthunya.’

²²Murumeiyi aaheera: ‘Yeeyo Apwiya mulamulenlaanyu, yoopakiwa, ni noohalatho nipuro.’

²³Vano Apwiya yaamweerela murumeiyi: ‘Orowe mphironi ni mmiphitoni, ni waanyesererihe atthu ovolowa weera empaaka esareye.

²⁴Miyo kinooleelani weera khaawo a yaawo oolattuliwa anaalawihe yooca ya efestaaka.’”

²⁵Atthu ancipale yeera emuhoolaka Yeesu. Vano, aarukunuwelaka atthu ancipale, Owo aaweerela:

²⁶“Akhala mukina ongwa wa Miyo ni owo ahaathanya atithawe, amayawe, amwaarawe ni anamwanaawe, axunneiye ni axirokoriye, aani mpakatho okumaawe, khangwera okhala oohuseraaka.

²⁷Ni yoole ohinkuxa muttandaawe ni ohinkitthara, khangwera okhala oohuseraaka.

²⁸Noone ha, mmoha a nyuwo ontthuna oteka exiri yoorakama. Vano, onookilaathi toko weera uupuwele musurukhu mihayi ontthuneya. Eyo enootthuneya osuwela weera ookhalano musurukhu woowaatta woomalihera exiri ele.

²⁹Vano, apacera mathipelo ahiweraka omaliha, ootheene eneera yoone exiri yoohimalihiwa, anoomutheiya yeeraka:

³⁰‘Mulopwana ola aapacera oteka, mene khawenre omaliha.’

³¹Hoye hoye noone ha, mwene ontthuna owana ekhotto ni mwene mukina. Vano, onookilaathi toko uupuwelaka nnene weera owo ni anakhotto macira macireene muloko anoowera ongwina mwene mukina ni anakhotto macira macireene miloko miili.

³²Ahiweraka, mwene ole onrowa waalamulela atthu angwera ovaanela mwene mukina areene nlelo ottai, weera emvekele wiiwanana wa murettele.

³³Mooteene yoowo, akhalaru a nyuwo ohinghiya sootheene orinaawe, khangwera okhala oohuseraaka.

³⁴Maakha ti ooreera. Yoosivatho yamala, mmweeleeletho moota heeni?

³⁵Khantthuneya wa etthaya, naari wa etthaadyira. Anooriheliwa vaate. Yoole orino maaru oowiiwa, iiweke!