Read Makhuwa-Shirima Luuka 15 Bible Online

Luuka 15 - Makhuwa-Shirima bible

Luuka 15

¹Anamaliviha a musoko ni anamattheka ootheene yeera ethukumanaka weera emwiiwe.

²Mene aFarisi* ni anamawera a nlamulo* yaattaandawula yeeraka: “Mulopwana Ola ongwaakhela anamattheka ni onca ni yaawo.”

³Vano Yeesu aahaathalihera yoolikanyiha ela:

⁴“Taani a nyuwo akhalanaka ikhondoolo ncira ni emuriheyaka ekhondoolo emoha, khanghiya toko ikhondoolo sikina arowaka waasaasa ekhondoolo eriheiye mpaka ophwanya?

⁵Aaphwanyaka, onoothatela ni ohakalala

⁶ni onoorowa owaani. Woophiyani, onimwaathukumanyiha asinthamwenaawe ni asikhwaawe ni onooweerela: ‘Muhakalale ni miyo, niwoko koophwanya ekhondoolowaaka yaariheiye.’

⁷Miyo kinooleelani weera mooteene yoowo onuukhale ohakalalaxa wiirimu niwoko na namattheka mmoha onrukunxa murima, opwaha wa atthu oororomeleya miloko mithannamixexe ni athannaaxexe ahintthuneya orukunxa murima.

⁸Hiihotho ni muthiyana akhalanaka indarama* muloko ni emuriheyaka emoha, owo onoopattiha onyaari, onookwesa empa ni onimwaasaasa nnene mpaka aphwanye.

⁹Aaphwanyaka, onimwaathukumanyiha asinthamwenaawe ni asikhwaawe ni onooweerela: ‘Muhakalale ni miyo, niwoko koophwanya endaramaaka* yaariheiye.’

¹⁰Miyo kinooleelani weera mooteene yoowo wookhala ohakalala vamaithoni wa andyelo a Muluku niwoko na namattheka mmoha onrukunxa murima.”

¹¹Yeesu aapwaherera: “Mulopwana mmoha aakhalano anamwane eeli.

¹²Mukhaani aaweerela atithawe: ‘Tiithi, mukivahe yoohiyeriwa* eri yawaka.’ Hiiho awo yaakawanya sooreela wa yaale ooweeli.

¹³Vahoolo vakhaani, mwaana mukhaani aathukumanyiha sootheene aarinaawe, anarowa mweelaponi ya ottai. Weiwo aananariha sooreelasawe, ahipwatthaka mweettelowaawe.

¹⁴Amalihaka onanariha sootheene, yaakhala etala etokotoko mweelaponi yeele yootheene, ni owo aapacera ohaawela itthu.

¹⁵Tivawo aarongwaawe ovara muteko wa mutthu mmoha a elapo ele, aamulamulenle olipelela ikhumba mmattamwawe.

¹⁶Owo aahaawela ovoniha erukuluwaawe ni mivithe saaciwa ni ikhumba, mene khaawo aamvaha naari etthu.

¹⁷Uupuwelaka meekhaawe, aahiixeerela: ‘Atithaka aakhalano anamiteko ancipale arinaaya sooca soowaatta, ni miyo nno kihanle vakhaani okhwa ni etala.

¹⁸Miyo kinoovenya ni kinoohokoleela wa atithaka ni kinkela oweerela: ‘Tiithi, kootthekela wiirimu ni kohootthekelani nyuwo.

¹⁹Nkiphwanenle wiitthaniwa mwaninyu — mukireherereke ntoko namutekwaanyu.’

²⁰Vahoolowaya, aavenya ni aarowa wa atithawe. Areene nlelo ottai, atiithi yaamoona ni yaasareya ni ikharari, enamutthimakela mwanaya, enamukhubaara, enamubeeca.

²¹Mwaana aaweerela: ‘Tiithi, kootthekela wiirimu ni kohootthekelani nyuwo. Nkiphwanenle wiitthaniwa mwaninyu.’

²²Atiithitho yaaweerela arumeiyaaya: ‘Mwaakuveke! Ngwiihe ekuwo yooreeraxa ni mungwarihe. Mungwarihe mukathanimwawe munela ni inaawosawe isapato.

²³Ngwiihe emombe exaana yooneneva ni mwiive. Nrowe nipake efesta ni nitthape.

²⁴Vano, mwanaka ola aahookhwa ni oovenyerera; aariheya, vano oophwanyeya.’ Hiiho yaapacera ni efesta.

²⁵Yeereiyaka yeeyo, mwaana mutokweene aari omatta. Aattamelaka vaate, aahiiwa icipo ni wiiniwa.

²⁶Vano aamwiitthana murumeiyi mmoha ni aamukoha eheeni yeereiya.

²⁷Owo aamwaakhula: ‘Munninyu oohokolowa, ni atithinyu ahiiva emombe exaana yooneneva, niwoko awo aamwaakhela munninyu areene ni okumi.’

²⁸Mwaana mutokweene aanyoonyiwa ni khaatthuna ovolowa. Vano atithawe yaavenya ni yaamunyeserera.

²⁹Vaheera owo aawaakhula atithawe: ‘Khuu! Iyaakha sootheene seiya kinnavara muteko ntoko kireene epotthaanyu, ni nkinatoko ohiiwelela malamulowaanyu. Vano nyuwo khamunatoko okivaha hata epuri emoha weera kipake efesta ni asinthamwenaaka.

³⁰Vano, aholokoleelaka vaate mwaninyu owo aananaringhe sooreelasanyu ni mapuuta, nyuwo moomwiivela yoowo emombe exaana yooneneva!’

³¹Atiithi yaamweerela: ‘Mwanaka, weyo ori ni miyo mahuku ootheene. Sootheene kirinaaka ti sawawo.

³²Ontthuneyatho weera hiyo nimutthapeleke ni nimuhakalaleleke, niwoko munneiyo ole aahookhwa ni oovenyerera; aariheya ni vano oophwanyeya.’”