Read Makhuwa-Shirima Luuka 3 Bible Online

Luuka 3 - Makhuwa-Shirima bible

Luuka 3

¹Vano, vayaakhani yanaamuloko niithanu ya omwene wa Tiberiyu Seesari, Ponsiyo Pilaatu aari guvernadori a oYudeiya; Herodi aari tetrarkha* a oGalileiya; munneiye Filipe tetrarkha a wItureya ni oTarakonite, ni Lisaniya tetrarkha* a wAbilene.

²Yaari ehuhuweene yeeyo Ana ni Kayafasi yaaraaya asitokweenexa a asaserdoti*. Ehuhuweene yeele masu a Muluku yaangweela Yohaane, mwaana a Zakariya, munikareni.

³Anneetteetta elapo yootheene ya oYordanu, alaleiyaka opatiso wa orukunxa murima weera yaakhele elevelelo ya soottheka,

⁴ntoko elempwaaya mulivuruni ya masu a mprofeeti Yesaya: “Nsu ninlaleiya munikareni: ‘Mwaarehererele ephiro Apwiya. Ngwookolele ephiro Yaawo.

⁵Maxepa ootheene eniyuuheleliwe, ni nyaako ni mattumuxa ootheene eniikhale oothatawalihiwa. Misewe sookhoromana nsikhale sowookoleliwa, ni iphiro soothipeiya nsikhale soowaataleiya.

⁶Atthu ootheene eniyoone ovuluxa wa Muluku.”

⁷Yohaane aaweerela atthu ancipale yaavenya weera yapatisiwe ni yoowo: “Ekhapira ya inowa! Aweerenleni taani weera mutthawe isara sa Muluku sinkhuveela?

⁸Moonihere soowiima sa orukunxa murima. Muhiixeereleke: ‘Nookhalano Abrahaamu ntoko atithi.’ Vano miyo kinooleelaani weera Muluku onoowera otatuxa maluku ala anamwane a Abrahaamu.

⁹Epaso eri yoolikaneene weera ethikile mikwankhwaari sa nyiri. Nyiri sootheene sihiniima soowiima sooreera, sinoothikiliwa ni sinoovonyeriwa mmooroni.”

¹⁰“Vano, nneereke hai?” yaamukoha atthu ancipale.

¹¹Yohaane aawaakhula: “Yoowo orino mikaandyo miili, akawane ni yoowo ohikhalanne, ni yoowo orino yooca, apake hiihotho.”

¹²Anamaliviha a musoko akina yaahoowatho weera epatisiwe. Awo yaamukoha: “Muhusiha, nneereke hai?”

¹³Owo aaweerela: “Muhilivihetho musoko, ehikhanle ntoko yeeyo entthuneya.”

¹⁴Vano anakhotto akina yaamukoha: “Ni hiyo, nneereke hai?” Owo aawaakhula: “Muhipake etthu ni makhwaankwa, hata muhimoothere mukina moota woowootha, ni muhakalalele nlivonanyu.”

¹⁵Muloko wa atthu waaweherera ni ovilela otokotoko, wiikohaka muneenaaya weeraka Yohaane apaale Kristu.

¹⁶Yohaane aawaakhula ootheene: “Miyo kinoopatisani ni maahi, onimoowatho Mukina ooweraxa okipwaha miyo. Nkiphwanenle otaphula miramba sa ikwawaattasawe. Yoowo anoopatiseni ni Munepa Wootteela ni mooro.

¹⁷Owo onoomukuxa poxoro mmatatanimwawe weera areherere nipuronawe nimveeriwa* etrigu ni athokorore etrigu vatathani, mene anaahise makacapha mmooroni woohimala.”

¹⁸Vano, ni masu mancipale makina Yohaane aalipihera murima muloko wa atthu ni annalaleiya masu ooreeraxa.

¹⁹Wa soothesene, amuhiihaka Yohaane Herodi, tetrarkha* niwoko na Herodiyasi, amwaarawe munneiye Herodi, nitho na itthu soonanara sootheene sikina owo aapankaawe,

²⁰Herodi aamwaandyeereratho etthu yoonanara ela: Aamvonyera Yohaane okaliposo.

²¹Muloko wa atthu weera opatisiwaka, Yeesutho aapatisiwa. Avekelaka, waahuleiya wiirimu,

²²ni Munepa Wootteela waamukhuruwela ni mukhalelo ntoko ekhunda. Vano naahoowa wa wiirimu nsu nimoha neeraka: “Weyo ori Mwanaka oosiveleya. Weyo onkisiveliha Miyo.”

²³Yeesu aarino wookwanaka iyaakha miloko miraru aapacenraawe mitekosawe. Atthu yuupuwela weera Owo aari mwaana a Yoseefe. Yoseefe aari mwaana a Heeli,

²⁴mwaana a Matati, mwaana a Leevi, mwaana a Melikhi, mwaana a Yanai, mwaana a Yoseefe,

²⁵mwaana a Matathiya, mwaana a Amosi, mwaana a Nawume, mwaana a Esili, mwaana a Nagai,

²⁶mwaana a Maathi, mwaana a Matathiya, mwaana a Semeyi, mwaana a Yoseekhi, mwaana a Yooda,

²⁷mwaana a Yohanani, mwaana a Reesa, mwaana a Zorobabeli, mwaana a Salathiyeli, mwaana a Neeri,

²⁸mwaana a Melikhi, mwaana a Adi, mwaana a Koosame, mwaana a Elimadame, mwaana a Eeri,

²⁹mwaana a Yoxuwa, mwaana a Eleyezeri, mwaana a Yoorimi, mwaana a Matati, mwaana a Leevi,

³⁰mwaana a Simeyoni, mwaana a Yuda, mwaana a Yoseefe, mwaana a Yooname, mwaana a Eliyakime,

³¹mwaana a Meleya, mwaana a Mena, mwaana a Matatha, mwaana a Nathami, mwaana a Davide,

³²mwaana a Yixai, mwaana a Obeedi, mwaana a Bowasi, mwaana a Salimoni, mwaana a Naasoni,

³³mwaana a Aminadabi, mwaana a Adimini, mwaana a Arini, mwaana a Hesirooni, mwaana a Perexi, mwaana a Yuda

³⁴mwaana a Yakobe, mwaana a Isaaki, mwaana a Abrahaamu, mwaana a Thara, mwaana a Nakhoore,

³⁵mwaana a Serukhi, mwaana a Ragawu, mwaana a Faleke, mwaana a Eberi, mwaana a Sala,

³⁶mwaana a Kayiname, mwaana a Arifaxade, mwaana a Seemi, mwaana a Nowe, mwaana a Lamekhi,

³⁷mwaana a Mathusala, mwaana a Henookhi, mwaana a Yarete, mwaana a Maleleyeli, mwaana a Kayiname,

³⁸mwaana a Enoosi, mwaana a Seethi, mwaana a Adamu, mwaana a Muluku.