Read Makhuwa-Shirima Luuka 18 Bible Online

Luuka 18 - Makhuwa-Shirima bible

Luuka 18

¹Vano Yeesu aahaathalihera oohuseraawe yoolikanyiha emoha, atthunaka owoonihera weera ontthuneya ovekela mahuku ootheene ehikhulumuwaka.

²Owo aaweerela: “Musidadeni emoha aakhala mphuki ahaamoova Muluku, hata khaahelelaxa atthu.

³Aakhalatho musidadeni ele naamukhweli muthiyana mmoha annarowa imaara sincipale wa yoowo, amudyoonttelelaka: ‘Mukuulumele mulattwaaka ni mwiittanaka.’

⁴Owo aakhootta vamahukuni makina. Ommaleloni owo aahiixeerela: ‘Naari kihimoovaka Muluku, hata kihaapwatthaka atthu,

⁵naamukhweli ole onnakiphweela. Vano, kinoomuulumela mulattwaawe weera ahitepaxe orwa wa miyo.’”

⁶Apwiya yaapwaherera: “Mwiiwe yeeyo mphuki oonanara oneeraawe.

⁷Weeraka Muluku khanrowa owuulumela mulattwaaya oothanliwaawe, animdyoonttelela ohiyu ni othana? Anaapwaherere waawehereriha vancipale?

⁸Miyo kinooleelani: Owo anaawuulumele mulattwaaya woowaakuveya. Wa soothesene, aawaaka Mwaana a mutthu, anaaphwanye nroromelo mweelaponimu?”

⁹Yeesu aahaathalihera yoolikanyiha ela akina yaale aniixuupuwela weera ari oowaakhuleliwa ni Muluku, yaaramusaka akina:

¹⁰‘Atthu eeli yaarowa Mpaani mwa Muluku weera yavekele. Mmoha aari muFarisi*, ni mukina namaliviha a musoko.

¹¹muFarisi*, eemenleene, aahiivekelela muneenaawe: ‘Muluku, kinootthapelani niwoko miyo nkihiyono ntoko atthu akina: anamwiiya, ootakhala, anamararuwa, hata ntoko namaliviha a musoko ola.

¹²Miyo kinnatthuka imaara piili vasimanani, ni kinnavaha yanaamuloko wa sootheene kingwinaaka.’

¹³Namaliviha a musokotho aaheemela ottaiwene. Khaatthuna oweha osulu, mene amanaka ekakasa, aaheera: ‘Muluku, mukimorele ikharari, miyo kiri namattheka.’

¹⁴Miyo kinooleelani weera mulopwana ola, omuhiya muFarisi*, aarowa owaani aakhuleliweene ni Muluku. Vano, ootheene aniivuwiha, eniikhale ooyevihiwa, ni ootheene aniiyeviha, eniikhale oovuwihiwa.

¹⁵Muloko wa atthu waamuruuhelatho Yeesu anamwane weera aatave. Yoonaka yeeyo, oohusera yaahaahiiha yaawo yaaruuhale anamwane.

¹⁶Yeesutho aahiixiitthanela anamwane, eeraka: “Mwaahiyeke anamwane eweeke wa Miyo, ni muhiwooceelihe, niwoko omwene wa Muluku ori wa yaale anlikana ni yaawo.

¹⁷Miyo kinooleelani ekhaikhai: Yoowo ohinaakhela omwene wa Muluku ntoko mwaana mmoha, khanrowa ovolowa moomweneni.”

¹⁸Mutthu mmoha oottittimiheyaxa aamukoha: “Muhusiha ooreera, kipakeke eheeni weera kiphwanye okumi woohimala?”

¹⁹Yeesu aamwaakhula: “Heeni munkiitthanaanyu ooreera? Khaawo ooreera, ahikhanle Muluku paahi.

²⁰Nyuwo moosuwela malamulo: ‘Muhiraruwe, muhiive, muhiiye, muhoothe, mwaattittimihe atithinyu ni amayinyu.’”

²¹Owo aaheera: “Sootheene iya kohiiwelela okhuma enamwanaaka.”

²²Iiwaka yeeyo, Yeesu aamweerela: “Yohoohaleelani etthu emoha. Mwathumihe sootheene murinaanyu ni mwaavahe musurukhu oohaawa, ni mmwikhaleno muhakhu wiirimu. Vahoolowaya, ngwe ni mukitthare.”

²³Iiwalaawe yeeyo, aathanana, niwoko aakhalano mihakhu sincipale.

²⁴Amoonaka oothananeene, Yeesu aaheera: “Moota orikanxaaya ovolowa namapuha moomweneni wa Muluku!

²⁵Mwa yeeyo, ti wookhweya ekamelu* ovira vamwiitheni wa singano, ohikhanle namapuha ovolowa moomweneni wa Muluku.”

²⁶Yaawo yiiwale yeeyo yaakoha: “Vamwaheene ola, taani ongwera ovuluxiwa?”

²⁷Yeesu aawaakhula: “Yeeyo eri yoohiwereya wa atthu, ti yoowereya wa Muluku.”

²⁸Pedru aamweerela: “Hiyo noohiya sootheene naakhalannaahu weera nootthareni.”

²⁹Yeesu aamwaakhula: “Miyo kinooleelani ekhaikhai: Khula mutthu ohiyale empaawe, mwaariye, axunneiye, atithawe, hoye hoye anamwanaawe mwaha wa omwene wa Muluku,

³⁰anaakhele mweehuhuni ela imaara sincipale seiyo ohiyalaawe, ni mweehuhuni ya muhoolo anaakheletho okumi woohimala.”

³¹Yeesu aawiitthana oohusera muloko neeli vakhwipi ni aaweerela: “Ninrowa oYerusaleemu. Sootheene silempwale ni maprofeeti mwaha wa Mwaana a mutthu, sinookwaniheriwa.

³²Owo anaavahereriwe wa amalapo. Awo eniimutheiye, eniimuruwane, eniimusenyele,

³³eniimuwaxule ni eniimwiive. Vanihukuni nanaararu Owo anaavenyerere.”

³⁴Oohusera khayiiwexenxe hata etthu emoha ya seiyo. Etaphulelo ya masu ale yaahiipithiheiya wa yaawo, ni awo khayaasuwenle yeeyo Owo uulummaawe.

³⁵Akhuveelaka Yeesu oYeriko, mulopwana oohoona akilaantheene mukerekhere wa musewe eera avekelaka samahala.

³⁶Aawiiwalaawe atthu ancipale eviraka, owo aakoha etthu heeni yeereiya.

³⁷Awo yaamweerela: “Yeesu muNasarete onoovira.”

³⁸Vano owo aakhuwela: “Yeesu, mwaana a Davide, mukimoreleke ikharari!”

³⁹Yaawo yaahoonle yaamuhiiha weera amaale, mene owo aatepa okhuwela: “Yeesu, mwaana a Davide, mukimoreleke ikharari!”

⁴⁰Yeesu aaheemela ni aahaalamulela weera mutthu ole aruuheliwe. Owo amwaattamelaka, Yeesu aamukoha:

⁴¹“Muntthuna eheeni weera Miyo koopakeeni?” Owo aamwaakhula: “Apwiya, kintthuna woona.”

⁴²Yeesu aamweerela: “Moone, nroromelonanyu nohoolamihani.”

⁴³Woowaakuveya owo aahoona, ni aamutthara Yeesu amvuwihaka Muluku. Muloko wa atthu wootheene, woonaka yeeyo, waamuttottopela Muluku.