Read Makhuwa-Shirima Luuka 24 Bible Online

Luuka 24 - Makhuwa-Shirima bible

Luuka 24

¹Vanihukuni noopacera na esimana, oyaaka ni oxa, asithiyana yaakuxa itthu iye soowunkhelaxa yaareherenraaya ni yaarowa onihiyeni.

²Yaaphwanya nluku ntokotoko na nihiye nikakhiweene,

³mene evolowaka, khayaaphwannye muttembo wa Yeesu.

⁴Etikhinaka hiihaale, vano wootutuxereya asilopwana eeli ni ikuwo saanre ntoko nsuwa yaawaattamela yaawo.

⁵Awo yaahuuramiha nyurusaya ni woova, ni asilopwana yaaweerela: “Heeni mummwaasaasaanyu variyari wa akhwiiye Yoole ori ni okumi?

⁶Owo khamomo! Oovenyerera! Muupuwelele yeeyo ooleenlaaweni nlelo areene ni nyuwo oGalileiya.

⁷‘Ontthuneya weera Mwaana a mutthu avahereriwe mmatatani a anamattheka, akhomeliwe ni avenyerere nihuku nanaararu.’”

⁸Vano yaahuupuwelela maswaawe.

⁹Yaahokolowaaya onihiyeni, yaahaathalihera itthu sootheene seiye oohusera muloko nimmoha, nitho wa akina ootheene.

¹⁰Yaathalihenre itthu seiya arummwa yaari Mariya oMagadalene, Yohana, Mariya amayawe Yakobe, ni akina yaari ni yaawo.

¹¹Awo khayaaroromenle asithiyana. Wa yaawo, maswaaya yaari ntoko masu a anepa.

¹²Wa soothesene, Pedru aaheemela, anatthimakela onihiyeni. Uuramaka, oonne esaanda paahi. Aapwaha ni aahokolowa ootikhineene ni yeeyo yaakhumelenle.

¹³Nihuku nenenenne, eeli a yaawo yeera erowaka wa muttetthe wiitthaniwa Emawusi, waarakamela ikilomeetru* muloko niimoha oYerusaleemu.

¹⁴Mphironi, yaanuuluma mwaha wa sootheene saakhumelenle.

¹⁵Yuulumaka ni etthekulaka hiihaale, Yeesu muneenaawe aawaattamela, anapacera weetta ni yaawo,

¹⁶mene maithwaaya yaahooceelihiwa omusuwela.

¹⁷Owo aahaakoha: “Muntthekulela eheeni mweettaka?” Awo yaaheemela ni ikhovesaya soothanana.

¹⁸Mmoha a yaawo, iitthaniwa Kleyopa, aamukoha: “Nyuwo muri namarwa mmoharu oYerusaleemu, ahisuwelaka itthu sikhumelenlewo wa mahuku yaala?”

¹⁹“Itthu heeni?” Owo aamukoha. Awo yaamwaakhula: “Seiye simukhumelenle Yeesu muNasarete. Aari Mprofeeti oowera ni masu ni miteko ohoolo wa Muluku ni muloko wa atthu wootheene.

²⁰Ahooleli a asaserdoti* ni asitokweenaahu anlamula yaamvaherera weera athoriheliwe okhwa, ni yaamuthomeya.

²¹Hiyo naaweherera weera eera akhale Yoowo aneera aruuhe ovuluwa wa oYixrayeli. Olelo nri nihuku nanaararu okhuma sootheene seiye seereiye.

²²Vano, asithiyana akina variyariwahu aanitutuxa olelo. Yaarowa onihiyeni oyaaka ni oxa,

²³ni khaaphwannye erutthwaawe. Yaahokolowa yeeraka weera yaahiixooniherawo andyelo eweerelaka weera Yeesu ori ni okumi.

²⁴Vanonto, asikhwiihu akina yaarowawo onihiyeni, ni yaaphwanya sootheene ntoko asithiyana yaahimalaaya, mene khaamoonne Yoowo.”

²⁵Owo aaweerela: “Nyuwo onnoohaleelani wiiwexexa ni munnalekela ororomela sootheene seiyo yaalokolenlaaya maprofeeti.

²⁶Khawaatthuneya weera Kristu ahaawe itthusene seiyo ni avolowe moovuwanimwawe?”

²⁷Vano, okhuma Moisesi ni maprofeeti ootheene, aahaathalihera sootheene saalempwa sa Yooworu.

²⁸Yaattamelaka muttetthe yaarowaayawo, Yeesu aakhala ntoko aatthuna opwaherera muhoolo.

²⁹Vano awo yaamunyesereraxa yeeraka: “Mukhale ni hiyo va, niwoko oneera wiilaka, othana ohanle vakhaani omala.” Vano Owo aavolowa weera akhale ni yaawo.

³⁰Areene vameesa ni yaawo, aakuxa ipaawu, anatthapela, anameyanyiha, anaavaha.

³¹Vano maithwaaya yaahuliwa ni yaamusuwela, ni Owo aalakaseya ohoolowaya.

³²Awo yaakohana: “Mirimasahu khasivinghe olelo mphironi Owo uulumaka ni hiyo, anithaliheraka Yoolempwa*?”

³³Yaavenya ni yaahokoleela woowaakuveya oYerusaleemu. Weiwo yaahaaphwanya muloko nimmoha, ni awo yaathukumanne ni yaawo,

³⁴enaweerela: “Ekhaikhai! Apwiya aavenyerera ni ahiixoonihera wa Simeyoni!”

³⁵Eeli ale yaahaathalihera seiyo seereiye mphironi, ni moota yaamusuwenlaaya Yeesu Owo ameyanyihaka ipaawu.

³⁶Yuulumaka hiihaale, Yeesu muneenaawe aahiixoonihera wa yaawo ni aaweerela: “Murettele okhale ni nyuwo.”

³⁷Awo yaatuthuwa ni yaahoova, yuupuwelaka weera yoona munepa.

³⁸Owo aaweerela: “Heeni muntuthuwaanyu ni munghovelaanyu mmurimanimwanyu?

³⁹Moone mmatatanimwaka ni inaawosaka. Ti Yoomi! Mukitave ni moone. Munepa khoonono erutthu, hata makhuva ntoko munoonaanyu Miyo kikhalannaaka.”

⁴⁰Ahimakaru yeeyo, aawoonihera matata ni inaawo.

⁴¹Ehiroromelaka nlelo niwoko na ohakalala ni otikhina, aahaakoha: “Nyuwo mookhalano etthu yooca weera kice?”

⁴²Yaamvaha mpatta mmoha wa ehopa yoowooxiwa,

⁴³ni aakhuura awosa yoonaka.

⁴⁴Vano aaweerela: “Ti yeeyo kooleenlaakani kireene nlelo ni nyuwo: ‘Waatthuneya weera sikwaniheriwe sootheene silempwe mwaha wa Miyo mmalamuloni a Moisesi, mmaprofeetini ni mulivuruni ya icipo.’”

⁴⁵Vano Owo aahaahulela soowuupuwelasaya weera awo ewere wiiwexexa Yoolempwa*.

⁴⁶Aaweerela: “Yoolempwa weera Kristu aarwa ohaawa ni ovenyerera mookhwaani nihuku nanaararu,

⁴⁷nitho weera mwa Nsinanawe waatthuneya olaleiwa orukunxa murima wa miloko sootheene, okhuma oYerusaleemu, weera yaakhele elevelelo ya soottheka.

⁴⁸Nyuwo muri anamoona a itthu seiya.

⁴⁹Miyo kinimoorumihelani Yoowo yoororomelihiwa ya Atithaka, mene mukhale musidadeni mpaka muneeraanyu mwaakhele ikuru sa musulusulu.”

⁵⁰Aaronghiwaawe mpaka vakhiviru wa oBetaniya, Yeesu aaheemexa matata ni aahaareeliha.

⁵¹Aareelihaka hiihaale, aahaahiya ni aawelihiwa wiirimu.

⁵²Vano awo yaamulapa ni yaahokoleela oYerusaleemu ni ohakalalaxa,

⁵³ni yannakhala Mpaani mwa Muluku ehuhu yootheene emuttottopelaka Muluku.