Read Makhuwa-Shirima Luuka 8 Bible Online

Luuka 8 - Makhuwa-Shirima bible

Luuka 8

¹Vahoolowaya Yeesu anneetteetta musidadeni ni mmittettheni sikina, alaleiyaka masu ooreeraxa a omwene wa Muluku. Vano oohusera muloko neeli yaari ni Yoowo,

²nitho asithiyana akina yaalamihiwa ni minepa soonanara ni iretta. Aari Mariya iitthaniwa oMagadalene, mwa yoowo saakhumme minepa soonanara mithannamiili,

³Yohana, mwaariye Kuza, mutokweene a empa ya Herodi, Susana ni akina ancipale. Asithiyana ala yannaakhavihera yaawo ni sooreelasaya.

⁴Ethukumanaka atthu ancipale ni ewaaka wa Yeesu atthu a isidade soohiyanahiyana, Yeesu aahaathalihera yoolikanyiha ela:

⁵“Namwaala aavenya weera aale. Aalaka mmiso, mpatta mmoha waamorela mukerekhere wa ephiro. Waanyikaliwa, ni apalame a wiirimu yaahooca.

⁶Mpatta mukina waamorela vamalukuni, ni waamenlaaya, waahuuma niwoko khayaariwo maahi.

⁷Mpatta mukina waamorela vanyiiwani sunnungwe vamoha ni mmiso, ni mmiso ole waavuvuriwa.

⁸Mukinatho waamorela vatthayani yooreera, waahunnuwa ni waahiima soohepha sooreera imaara ncira opwaha waaliwe.” Aahimaawe yeeyo, Yeesu aakhuwela: “Yoowo orino maaru oowiiwa, iiweke!”

⁹Oohuseraawe yaamukoha etaphulelo ya yoolikanyiha ele.

¹⁰Owo aaweerela: “Wa nyuwo moovahiwa esuwelo ya ixiiri sa omwene wa Muluku, mene wa akina Miyo kinnaaleela ni soolikanyiha weera: “yoonaka, khaanoona, ni yiiwaka, khaaniiwexexa.”

¹¹Etaphulelo ya yoolikanyiha ti ela: Mmiso ti nsu na Muluku.

¹²Mmiso waamorenle mukerekhere wa ephiro ti yaawo aniiwa. Vano, ongwa Diyabu* ni omvenxa nsu mmirimanimwaya, weera ehiroromele, hata ehivuluxiwe.

¹³Mmiso waamorenle vamalukuni ti yaawo yiiwaka masu anaakhelela ni ohakalala, mene khaanono mikwankhwaari. Anroromela ehuhu ya vakhaani, mene yaaphiyaka ehuhu yooweereriwa, anoohiya.

¹⁴Mmiso waamorenle vanyiiwani ti yaawo aniiwa, mene epwahereraka, anoovuvuriwa ni sooweeteteela, mihakhu, ni soohaawela sa okumi. Vano khaaniitthwa.

¹⁵Mmiso waamorenle vatthayani yooreera ti yaawo aniiwa nsu na Muluku ni murima wooreera ni wa nnene, ansunga nno mmirimanimwaya, ni anniima soowiima moovilelani.

¹⁶Khaawo ompattiha onyaari ni ompopheela ni elaata, hoye hoye oniikaathi vathi vabeettini. Ohiyanawaya, oniikaathi vanipuroni nootthuneya, weera yaawo amvolowa yooneke.

¹⁷Vano, itthu sootheene sa wiiphiini nsikhale soothupululiwa, nitho itthu soovithiwa nsikhale soosuwelihiwa ni soowiiheriwa ngwaarani.

¹⁸Tivawo, muupuwele nnenesene moota woowiiwa nyuwo. Owo orino, onoovahiwatho. Vaheera owo ohikhalanne, mpaka yeeyo onuupuwelaawe weera ookhalano, onimwaakhiwa.”

¹⁹Amayawe Yeesu ni axunneiye yaarowa weera emoone, mene yaahooceela omwaattamela niwoko na atthu ancipale.

²⁰Vano mukina aamweerela Yeesu: “Amayinyu ni axunninyu ari vaate, ni antthuna wuuluma ni Nyuwo.”

²¹Yeesu aamwaakhula: “Amayaka ni axunnaka ti yaale aniiwa masu a Muluku ni aniiwelela yaawo.”

²²Nihuku nimoha Yeesu aaweerela oohuseraawe: “Nrowe nilapuwele okhopela wa enyandya.” Awo yaavolowa munikulani ni yaapwaha.

²³Yeettihaka nikula, Yeesu aakona. Vano, yaakhumelela weera ettheku yaakhuruwela vanyandyani moota wooweera naapacera osareya nikula maahi, ni awo yaavalavelaxa.

²⁴Oohusera yaamvenxa Yeesu, ekhuwelaka: “Muhusiha, Muhusiha, nnooriheya!” Owo aavenya, anahiiha epheyo ni mitekuteku. Vano sootheene saamaala.

²⁵Aahaakoha oohuseraawe: “Nroromelonanyu nri woowi?” Etuthuwaka ni etikhiniheiyeene, awo yaakohana yaworu: “Taani Ola? Mpaka onlamulela epheyo ni mitekuteku, ni seiye simmwiiwelela?”

²⁶Yaaheettiha erowaka mweelaponi ya oGeraseno, yaari okhopela wa oGalileiya.

²⁷Akhuruwakaru Yeesu, aamukumanano Yoowo mutthu a esidade aarino minepa soonanara. Okhuma khalayi owo khaawara, hata khaakhala vaate, mene variyari wa mahiye.

²⁸Amoonaka Yeesu, aakhuwela, anuuwela vanaawoni sa Yeesu, anamweerela akhuwelaka vancipale: “Muntthuna eheeni ni miyo, Yeesu, Mwaana a Muluku Musulusulu? Kinoodyoonttelelani weera muhikittaruxe.”

²⁹Vano, Yeesu ahinaaye aalamulela weera munepa woonanara okhume wa mulopwana ole. Imaara sincipale munepa ole wannamvara. Hata ni inaawo ni matata ootthukiwa ni onyooro ni innyereriweene wa anamalipelela, owo annapasa onyooro ni annaronghiwa ni munepa woonanara vanipuroni na meekhaawe.

³⁰Yeesu aakoha: “Nsinanawo taani?” Munepa waamwaakhula: “Elexawu*.” Minepa soonanara sincipale saavolowa mwa mulopwana ole.

³¹Minepa soonanara iye saamdyoonttelela Yeesu weera ahilamulele vanipuroni noowiixeraxa.

³²Nakupa mutokotoko a ikhumba eera acaaka vanttumuxani nne. Minepa soonanara saamdyoonttelela Yeesu weera atthunihere ovolowa munakupani mmwe, ni Yeesu aatthunihera.

³³Sikhumaka mwa mulopwana, minepa iye saavolowa munakupani mmwe, ni nakupa ootheene aatthimaka arowaka oxepani mpatta wa ephareiya, ni aamireiyamo.

³⁴Yoonaka itthu seereiye, awo yaakukhula ikhumba yaatthawa ni yaathaliha itthu iye musidadeni ni mmawaani,

³⁵ni muloko wa atthu waarowa weera woone yeeyo yeereiye. Omwaattamelaka Yeesu, waamoona mulopwana mwa yoowo saakhumme minepa soonanara, akilaantheene vanaawoni sa Yeesu, awanreene ni uupuwelaka nnenesene. Vano awo yaahoova.

³⁶Yaawo yoonne eyo yaathalihera muloko wa atthu moota mulopwana ole aalamihiwaawe.

³⁷Vano muloko wa atthu wootheene a elapo ya oGeraseno waamudyoonttelela Yeesu weera apwahe, niwoko waasareya woova. Owo aavolowa munikulani, anahokolowa.

³⁸Mulopwana mwa yoowo saakhumme minepa soonanara aamudyoonttelela Yeesu weera amutthunihere orowa ni Yoowo. Yeesutho aamulaxera, amweerelaka:

³⁹“Muhokoleele owaani ni mwaathalihere atthu yeeyo Muluku oopakenlaaweni.” Hiiho mulopwana aarowa ni aahaathalihera atthu ootheene a esidade yeeyo Yeesu ampakenlaawe yoowo.

⁴⁰Aahokolowaawe Yeesu, atthu ancipale yaamwaakhelela, niwoko ootheene yaamungweherera.

⁴¹Vano mulopwana iithaniwa Yairu, muhooleli a eSinagoga*, aahoowa ni aahuuramela vanaawoni sa Yeesu, amudyoonttelelaka weera arowe owannyawe,

⁴²niwoko mwanawe, muthiyana mmoharu, aahanle vakhaani okhwa. Mwaana ole aari wookwanaka iyaakha muloko ni piili. Yeesu areene mphironi, atthu ancipale yaamwaameleliha.

⁴³Vanonto, aari vaavaawo muthiyana mmoha aahaawa iyaakha muloko ni piili ni eretta ya okhuma ephome. Aamaliha muhakhwaawe wootheene ni mameediku, mene khaawo yaawera omulamiha.

⁴⁴Owo aaheemela ottuli wa Yeesu, aatava nleembe na soowarasawe, ni woowaakuveya ephome yaamaala okhuma.

⁴⁵Yeesu aahaakoha: “Taani okitamve?” Vano, ekhoottaka ootheene, Pedru aamweerela: “Muhusiha, atthu ancipale ala ammaraana variyariwanyu ni angwaamelelihani.”

⁴⁶Yeesutho aaheera: “Ookhala okitamve. Koosuwela weera wa Miyo sookhuma ikuru.”

⁴⁷Muthiyana ole, oonaka weera khaawera opwaha akina ehinaaye omusuwela, aahoowa athukumelaka ni aahuuramela vanaawoniwawe. Vamaithoni wa ootheene, aamuthalihera Yeesu heeni aamutamvaawe, nitho weera aalamihiwa woowaakuveya.

⁴⁸Yeesu aamweerela: “Mwaana, nroromelonawo nohoolamiha. Orowe mmuretteleni.”

⁴⁹Yeesu nlelo uulumaka, aaphiya mukina a owannyawe Yairu, muhooleli a eSinagoga*, ni aamweerela: “Mwaninyu ohookhwa. Muhimuxupetho Muhusiha.”

⁵⁰Iiwalaawe yeeyo, Yeesu aamweerela Yairu: “Muhoove, muroromele paahi, ni owo onoolamihiwa.”

⁵¹Aphiyaka owannyawe Yairu, Owo khaamutthuninghe ovolowa mutthu mukina ni Yoowo, ahikhanle Pedru, Yohaane, Yakobe ni atithawe ni amayawe mwaana.

⁵²Ehuhu emoha yeeyo, muloko wootheene weera olalamikaka ni omwiinlelaka mwaana. Yeesu aaheerela: “Muhiinle, owo khakhwiiye, mene onookona.”

⁵³Awo yaamutheiya, esuwelaka weera ohookhwa.

⁵⁴Vano Owo aamvara ntata, anamweerela: “Mwaamwali, ovenye!”

⁵⁵Munepaawe waahokolowa ni aavenya woowaakuveya. Vano Yeesu aahaalamulela weera emvahe yooca.

⁵⁶Asinaangolowaawe yaatikhinaxa, mene Yeesu aahaalamulela weera ehaaleele akina yeeyo yeereiye.