Read Makhuwa-Shirima Luuka 17 Bible Online

Luuka 17 - Makhuwa-Shirima bible

Luuka 17

¹Yeesu aaweerela oohuseraawe: “Ti woohisembeya weera sikhumelele itthu soowaatthekiha atthu, mene Ii! Onoohaawa yoowo ongwera iye!

²Waari fataari weera yoole avonyeriwe mphareiyani atthukeleliweene nxilo vaxiko, ahinaaye owo omtthekiha mmoha a asikhaani ala.

³Mwiipasoope! Munninyu attheka, mmooperere, ni owo arukunxa murima, munlevelele.

⁴Owo ootthekelani imaara ithannapiili vanihukuni, ni oohokoleelani imaara ithannapiili eeraka: ‘Miyo koorukunxa murima,’ munlevelele.”

⁵Arummwa yaaweerela Apwiya: “Mwaandyeerere nroromelonahu.”

⁶Owo aawaakhula: “Nyuwo mwakhalano nroromelo ntoko enuku emoha ya emostarda*, munoowera weerela mwiri ola: ‘Wiiphele ni wiiphatteiye mphareiyani,’ ni ola onoowiiwelelani.

⁷Noone ha mukina a nyuwo akhalanneene murumeiyi alimaka, naari mukukhuli awehawehaka ikhondoolo. Vano, owo aaphiyaka akhumaka omatta, anaamweerele: Oweke ni okilaathi weera oce?

⁸Hoye! Anaamweerele ha: ‘Opake yoocaaka, oolikanyihe ni okirumeele miyo kicaaka ni kiwuraka. Kaamalihaka, weyotho oceeke ni owureke.’

⁹Weeraka owo anaamutthapele murumeiyi niwoko na opaka yeeyo olamuleliwaawe?

¹⁰Hiihotho nyuwo, mwaamalihaka sootheene mulamuleliwaanyu, mweereke: ‘Nri arumeiyi oohittittimiheya, nookwanihera paahi yeeyo yaatthuneya weeriwa.’”

¹¹Eettaka woorowa oYerusaleemu, Yeesu aavira mmwiinanoni wa oSamariya ni oGalileiya.

¹²Avolowaka mmuttettheni mmoha, anamakokho muloko yaamwaattamela Yoowo. Yaaheemela ottaiwene vakhaani

¹³ni yaakhuwela vancipale: “Yeesu, Muhusiha, munimorele ikharari.”

¹⁴Awoonaka, aaweerela: “Murowe mwiixoonihere wa asaserdoti*.” Erowaka hiihaale, awo yaalamihiwa.

¹⁵Mmoha a yaawo, oonakaru weera oolama, aahokolowa amuttottopelaka Muluku, akhuwelaka vancipale.

¹⁶Aamukokhorela ohoolowawe Yeesu ni aamutthapela. Vano, aari muSamariya.

¹⁷Yeesu aamukoha: “Khaalamihiwe ootheene muloko? Ari woowi akina athannaaxexe?

¹⁸Khaawo mukina aahokolongwe ni aamutthapenle Muluku, ahikhanle namarwa ola?”

¹⁹Vano aamweerela: “Mvenye ni murowe — nroromelonanyu nohoovuluxani.”

²⁰Emaara emoha Yeesu akohakohiwaka ni aFarisi* mwaha wa ehuhu, heeni oneeraaya ophiye omwene wa Muluku, aawaakhula: “Omwene wa Muluku khoongwa moota woowooneya,

²¹hata atthu khaanrowa weera: ‘Ori va,’ naari ‘Ori iwe,’ niwoko omwene wa Muluku ori variyariwanyu.”

²²Vano Owo aaweerela oohuseraawe: “Eniiphiye mahuku nyuwo muneeraanyu muhaaweleke woona nihuku nimoha na mahuku a Mwaana a mutthu, mene khamurwa moona.

²³Atthu eniiweereleni: ‘Ori iwe,’ hoye hoye ‘ori va.’ Muhaakuve waatthara.

²⁴Mwaana a mutthu, vanihukuninawe, anaakhale ntoko overinya ommwaleela erimu yootheene.

²⁵Ohinaayetho, ontthuneya weera Owo ahaawe itthu sincipale ni akhoottiwe ni ekhapira ela.

²⁶Ntoko yaakhumelenlaaya vamahukuni a Nowe, hiihotho eniikhumelele vamahukuni a Mwaana a mutthu.

²⁷Muloko wa atthu weera ocaaka, owuraka, othelanaka ni othelaniwaka, mpaka nihuku Nowe aavolongwaawe munikulani ntokotoko. Vano saaphiya mirupi ni saawiiva ootheene.

²⁸Yaaheereiyatho hiiho ehuhuweene yeele ya Looti. Muloko wa atthu weera ocaaka, owuraka, othumaka ni othumihaka, waalaka ni otekaka.

²⁹Nihukutho Looti aavenyaawe oSodoma, waakhuruwa mooro ni enxofre* ya wiirimu, ni waawiiva ootheene.

³⁰Eniikhumelele hiihotho nihuku Mwaana a mutthu aneeraawe iixoonihere.

³¹Nihuku nno, yoowo anaakhale vanipathoni, akhalanaka sooreelasawe mpaani, ahikhuruwe weera akuxe. Hiihotho, yoowo anaakhale omatta, ahihokoleele ottuli niwoko na etthu emoha.

³²Mmuupuwelele mwaariye Looti.

³³Yoole ontthuna othokorora okumaawe, anaayeleele, ni yoowo ongyeleela okumaawe, anaathokorore.

³⁴Miyo kinooleelani: ohiyuweene yoowo, atthu eeli eniikone ebeetti emoha. Mmoha anaavenxiwe ni mukina anaahiiwe.

³⁵Asithiyana eeli eniixile etrigu vamoha. Mmoha anaavenxiwe ni mukina anaahiiwe.”

³⁷Awo yaamukoha: “Woowi Apwiya?” Owo aamwaakhula: “Weiwo oraayawo muttembo, eniithukumanewo mattawo.”