Read Makhuwa-Shirima Luuka 22 Bible Online

Luuka 22 - Makhuwa-Shirima bible

Luuka 22

¹Yeera ekhuveelaka efesta ya ipaawu soohikhalano eferementu, yiitthaniwa mPaska*.

²Ahooleli a asaserdoti* ni anamawera a nlamulo* yeera yaasaasaka mukhalelo woomwiiva Yeesu, yoovatho muloko wa atthu.

³Vano, Satana aavolowa mwa Yudasi, iitthaniwa Iskariyoti, mmoha a oohusera muloko neeli.

⁴Yudasi aarowa wa ahooleli a asaserdoti* ni asitokweene a anakhotto a Empa ya Muluku, ni aavaanelela vamoha ni yaawo moota heeni eeraawe amvarihe Yeesu.

⁵Awo yaahakalalaxa ni yaahiiwanana omvaha musurukhu.

⁶Owo aahaakhulela, ni aaweherera ehuhu entthuneya owinnyerera Yeesu, muloko wa atthu ohikhanlewo.

⁷Ommaleloni naaphiya nihuku na ipaawu soohikhalano eferementu, mwa nenno waamutthuneya wiiva eputtiputthi ya mPaska*.

⁸Yeesu aamurumiha Pedru ni Yohaane, aweerelaka: “Murowe ni mwareherere yooca ya mPaska*.”

⁹Awo yaamukoha: “Muntthuna woowi weera hiyo nareherere?”

¹⁰Owo aawaakhula: “Mwaavolowaka musidadeni, munoomphwanya mulopwana mmoha iireyaka mwaapu wa maahi. Mwamutthare mpaka empa aneeraawe avolowe,

¹¹ni mwamuleele muneene a vaate vawo: ‘Muhusiha onookoha: eri woowi ekwartu ya aletto mwa yeeyo Miyo kineeraaka kimuce mPaska* vamoha ni oohuseraaka?’

¹²Owo anaawoonihereni ekwartu etokotoko ya musulu ereeneno meesa ni ihice, sootheene soolikana. Mwareherere sootheene weiwo.”

¹³Awo yaavenya ni yaaphwanya sootheene ntoko Yeesu aaleenlaawe. Vano yaamureherera mPaska*.

¹⁴Ephiyaka ehuhu, Yeesu ni arummwaawe yaakilaathi vameesa

¹⁵ni aaweerela: “Koohaawelaxa ni murima wootheene omuca mPaska* ola vamoha ni nyuwo kihinaaye ohaawa.

¹⁶Vano Miyo kinooleelani: nkinrowa omucatho mPaska* mpaka aneeraawe akwaniheriwe moomweneni wa Muluku.”

¹⁷Aakuxalaawe ekoomixi, aatthapela ni aaheera: “Mukuxeke eyo ni mukawaneke.

¹⁸Vano, Miyo kinooleelani weera nkinrowa owuratho wa soowiima sa ematta ya iwuuva* mpaka oneeraaya orwe omwene wa Muluku.”

¹⁹Akuxaka epaawu, aatthapela, aameyanya ni aahaavaha oohusera eeraka: “Ela ti erutthwaaka, yoovahereriwa wa nyuwo. Mpakeke yeeyo mukuupuwelelaka Miyo.”

²⁰Mooteene yoowo, emalihaka oca, aakuxa ekoomixi eeraka: “Ekoomixi ela ti wiiraana onyowani mwa ephomaaka, evuuvihiwe wa nyuwo.

²¹Moonetho, ntata na yoole anaakivarihe nri ni Ntatanaka vameesa.

²²Mwaana a mutthu onoorowa ntoko olamuliwaawe, mene Ii! Onoohaawa yoole anaamvarihe.”

²³Awo yaapacera okohana taani a yaawo aneera apake yeeyo.

²⁴Waakhumatho onyakulihana variyariwaya mwaha wa taani a yaawo oophwanela okhala mutokweene.

²⁵Yeesu aaweerela: “Mamwene a ilapo annaalamula amalapo, ni yaawo anaalamula, aniixiitthana atthu ampaka sooreera.

²⁶Nyuwotho muhikhale hiiho. Ohiyanawaya, ontthuneya weera mutokweene a variyariwanyu akhale ntoko mukhaaneene, ni yoole onlamula, ntoko murumeiyi.

²⁷Vano, taani mutokweene: yoole ori vameesa, hoye hoye yoole onrumeela? Khahiyono yoole ori vameesa? Miyotho kiri variyariwanyu ntoko yoole onrumeela.

²⁸Nyuwo muri yaale avilenle vamoha ni Miyo mwa sooweereriwasaka.

²⁹Miyo kinoovahererani omwene, ntoko Atithaka akivaherenraaya omwene,

³⁰weera muceeke ni muwureke vameesaniwaka mureene moomwenenimwaka ni weera mukilaathi muhiceni, muthorihaka ipuumba* muloko ni piili sa aYixrayeli.

³¹Simeyoni, Simeyoni, Satana onnavekelaxa weera ooveereni ntoko etrigu,

³²mene Miyo kohoovekelelani weera nroromelonanyu nihooceeleye. Vano nyuwo mwaarukunxaka murima, mwaalipihe axunninyu.”

³³Vaheera Pedru aamwaakhula: “Apwiya, koolikana weera koohooleni okaliposo, nitho mpaka mookhwaani.”

³⁴Yeesu aamwaakhula: “Kinooleelani, Pedru, weera ohinaaye wiipa nthupi olelo, nyuwo munookiruna imaara tthaaru, mweeraka khamukisuwenle.”

³⁵Yeesu aahaakoha: “Miyo koorumihalaakani woohikhalano nihottha, nrupa, hoye hoye ikwakwaatta, yaahoohaleelani etthu?” Awo yaamwaakhula: “Hoye!”

³⁶Owo aaweerela: “Vaanaano vaavatho, mwakhalano nihottha, mukuxe, hiihotho nrupa. Vanonto, mwaahikhalano ekatana, muthumiheke mukaandyowaanyu ni muthume ekatana.

³⁷Yoolempwa: ‘Aahaalikeleliwa vamoha ni atakhali.’ Miyo kinooleelani weera eyo entthuneya okwaniheriwa mwa Miyo. Aani, yeeyo elempwale mwaha wa Miyo ehanle vakhaani okhwaniheriwa.”

³⁸Oohusera yaamweerela: Ngwehe, Muhusiha, sookhala va ikatana piili.” Owo aawaakhula: “Sookwana.”

³⁹Yeesu aarowa vamwaakoni wa Sooliveira ntoko aakhovelelaawe, ni oohuseraawe yaamutthara.

⁴⁰Aphiyaka vanipuroni, Owo aaweerela: “Muvekele weera muheereriwe.”

⁴¹Owo aasusa vakhaani, anakokhora, anapacera ovekela eeraka:

⁴²“Tiithi, mwatthuna, mususihe wa Miyo ekoomixi ela, wa soothesene, ohipakiwe otthunawaka, mene otthunawanyu.”

⁴³Vano aahiixoonihera wa Yoowo ndyelo a wiirimu aamulipihenre.

⁴⁴Areene ni othananaxa, aatepaxa ovekela ni orettheelawawe waari ntoko mattonyo a ephome yaamorenle vatthayani.

⁴⁵Avenyaka moovekelani ni ahokoleelaka wa oohuseraawe, aahaaphwanya ekonaka, ekhulumungweene ni othananaxa.

⁴⁶Owo aahaakoha: “Heeni munkonaanyu? Mvenye ni muvekele weera muheereriwe.”

⁴⁷Yeesu nlelo alokololaka, yaahoowa atthu ancipale yaahooliwa ni Yudasi, mmoha a muloko neeli. Owo aamwaattamela Yeesu weera amuulumihe ni ebeecu.

⁴⁸Yeesutho aamukoha: “Yudasi, onoomvariha Mwaana a mutthu ni ebeecu?”

⁴⁹Yoonaka yeeyo yeera yeereiye, awo yaari ni Yeesu yaamukoha: “Apwiya, niwaneke ni ikatana?”

⁵⁰Mmoha a yaawo aamvulaliha murumeiyi a mutokweenexa a asaserdoti*, amukwasaka naarunawe na moono mulopwana.

⁵¹Yeesutho aawaakhula: “Wookwana!” Atavaka naaru na murumeiyi ole, aamulamiha.

⁵²Vano Yeesu aaweerela ahooleli a asaserdoti*, asitokweene a anakhotto a Empa ya Muluku ni asitokweene a muloko yaangweenle omwaasaasa: “Weeraka Miyo kinaalamula atthu weera ewane ni ebooma, nyuwo mungwaanyu ni ikatana ni ikopo?

⁵³Mahuku ootheene Miyo kaari ni nyuwo Mpaani mwa Muluku, ni khamwaakitthunke. Mene ehuhuweene yeela ti yawinyu — elamulaka epiphi.”

⁵⁴Vano, emutthukaka, yaamurongha wa empa ya mutokweenexa a asaserdoti*. Pedru aahaatthara ottaiwene.

⁵⁵Yiiseelakatho mooro eriyari ya nipuwa, ni ekilaantheene mukhwipi, Pedru aakilaathi ni yaawo.

⁵⁶Murumeiyi muthiyana mmoha aamoona akilaantheene vale ngwaarani wa mooro. Aangweha nnenesene ni aaheera: “Mulopwana ola aari ni Yoowo.”

⁵⁷Aarunatho eeraka: “Muthiyana, nkimusuwenle.”

⁵⁸Vahoolo vakhaani, mutthu mukina aamoona ni aamweerela: “Nyuwotho muri mmoha a yaawo.” Pedru aamwaakhula: “Mulopwana, nkihiyono!”

⁵⁹Yaaviralaaya ewoora emoha, mukina aahaakhulela eeraka: “Vekhaikhai, mulopwana ola aari vamoha ni Yoowo, niwoko ori muGalileiya.”

⁶⁰Pedru aamwaakhula: “Mulopwana, nkisuwenle yeeyo munuulumaanyu!” Uulumaka hiihaale, nthupi waahiipa.

⁶¹Apwiya yaarukunuwa ni yaangweha nnenesene Pedru. Vano Pedru aahuupuwelela yeeyo Apwiya yaamuleenlaaya: “Ohinaaye wiipa nthupi olelo, munookiruna imaara tthaaru.”

⁶²Avenyaka vaavaale, aahiinla aripiweene murima.

⁶³Alopwana yaamutthunke Yeesu yaapacera omutheiya ni ommana.

⁶⁴Yaamukhuneela maitho ni yaamukoha: “Otthome, taani yoomanne?”

⁶⁵Ni yannamuruwana ni masu makina mancipale.

⁶⁶Niwelaka nsuwa, eSineedriyu* yaathukumana — ahooleli a asaserdoti* nitho anamawera a nlamulo*, ni Yeesu aaronghiwa ohoolowaya.

⁶⁷Awo yaamweerela: “Nyuwo mwaari Kristu, munileele.” Yeesu aawaakhula: “Miyo kooleelani, nyuwo khamunrowa okiroromela,

⁶⁸ni Miyo kookohani, nyuwo khamunrowa okaakhula.

⁶⁹Okhumatho vaanaano vaava mpaka muhoolo Mwaana a mutthu anaakilaathi moono mulopwana wa Muluku a ikuru sootheene.”

⁷⁰Ootheene yaamukoha: “Vano, Nyuwo muri Mwaana a Muluku?” Owo aawaakhula: “Ti hiiho weera Miyo ti Mwaana a Muluku.”

⁷¹Awo yaaheera: “Khaninaatthuna anamoona akina! Noohiiwa nnene ni eyanowaawe muneenaawe.”