Read Makhuwa-Shirima Luuka 7 Bible Online

Luuka 7 - Makhuwa-Shirima bible

Luuka 7

¹Amalihaka oleela sootheene iye muloko wa atthu, Yeesu aavolowa oKafarnawu.

²Weiwe aamvoreiwa murumeiyi a kenturiyoni* mmoha, ahalaka vakhaani okhwa. Vano, apwiyaawe yaamusivela vancipale.

³Owo aahiiwa suulummwaka sa Yeesu ni aahaarumiha asitokweene a aYuda, emvekelaka weera amulamihe murumeiyaawe.

⁴Ephiyaka wa Yeesu, yaamudyoonttelela ni ovilela: “Mulopwana owo omphwanela weera Nyuwo mumpakele yeeyo,

⁵niwoko owo onnasivela mulokwaahu ni aateka eSinagogaahu*.”

⁶Yeesu aarowa ni yaawo. Ekhuveelaka vaate, kenturiyoni* aahaarumiha akhwaawe weera yaamuleele Yeesu: “Apwiya, muheeteteiye, niwoko nkiphwanenle owaakhelelani vathi wa nipathonaka.

⁷Hiihotho nkinuupuwela weera koophwanela woociceerani. Muulume nsu nimoha paahi, ni murimeiyaaka anaalamihiwe.

⁸Vano, miyo kookhalanotho asitokweenaaka kimphwanelaaka owiiwelela, ni anakhotto ankiiwelela miyo. Kimmweerela mukina : ‘Orowe!’ ni onoorowa; ni mukina: ‘Owe!’ ni onimoowa. Kimmweerela murumeiyaaka: ‘Opake ela!’ ni onoopaka.”

⁹Woowiiwa seiye, Yeesu aatikhina ni yoowo, ni aarukunuwelaka atthu ancipale yaamutthara, aaweerela: “Miyo kinooleelani weera nkiphwannye hata oYixrayeli nroromelo ntoko nna.”

¹⁰Vano alopwana yaarumihiwe yaahokoleela owaani ni yaamphwanya murumeiyi alamihiweene.

¹¹Vahoolowaya Yeesu aarowa wa esidade yiitthaniwa Nayimi ni oohuseraawe, nitho atthu ancipale yaarowa vamoha ni Yoowo.

¹²Ekhuveelaka mulako wa esidade, eera ateexiwaka mutthu ookhwa, mwanawe mmoharu naamukhweli. Atthu ancipale a esidade yaari ni naamukhweli ole.

¹³Emoonaka, Apwiya yaammorela ikharari ni yaamweerela: “Muhiinle!”

¹⁴Vano aawaattamela ni aatava edyaneesa ya muttembo, ni yaawo yaateenxe yaaheemela. Yeesu aamweerela: “Mmiravo, Miyo kinooleela: ovenye!”

¹⁵Yoowo aakhwiiye aakilaathi ni aapacera otthekula, ni Yeesu aahaavaherera amayawe.

¹⁶Ootheene yaasareya ni woova ni yaamuttottopela Muluku. Awo yaaheera: “Mprofeeti Mutokweene oonikhumelela variyariwahu. Muluku aaxekura muloko wa atthwaawe.”

¹⁷Ihaali iye sa Yeesu saamwaramwareiya mweelaponi yootheene ya oYudeiya ni mweelaponi soowaattamanano.

¹⁸Oohuseraawe Yohaane yaamuleela itthu sootheene iye. Awiitthanaka eeli a yaawo,

¹⁹aahaarumihela Apwiya weera yaakohe: “Nyuwo ti Yoole eera awe, hoye hoye ningweherereke mukina?”

²⁰Erowaka wa Yeesu, alopwana ale yaamweerela: “Yohaane mpatisa oonirumiha weera nookoheeni: ‘Nyuwo ti Yoole eera awe, hoye hoye ningweherereke mukina?’”

²¹Ehuhuweene yeele Yeesu eera aalamihaka atthu ancipale yaarino ikwerere, iretta sitokotoko ni minepa soonanara, nitho awoonihaka oohoona ancipale.

²²Vano Owo aawaakhula arummwa: “Muhokolowe ni mwamuleele Yohaane yeeyo moonnaanyu ni mwiiwalaanyu: oohoona annoona; oorakala anneetta; anamakokho annalamihiwa; oohiiwa anniiwa; akhwiiye annavenyererihiwa, ni masu ooreeraxa annalaleeriwa oohaawa;

²³nitho ooreelihiwa ti yoowo ohinkihovela Miyo.”

²⁴Evenyaka oohuseraawe Yohaane, Yeesu aapacera wuuluma ni atthu ancipale mwaha wa Yohaane eeraka: “Eheeni mwaarongwaanyu woona munikareni? Ettheere entannyiwaka ni epheyo?

²⁵Apaale mwaarongwe woona eheeni? Mulopwana awanreene ikuwo sooreeraxa? Moone, yaawo angwara ikuwo sooreeraxa ni antthara mihakhu, ankhala mpaani sitokotoko sa mamwene.

²⁶Vatthuva, mwaarongwe woona eheeni? Mprofeeti? Aani, Miyo kinooleelani, ompwahatho mprofeeti.

²⁷Owo ti yoole mwaha wa yoowo elempwe: “Miyo nkimurumihe murummwaaka ohoolowanyu; owo anaareherere ephirowaanyu ohoolowanyu.”

²⁸Miyo kinooleelani weera khaawo ongyariwa ni muthiyana ompwaha Yohaane mpatisa. Wa soothesene, ooyevaxa moomweneni wa Muluku ti mutokweene ompwaha yoowo.”

²⁹Muloko wa atthu wootheene mpaka anamaliviha a musoko, yiiwaka masu a Yeesu, yaahaakhulela weera ephiro ya Muluku ti ya ekhaikhai, niwoko yaapatisiwa ni Yohaane.

³⁰Vaheera aFarisi* vamoha ni anamawera a nlamulo* yaakhootta otthuna Muluku aakhalannaawe ni yaawo, niwoko khayaapatisiwe ni Yohaane.

³¹Yeesu aapwaherera wuuluma: “Vano, ni eheeni kineeraaka kilikanxe ekhapira ela? Eri ntoko eheeni?

³²Eri ntoko anamwane ekilaantheene omerekadu, ekhuwelelanaka akina ni akwaaya yeeraka: ‘Hiyo noowiipelani mpetta, mene khamwiinale; naahiipa ecipo yoolalamika, mene khamwiinlale.’

³³Vano, aahoowa Yohaane mpatisa ahicaaka epaawu, hata ahiwuraka eviinyu, ni muneera: ‘Owo ookhalano munepa woonanara.’

³⁴Aahoowa Mwaana a mutthu acaaka ni awuraka, ni muneera: ‘Ori vawo Namaca ni Namawura, Nthamwenaaya anamaliviha a musoko ni anamattheka.’

³⁵Miruku sinooniheriwa ntoko ekhaikhai ni anamwanaaya ootheene!”

³⁶Iitthaniwaka Yeesu ni muFarisi* mmoha weera ace ni yoowo, Yeesu aarowa owannyawe ni aakilaathi vameesa.

³⁷Asuwelaka weera Yeesu eera acaaka vaate wa muFarisi*, muthiyana mukina a esidade yeele, namattheka mmoha, aaruuha mukoomba wa alabastre ni makhura oowunkhelaxa ni

³⁸aaheemela ottuli wa Yeesu vanaawoni. Iinlaka, aapacera onaaniha inaawo sa Yeesu ni maithoraawe. Vahoolowaya aahuukuttha ni mayihaawe inaawo sa Yeesu, anabeeca inaawo iye anattikitthela ni makhura oowunkhelaxa.

³⁹Oonaka yeeyo, muFarisi* aamwiitthanne Yeesu aahiixeerela: “Mulopwana Ola aari mprofeeti, aamusuwela taani onimutava ni muthiyana heeni yoola: namattheka!”

⁴⁰Yeesu aamwaakhula: “Simeyoni, kintthuna wooleelani etthu.” Owo aamwaakhula: “Mukileele, Muhusiha.”

⁴¹Yeesu aamweerela; “Atthu eeli yaamukopela namakopiha. Mmoha aamukopela idinaariyu* macira mathanu, ni mukina idinaariyu* miloko mithanu.

⁴²Khaawo ooweeli yaawera oliva, tivawo namakopiha aalevelenlaawe ooweeli ikoongorisaya. Taani a yaawo eeli aneera amusivele namakopiha ompwaha mukina?”

⁴³Simeyoni aamwaakhula: “Kinuupuwela weera ti yoole oleveleliwe idinaariyu* macira mathanu.” Yeesu aaheera: “Ti hiiho paahi.”

⁴⁴Vahoolowaya, aamurukunuwela muthiyana ni aamweerela Simeyoni: “Moomoona muthiyana ola? Miyo koovolowa mpaanimwanyu, mene nyuwo khamukivanghe maahi weera kirapihe inaawosaka. Olatho oonaaniha inaawosaka ni maithoraawe ni ohuukuttha ni mayihaawe.

⁴⁵Nyuwo khamukuuluminghe ni ebeecu, mene muthiyana ola, kivolowakaru va, khahiyerenre obeeca inaawosaka.

⁴⁶Nyuwo khamukittikitthenle muruwaaka ni makhura, mene owo ohiitthela makhura oowunkhelaxa vanaawoniwaka.

⁴⁷Tivawo, Miyo kinooleelani: sootthekasawe sincipale sooleveleliwa, niwoko owo oosivela vancipale. Yooletho onleveleliwa vakhaani, onsivela vakhaanitho.”

⁴⁸Vano Yeesu aamweerela muthiyana: “Sootthekasanyu sooleveleliwa.”

⁴⁹Oolattuliwa akina yaapacera weerelana yaworu: “Ola taani mpaka onlevelela soottheka?”

⁵⁰Yeesu aamweerela muthiyana: “Nroromelonanyu nohoovuluxani. Murowe mmuretteleni.”