Read Makhuwa-Shirima Deuteronomiyo 1 Bible Online

Deuteronomiyo 1 - Makhuwa-Shirima bible

Deuteronomiyo 1

¹Ala ti masu Moisesi aaleenlaawe aYixrayeli ootheene munikareni mpatta ninkhuma nsuwa oYordanu, eyo tiiyo wAraba — ohoolo wa oSufi, eriyari ya oParani ni oTofeli, oLabani, oHazeroti ni oDizahabi.

²Vano ophiya oKadexi-Bareneya okhuma oHorebi ni musewe wa mwaako Seyiri ammala mahuku muloko ni nimoha.

³Vayaakhani miloko mixexe, vanihukuni noopacera na mweeri wanaamuloko nimmoha, Moisesi aahaalaleera aYixrayeli malamulo ootheene Yave aamulamulenlaawe mwaha wa yaale.

⁴Eyo yeereiye angwinneene Sihoni, mwene a awAmori aalamula oHexeboni, ni wEdereyi aangwinneene Ogi, mwene a oBaxani aalamula wAsterote.

⁵Moisesi aapacera othalihera malamulo mpatta ninkhuma nsuwa, mweelaponi ya oMowabe, eeraka:

⁶Yave Mulukwaahu aaneerela oHorebi: “Nyuwosa moolekela mwaakweene yoola.

⁷Muteexase iheemasanyu, murowe wa elapo ya mmanyaakoni sa awAmori; murowaka miloko soowaattamana sootheene wAraba, wa vathi wa nyaako, wa oNegeba ni wa mukerekhere ephareiya, elapo ya aKanaani ni oLibanu, mpaka mooloko mutokokweene Efratesi.

⁸Moone, kohoovahani elapo eyo. Mwavolowe ni mwakuxe elapo Yave aaroromelinghaawe ni nlipelo waavaha makholowaanyu Abrahaamu, Isaki Yakobe ni ekhapiraaya.”

⁹Ehuhuweene yeele miyo kaaweerelasani: “Nkingwera woohoolelani meekhaaka.

¹⁰Yave Mulukwaanyu oowaandyeererasani moota wooweera olelo khamureere ntoko ithenyeeri sa wiirimu.

¹¹Yave Muluku a makholowaanyu awaandyeereraseni imaara imaarasene ooreelihaseni ntoko oororomelinghaaweni!

¹²Wa sootheesene nkingwera ohoolela meekhaaka sookacamihasanyu, soolemelasanyu ni milattusanyu.

¹³Vanonto, mwaathanle asilopwana a miruku, oosuwela ni akhoveleli a khula nihimo na ipuumbasanyu ni miyo kinimwaakhaliha asitokweenaanyu.”

¹⁴Nyuwosa okaakhula mweenre weera ti wooreera otthara yoohimaanyu.

¹⁵Hiiho kaahaathukumanyiha mapwattapwattha a ipuumba ari a miruku ni akhoveleli, kinaakhaliha asitokweene a macira muloko, a ncira, a miloko mithanu ni akina a muloko waahiya ahooleli a khula epuumba.

¹⁶Ehuhuweene yeele kaahaalamulela aphukaanyu: “Mwaakhule sookacamiha sa axunninyu muthorihaka ni ekhaikhai — khoohiyono emusaanyuru, menetho muYixrayeli ni namarwa.

¹⁷Muhithorihe ni nthalu, mene mmwaakhulele okhuma mutokweene mpaka mukhaani. Muhimoove akhalaru mutthu, niwoko othoriha ti wa Muluku. Yakhala makacamiho oowoorikaxani, mukiruuhele. Kinooreherera.”

¹⁸Ehuhuweene yeele kaahooleelani sootheene saatthuneya opaka.

¹⁹Vahoolowaya, ntoko Yave Mulukwaahu aanilamulenlaawe, hiyo naattimula oHorebi, ninarowa wa elapo ya mmanyaakoni sa awAmori niviraka munikareni ntokotoko ni noowoopiha nne nyuwosa moonnaanyu, ninaphiya oKadexi-Bareneya.

²⁰Vano kaaweerelasani: “Moophiya mweelaponi ya mmanyaakoni sa awAmori Yave Mulukwaahu onnivaahaawe.

²¹Moone, Yave Mulukwaanyu ohiikaati elapo ela ohoolowanyu. Murowe, mwakuxe, ntoko Yave, Muluku a makholowaanyu oweerenlaaweni. Muhoove hata muhiporore.”

²²Ootheene nyuwosa mwaakaattamela mweeraka: “Munirumihele asilopwana akina ohoolowahu weera yahottele elapo ni enileele ephiro heeni nneeraahu nivire ni isidade heeni nneeraahu nirowe.

²³Yoohimaanyu yaakireera, tivawo kaathanlalaaka asilopwana muloko neeli, mmoha a khula epuumba.

²⁴Awosa yaawelela mweelaponi ya mmanyaakoni, enaphiya oreyareyani na wEskoli, enahottelawo.

²⁵Ekuxaka soowiima sikina sa elapo ele, yaanithalihera: ‘Elapo eyo Yave Mulukwaahu onnivahaawe ti yooreera.’”

²⁶Wa soothesene, khamwaatthunne orowa, muhiiwelelaka Nlamulo na Yave Mulukwaanyu.

²⁷Mwaattaandawula mmahemanimwanyu mweeraka: “Yave onnanithanya, tivawo aanikhumihalaawe wExipitu weera aninnyerere mmatatani mwa awAmori weera niphwatiwe.

²⁸Nnikele woowi? Axunnihu aanipororiha yeerakaru: ‘Atthu a weiwo ti oolipaxa ni oorakamaxa oonipwaha hiyo. Isidadesaya ti sitokotoko sikhalanaka ixiri soorakamela osulu. Noowoonawotho awAnaki.’”

²⁹Vano miyo kaaweerelasani: “Muhituthuwe, muhiwoove.

³⁰Yave Mulukwaanyu onrowa ohoolowanyu onimoowanelasani nyuwo moonaka ntoko aapankaawe wExipitu.

³¹Munikareni mwaahoonatho moota Yave Mulukwaanyu ookuxansaaweni mphironi moothemwene mviravinraanyu mpaka nipuro nna, ntoko tiithi onimkuxaawe mwanawe.”

³²Wa soothesene, khamunroromenle Yave Mulukwaanyu,

³³mwa Yoowo oohoolenleni ohoolowanyu, ohiyu munrimbuni na mooro ni othana munihutteni awaasaaserakani mapuro ookonela ni awooniherakani ephiro yookuxera.

³⁴Yave iiwakaru yeeyo mweenraanyu, aanyoonyiwa, anaroromeliha ni nlipelo:

³⁵“Khaawo a ekhapira yoonanara ela anoone elapo yooreera kaaroromelinghaaka waavaha makholowaanyu,

³⁶ahikhanle Kalebi, mwaana mulopwana a Yefune. Owo aneera oone ni Miyo kinoomvaha owo ni ekhapiraawe elapo yoowo ovinraawe, niwoko aamutthara Yave ni murimaawe wootheene.”

³⁷Yave aakinyoonyeriwa miyotho niwoko na nyuwo, akeerelaka: “Nyuwotho khamuvolowawo.

³⁸Wa soothesene, namakhaviheraanyu, Yoxuwa, mwaana mulopwana a Nuni, ti anaavolowe. Munlipihere, niwoko ti yoowo anaahoolele muloko wa aYixrayeli weera okuxe elapo eyo.

³⁹Vanonto, anamwaniinyu asikhaani, mwa yaale mwaaweerenlaanyu weera anrowa okuxiwa ntoko ipottha sa okhottoni, eyo tiiyo anamwaniinyu ahisuwenle yooreera ni yoonanara, ti eniivolowemo. Kinimwaavaha elapo eyo ni awo eniikuxe.

⁴⁰Wa soothesene, wa nyuwo, murukunuwe ni muroweke munikareni mutthareke ephiro enkela Ephareiya Yooxeera.”

⁴¹Vahoolowaya mwaahaakhula: “Noomutthekela Yave. Hiyo nnirowe ni nniwane ntoko Yave Mulukwaahu onilamulenlaawe.” Hiiho nyuwo ootheene mwaakuxa ikapwitthisanyu muupuwelaka weera onookhweya owelela elapo ya mmanyaakoni.

⁴²Wa soothesene, Yave aakeerela: “Mwaaleele weera ewelelase hata ehiwaneru, niwoko nkinkhala ni yaawosa. Anoowiniwa ni amwiittanaaya.”

⁴³Vano miyo kaahooleelasani yeeyo, mene khamwaakiiwelenle. Khamwiiwelenle Nlamulo na Yave ni ngwiixoonanimwanyu mwaawelela elapo ya mmanyaakoni.

⁴⁴awAmori yaakhala weiwo yaahoowananani ni yahoottharelelasani ntoko muupattetthe yoowinakani okhuma oSeyiri mpaka oHorema.

⁴⁵Mwaahokolowasa muniinla vamaithoni wa Yave, mene Owo khiiwale wiikhupanyerawanyu hata khoopwatthanseni.

⁴⁶Vahoolowaya mwaakhala oKadexi mwaalekelanxaanyuwo.