Read Makhuwa-Shirima Luuka 6 Bible Online

Luuka 6 - Makhuwa-Shirima bible

Luuka 6

¹eSaabadu emoha, Yeesu aviraka imatta sa etrigu, oohuseraawe yaapacera ovurula ni ohupula makala ekhuuraka inukusaya.

²aFarisi* akina yaahaakoha: “Heeni mumpakaanyu yeeyo ehintthuniheriwa eSaabadu?”

³Yeesu aawaakhula: “Khamunasome yeeyo aapankaawe Davide, owo ni asikhwaawe yaaraaya ni etala?

⁴Owo aavolowa Mpaani mwa Muluku, ni akuxaka ipaawu sootteelihiwa, aahooca seiyo saatthuniheriwa ociwa ni asaserdoti* paahi. Aahaavahatho asikhwaawe.”

⁵Vano aaweerela: “Mwaana a mutthu ti Apwiya a eSaabadu.”

⁶eSaabadu ekina aavolowa muSinagogani* ni aapacera oxuttiha. Aakhala mwemmwe mulopwana a ntatanawe na moono mulopwana noorakala.

⁷aFarisi* ni anamawera a nlamulo* yannaasaasa nthowa weera emoothere Yeesu. Tivawo yaamuwehawehanxaaya weera yoone Owo aariki amulamihe eSaabadu.

⁸Yeesutho aasuwela yeeyo yuupuwenlaaya, ni aamweerela mutthu a ntata noorakala: “Muvenye ni ngwe variyari va.” Owo aavenya ni aarowa.

⁹Yeesu aaweerela: “Miyo kinookohani: eheeni entthuneya opaka eSaabadu: yooreera, hoye hoye yoonanara, ovuluxa okumi, hoye hoye onanariha okumi?”

¹⁰Vano aahaawehaweha atthu ootheene yamurukureenre, anamweerela mutthu: “Mookole ntatananyu.” Owo aahookola, ni ntata naalamihiwa.

¹¹Vaheera awosa yaanyoonyiwaxa ni yaapacera ovaanela yaaworu weera epake eheeni ni Yeesu.

¹²Wa nihuku nimoha Yeesu aavenya arowaka omwaako weera avekele, ni aamvekela Muluku ohiyu wootheene.

¹³Oxaaka, aawiitthana oohuseraawe ni aahaathanla muloko neeli a yaawo, mwa yaawo aakhalinghaawetho ntoko arummwa.

¹⁴Simeyoni aamvanghaawe nsina na Pedru, munneiye Andreiya, Yakobe, Yohaane, Filipe, Bartomlomeyo,

¹⁵Matheyo, Tomaxi, Yakobe mwaana a Alfeyu, Simeyoni iitthaniwa Zeloti*,

¹⁶Yudasi mwaana a Yakobe, ni Yudasi Iskariyoti aathatungwe namavariha.

¹⁷Yeesu aakhuruwa vamoha ni yaawo ni aaheemela vanipuroni noothatawala. Yaakhala weiwe oohuseraawe ancipale, ni atthu ancipalexa yaarweenle wa elapo yootheene ya oYudeiya, oYerusaleemu ni wa elapo ya ophareiya ya oTiro ni oSidoni.

¹⁸Yaahoowa weera emwiiwe ni elamihiwe ni irettasaya. Awo yaahasuliwa ni minepa soonanara yaalamihiwa.

¹⁹Ootheene yanneerera weera emutave, niwoko ikuru saakhuma wa Yoowo saalamihaka ootheene.

²⁰Aawehaka oohuseraawe, Owo aaheera: “Ooreelihiwa nyuwo oohaawa, niwoko omwene wa Muluku ti wawinyu.

²¹Ooreelihiwa nyuwo vaanaano mumvoliwa etala niwoko mmwivone. Ooreelihiwa nyuwo vaanaano muniinla, niwoko mmwitheiye.

²²Ooreelihiwa nyuwo atthu yoothanyani, yawoomolani, yooruwanani ni yanyohola nsinananyu ntoko nsina noonanara niwoko na Mwaana a mutthu.

²³Mutteeliwe nihuku nenno ni mutuphe ni ohakalala, niwoko ntthuvelonanyu ti ntokotoko wiirimu. Vano, makholowaaya yaapakenle maprofeeti mooteene yoowo.

²⁴Ii! Munoohaawa nyuwo, anamapuha, niwoko mohaakhela opepesiwawanyu.

²⁵Ii! Munoohaawa nyuwo mumvona vaanaano vaava, niwoko mmwivoliwe etala. Ii! Munoohaawa nyuwo muntheiya vaanaano vaava, niwoko mmwiilalamikele ni mmwiinle.

²⁶Ii! Munoohaawa nyuwo ootheene yawuulumelani yooreera, niwoko makholowaaya yaahaapakela mooteene yoowo maprofeeti oolokottha.

²⁷Vano Miyo kinooleelani nyuwo munkiiwa: mwaasivele amwiittanaanyu, ni mwaapakele yooreera yaale anoothanyani.

²⁸Mwaareelihe yaawo anoolaphani, ni mwaavekelele yaale anoohasulani.

²⁹Mukina oomanani nrama nimoha, mumvaheketho nrama nikina. Mukina oorulani malayaanyu, muhimukhoottihere yoowo onoorulanitho mukaandyo.

³⁰Mwaavahe ootheene anoovekelani, ni mukina oneera akuxe yeeyo eri yawinyu, muhinnyeserere woohokoloxerani.

³¹Mwaapakele akina yeeyo nyuwo muntthunaanyu weera yoopakeleni.

³²Ntthuvelo heeni muneeraanyu mwaakhele mwaasivela yaawo anoosivelani? Mpaka anamattheka anaasivela yaawo anaasivela.

³³Ntthuvelo heeni muneeraanyu mwaakhele mwaapakela yooreera yaale anoopakani yooreera? Mpaka anamattheka ampaka hiiho.

³⁴Ntthuvelo heeni muneeraanyu mwaakhele mwawooliha yaale munaaroromelaanyu woohokoloxeranitho? Mpaka anamattheka anoowooliha anamattheka akina eroromelaka waakhelatho yootheene.

³⁵Mwaasivele amwiittanaanyu, mwaapakele yooreera ni ngwoolihe yaawo muhiwehereraka waakhela naari etthu yoohokoloxeriwa. Vano, ntthuvelonanyu nnikhale ntokotoko, ni mmwikhale anamwane a Musulusulu niwoko Owo ti ooreera murima wa yaale oohitthapela ni oonanara.

³⁶Mmoriwe ikharari ntoko Atithinyu ammoriwaaya ikharari.

³⁷Muhithorihe, ni khamurwa muthorihiwa. Muhithoriheleke mmooroni, ni khamurwa muthoriheleliwa mmooroni. Mulevelele, ni mmwileveleliwe.

³⁸Muvahe, ni mmwivahiwe. Aani, muringo wooreera: wookhitteleiya, woosareyaxa mpaka oyeeheiya. Vano, muringo munringelaanyu, mmwiringeliwetho.”

³⁹Yeesu aahaaleelatho yoolikanyiha ela: “Mutthu oohoona onoowera omweettiha mutthu oohoona mukina? Khaanrowa omorela ooweeli mulittini?

⁴⁰Oohusera khahiyono oottittimeheiya ompwaha muhusihaawe. Ootheenetho yaale eneera erehereriwe nnenesene eniikhale ntoko muhusihaaya.

⁴¹Heeni munaasaanyu ekokhola eri muniithoni na munninyu, muhoonaka etthaabwa eri muniithonimwanyu?

⁴²Ongwereya hai nyuwo omweerela munninyu: ‘Munnaka, muhiyeke kivenxe ekokhola eri muniithonimwanyu,’ nyuwo muhiweraka woona etthaabwa eri muniithonimwanyu? Namwiixeera! Muvenxe toko etthaabwa eri muniithonimwanyu, ni vahoolowaya munimoona nnenesene weera muvenxe ekokhola eri muniithoni na munninyu.

⁴³Khoowowo mwiri wooreera oniima soowiima soonanara, ni khoowowo woonanara oniima soowiima sooreera.

⁴⁴Nyiri sootheene sinsuwanyeya ni soowiimasaya. Khaawo anrukula ifiigu sa nyiiwa, hata iwuuva* sa nyiri sa nyiiwa.

⁴⁵Mutthu ooreera onkhumiha itthu sooreera siri mmuhakhuni wooreera ori mmurimanimwawe, ni mutthu oonanara onkhumiha itthu soonanara siri mmuhakhuni woonanara ori mmurimanimwawe. Vano, eyanowaawe enuuluma yeeyo esareiye mmurimanimwawe.

⁴⁶Heeni munkiitthanaanyu Apwiya, Apwiya, muhipakaka yeeyo kinghimaaka?

⁴⁷Miyo kinoowooniherani olikannaaweno yoole ongwa wa Miyo, oniiwa maswaaka ni ontthariha.

⁴⁸Owo onlikana mulopwana atekaka empa, aathipa woowiixa ni aapaka mathipelo vamwala. Siwaaka mirupi, mooloko waakusakula empa, khawaawenretho ottikinya empa ele, niwoko yaalipa.

⁴⁹Yooletho oniiwa maswaaka, ahiiwelelaka kinoomulikanxa ni mulopwana aatenke empa vatthayani yoohikhalano mathipelo. Okusakulakaru mooloko empa ele, yaapittuwa ni ophwateiyawaya waahaatta.”