Read Makhuwa-Shirima Luuka 20 Bible Online

Luuka 20 - Makhuwa-Shirima bible

Luuka 20

¹Nihuku nimoha, Yeesu axuttihaka muloko wa atthu Mpaani mwa Muluku ni alaleiyaka masu ooreeraxa, yaaphiya wa Yoowo ahooleli a asaserdoti* vamoha ni anamawera a nlamulo* ni asitokweene.

²Awo yaamukoha: “Munileele, ni ikuru heeni mumpakaanyu itthu iya? Taani yoovangheni ikuru iya?”

³Yeesu aawaakhula: “Miyotho kinimookohani etthu: Mukileele:

⁴Opatiso wa Yohaane waari wa wiirimu, hoye hoye wa atthu?”

⁵Awo yaakohana yaaworu, yeeraka: “Neera ‘wa wiirimu’ Owo onoonikoha: ‘Vano, niwoko heeni mwahaamuroromelaanyu yoowo?’

⁶Menetho neera: ‘wa atthu,’ muloko wa atthu wootheene onuunivonye maluku, niwoko owo wooviriyeliwa weera Yohaane aari mprofeeti.’

⁷Hiiho, yaamwaakhula: “Khanisuwenle waari wa woowi.”

⁸Vano Yeesu aaweerela: “Hata Miyotho nkinooleelani ni ikuru heeni kimpakelaaka itthu iya.”

⁹Owo aathalihera muloko wa atthu yoolikanyiha ela: “Mulopwana mmoha aaphatteya ematta ya iwuuva*. Aawooliha anamalima akina ematta ele, ni aapwaha wa mahuku mancipale.

¹⁰Mweehuhuni ya ohepha, aamurumiha murumeiyi mmoha wa anamalima weera emvaherere mpatta wa soowiima sa ematta ya iwuuva*. Anamalimatho yaammana ni yaamoomola woohikuxa etthu.

¹¹Owo aamurumihatho murumeiyi mukina, mene yaammanatho ni yaamveiha moota woowuuliha muru, emoomolaka woohikuxa etthu.

¹²Aamurumiha anaararu, ni awo yaamvulaliha, enamoomola mmatta mwa iwuuva*.

¹³Vano muneene a ematta ya iwuuva* aahiixeerela: ‘Keereke hai? Nkimurumihe mwanaka oosiveleya. Apaale eniimuttittimihe.’

¹⁴Emoonaka mwaana, anamalima yaavaanela yeeraka: ‘Ola ti ettuli ya mwaneene. Nrowe namwiive, ni emattaawe eniikhale yawihu.’

¹⁵Hiiho yaamvonyera mukerekhere wa ematta ya iwuuva* ni yaamwiiva. Anaapakele eheeni mwaneene a ematta ya iwuuva*?

¹⁶Anaawe awiive anamalima ale, ni anaavahe akina ematta ya iwuuva*.” Wiiwaka yeeyo, muloko wa atthu waaheera: “Ela kheeneereye!”

¹⁷Yeesu aahaaweha nnenesene ni aahaakoha: “Vano, entaphulela eheeni yoolempwa ela: ‘Nluku anamateka yaakhoonttaaya, naathatuwa nluku noottittimiheyaxa.’

¹⁸Ootheene eneera emorele vanlukuni nna, eniinyakatteye. Ni yoole aneera amoreliwe ni nluku nna, anaaswanyeye.”

¹⁹Anamawera a nlamulo* ni ahooleli a asaserdoti* yaasaasa mukhalelo weera yaamvare khuluwi, niwoko yaasuwela weera yaari wa yaale Yeesu uulummaawe yoolikanyiha ela. Wa soothesene, yaahoova muloko wa atthu.

²⁰Emuthurumelaka Yeesu, awo yaahaarumiha anamahottela yiixeeraka okhala oororomeleya, weera emvare Yeesu ni masu onghimaawe. Yaapaka yeeyo weera emvaherere wa ikuru ni olamula wa guvernadori.

²¹Hiiho anamahottela yaamukoha: “Muhusiha, noosuwela weera Nyuwo munuuluma ni munxuttiha yeeyo eri ya nnene, khamunthalu, mene munnaxuttiha ephiro ya Muluku ntoko eraaya ekhaikhai.

²²Ontthuneya omuliva musoko Seesari, hoye hoye naari?”

²³Owo aasuwela soowiixeerasaya, ni aaweerela:

²⁴“Mukoonihere edinaariyu* emoha. Ecaambulo ni yoolempwa ela ti yawani?”

²⁵Awo yaamwaakhula: “Ya Seesari.” Owo aaweerela: “Ya Seesari, mumvahe Seesari, ni ya Muluku, mumvahe Muluku.”

²⁶Vano yaahooceela omvara Yeesu ni maswaawe vamaithoni wa muloko. Etikhinaka ni yoowaakhulaawe, yaamaala.

²⁷aSaduki* akina, aneera weera khoowowo ovenyerera, yaamwaattamela Yeesu ni yookoha ela:

²⁸“Muhusiha,” awo yaaheera, “Moisesi oonilepela weera, munna a mulopwana mmoha akhwa aahiyaka amwaarawe oohikhalano anamwane alopwana, mulopwana ole amutheleke naamukhweli weera akhalane anamwane alopwana wa munneiye.

²⁹Vano yaakhala axunna athanneeli. Oopacera aathela anaakhwa, ahaahiyaka anamwane alopwana.

³⁰Anaaveeli

³¹ni anaararu nitho akina yaathelana ni naamukhweli owo. Hiiho yaahookhwa mmoha-mmoha axunna athanneeli, ehaahiyaka anamwane alopwana.

³²Woomalihera aahookhwatho naamukhweli.

³³Moovenyererani, naamukhweli anaakhale mwaara awani, yeenre athanneeli yamuthelaka yoowo?”

³⁴Yeesu aawaakhula: “Anamwane a ehuhuweene yeela annathela ni annatheliwa.

³⁵Vano yaawo anooniwa ophwanela okhala mpatta wa ehuhu eneera ewe ni wa ovenyerera wa akhwiiye, kheerwa ethela, naari etheliwa.

³⁶Awo khaangwera okhwatho niwoko ari ntoko andyelo. Ari anamwane a Muluku, ereene anamwane a ovenyerera.

³⁷Yeele yaamukhumelenle Moisesi vaniphuwani nivarelaka enoonihera weera akhwiiye amvenyerera, niwoko Moisesi aawiitthana Apwiya ‘Muluku a Abrahaamu, Muluku a Isaaki ni Muluku a Yakobe.’

³⁸Owo khahiyono Muluku a akhwiiye, mene a akumi, niwoko ootheene annamukhalela Yoowo.”

³⁹Akina a anamawera a nlamulo* yaamweerela: “Mohaakhula nnene, Muhusiha!”

⁴⁰Khaawo yeerera omukoha sookoha sikina.

⁴¹Vano Yeesu aahaakoha: “Heeni atthu aneeraaya weera Kristu ti mwaana a Davide?

⁴²Davide muneenaawe aahaakhulela nnene mulivuruni ya icipo: ‘Apwiya yaaweerela Apwiyaaka: Mukilaathi moonowaaka mulopwana

⁴³mpaka Miyo kineeraaka kiwiikaathi amwiittanaanyu vathi wa inaawosanyu.’

⁴⁴Vano, Davide ongwiitthana ‘Apwiya.’ Ongwereya hai okhala mwanawe?”

⁴⁵Wiiwaka muloko wa atthu wootheene, Yeesu aaweerela oohuseraawe:

⁴⁶“Mwiipasoope ni anamawera a nlamulo*. Ti woottittimiheya wa yaawo weetta ni ikuwo sooreera ni wuulumihiwa mwaatthuni ni okilaathi mmapuroni oopacera muSinagogani* ni mmapuroni oottittimiheya a mufestani.

⁴⁷Awo annakhuura impa sa asinaamukhweli, ni annavekelaxa yiixeeraka. Awo eniittaruxiwe moota wootepaxa.”