Read Makhuwa-Shirima Luuka 2 Bible Online

Luuka 2 - Makhuwa-Shirima bible

Luuka 2

¹Mahukweene yaale Seesari Agustu aahima ekano emoha, alamulaka weera apakiwe namalepela a atthu a ilapo sootheene sa oRooma.

²Owo aari namalepela oopacera aapakiwe Kiriniyu areene guvernadori a oSiriya.

³Ootheene yaarowa wa muttetthe weiwo yaayariwaayawo weera yalepeliwe.

⁴Hiiho, Yoseefe aarowatho, akhumaka esidade ya oNasarete ya oGalileiya mpaka oBetelehemu, esidade ya Davide, elapo ya oYudeiya, niwoko aari a emusi ni ekhapira ya Davide.

⁵Aarowa ni Mariya, yoowo aamutthomenraawe ni aarupanle, weera yalepeliwe.

⁶Ereene nlelo weiwe, yaaphiya ehuhu ya omuyara Mwaana,

⁷ni Mariya aamuyara Mwaana Mulopwana a ntthaaranawe. Aamvitikelela ikuwo ni aamwiikaathi munikhoolani, niwoko khanaariwo nipuro wa yaawo mpaani mwa aletto.

⁸Yaari akukhuli yaakhala mmatta mookhuveela. Moohiyuni yaalipelela muhuwaaya.

⁹Ndyelo mmoha a Apwiya aahiixoonihera wa yaawo, ni ovuwa wa Apwiya waahaara waarukureenreene yaawo, vano yaahoova.

¹⁰Ndyelotho aaweerela: “Muhoove, miyo kinooruuhelani masu ooreeraxa a ohakalalaxa ari wa muloko wootheene.

¹¹Olelo, musidadeni ya Davide, mooyareliwa nyuwo Mvuluxa ori Kristu, Apwiya.

¹²Eyo eniikhale eneneerowaanyu: nyuwo mmwimphwanye Mwaana avitikelelingweene ikuwo ni iikaathiweene munikhoolani.”

¹³Woowaakuveya mikhalelo sincipale sa anakhotto a wiirimu saahiixoonihera ni ndyelo ole simuttottopelaka Muluku seeraka:

¹⁴“Ovuwa okhale wa Muluku Musulusulu, ni vathi vaava murettele wa yaale animusiveliha Muluku.”

¹⁵Yaahiyakaru andyelo yaawo, erowaka wiirimu, akukhuli ale yaaheerelana mukina ni mukwaawe: “Nrowe oBetelehemu ni noone yeeyo yeereiye Apwiya anileenlaaya.”

¹⁶Vano yaatthimaka ni yaamuphwanya Mariya, Yoseefe ni Mwaana aatalelingweene munikhoolani.

¹⁷Emoonaka, awo yaamwaramwaxa yeeyo yaaleeliwaaya mwaha wa Mwaana ole.

¹⁸Ootheene yiiwale yaatikhina ni masu a akukhuli.

¹⁹Wa soothesene, Mariya aathokorora itthu sootheene seiye ni annatthokelela mmurimanimwawe mwaha wa seiyo.

²⁰Akukhuli yaahokolowa, emvuwihaka ni emuttottopelaka Muluku wa sootheene yoonalaaya ni yiiwalaaya ntoko yaaleeliwaaya.

²¹Wa nihuku nanaathannaararu, ephiyaka ehuhu ya omwiinela Mwaana, aattehiwa Nsina na Yeesu, Nsina nne ndyelo aamuttenghaawe ahinaaye oyariwa.

²²Emalihiwaka ehuhu ya otteelihiwawaya ntoko malamulo a Moisesi annyesererihaaya, Yoseefe ni Mariya yaamurongha oYerusaleemu weera yamoonihere wa Apwiya.

²³Ntoko elempwalaaya munlamuloni na Apwiya: “Asilopwana ootheene a matthaara ekhaleke oovahereriwa wa Apwiya.”

²⁴Yaamuronghatho weera evahe yooveleela ntoko ninghimaaya nlamulo na Apwiya: “Masiya meeli, hoye hoye ikhunda piili.”

²⁵Aakhala oYerusaleemu mulopwana mmoha iitthaniwa Simeyoni aari oororomeleya ni a murima wa omuluku. Owo aaweherera opepesiwa wa oYixrayeli, ni Munepa Wootteela waari ni yoowo.

²⁶Aathupululeliwa yoowo ni Munepa Wootteela weera owo khaarwa okhwa ahinaaye omoona Kristu a Apwiya.

²⁷Eettihiwaka ni Munepa Wootteela, aarowa Mpaani mwa Muluku. Engwiihaka asinaangolo Mwaana Yeesu weera ekwanihere yeeyo yaatthuneya ni ekhovelelo ya malamulo,

²⁸Simeyoni aamukuxa Yeesu mmatatanimwawe, anamuttottopela Muluku eeraka:

²⁹“Muluku onlamula sootheene, ntoko mwaakiroromelinghaanyu, vano munoowera okilaxera mmuretteleni,

³⁰niwoko kohoona ni maithwaaka ovuluxawanyu

³¹Nyuwo mureherenraanyu vamaithoni wa atthu ootheene:

³²waara weera waamwaleele amalapo ni wa ovuwa wa atthwaanyu aYixrayeli.”

³³Atithawe ni amayawe Mwaana yaatikhina ni yeeyo yaaleeliwaaya mwaha wa Mwaana ole.

³⁴Vano Simeyoni aahaareeliha ni aaweerela amayawe Yeesu: “Mwaana Ola oothanliwa okhala wuuwa ni ovenya wa atthu ancipale a oYixrayeli, ni anaakhaletho eneneero ya ohiiwanana.

³⁵Hiiho soowuupuwela sa mirima sincipale nsikhale soothupululiwa. Vano, wa nyuwo, ekatana eniihome munepaanyu.”

³⁶Aakhalawo mprofeeti muthiyana, iitthaniwa Ana, mwaana a Fanuweli a nihimo na Axeri. Aari oowuuluvalaxa, ni okhuma otheliwawawe aakhala ni aiyawe iyaakha ithannapiili,

³⁷ni vahoolowaya aakhala naamukhweli mpaka iyaakha miloko mithannamiraru niixexe. Khanatoko ohiya Empa ya Muluku. Annamulapa Muluku, atthukaka ni avekelaka ohiyu ni othana.

³⁸Aphiyaka iwe ehuhu emoharu yeeyo, aamutthapela Muluku ni anuuluma mwaha wa Mwaana wa ootheene yaaweherera ovuluxiwa wa Yerusaleemu.

³⁹Emalihaka sootheene saatthuneya ni malamulo a Apwiya, Yoseefe ni Mariya yaahokoleela esidadaaya, Nasarete, elapo ya oGalileiya.

⁴⁰Mmiravo annunnuwa ni annalipa, asareyaka ni miruku, ni mahala a Muluku yaari ni Yoowo.

⁴¹Iyaakha sootheene asinaangolo yannarowa oYerusaleemu ofestani ya mPaska*.

⁴²Yeesu aaraawe ni iyaakha muloko ni piili, awo yaarowa ofestani ntoko yaakhovelelaaya.

⁴³Emalaka efesta ni ehokoleelaka asinaangolo owaani, mmiravo Yeesu aahala oYerusaleemu, mene awo khaayaasuwela yeeyo.

⁴⁴Yuupuwelaka weera Owo aari ni asikhwaawe a mmukwahani, yaaheetta nihuku nootheene. Vano yaapacera omwaasaasa variyari wa amusi ni atthu yasuwelannaaya.

⁴⁵Ehimphwanyaka, yaahokoleela oYerusaleemu weera yamwaasaase.

⁴⁶Eviraka mahuku mararu, yaamphwanya Yeesu Mpaani mwa Muluku, akilaantheene variyari wa ahusiha, awiiwaka ni aakohaka.

⁴⁷Ootheene yaamwiiwale Yeesu yaatikhinaxa ni wiiwexexawawe ni moota aawaakhunlaawe.

⁴⁸Emoonaka asinaangolo Yeesu, yaatikhina. Amayawe yaamweerela: “Mwanaka, heeni onipakenlaawo yeeyo? Atithawo ni miyo naaheeteteiya niwaasaka.”

⁴⁹Owo aahaakoha: “Heeni nyuwo mwaakaasasaanyu: Khamusuwenle weera ontthuneya Miyo okhala Mpaani mwa Atithaka?”

⁵⁰Vano awo khayiiwexenxe yeeyo aaleenlaawe.

⁵¹Vano, aarowa ni aahaahoola oNasarete, ni annawiiwelela asinaangolo. Wa soothesene, amayawe yaathokorora itthu sootheene iye mmurimanimwaya.

⁵²Yeesu annunnuwa ni miruku, mweerutthuni ni mmahalani vamaithoni wa Muluku ni wa atthu.