Read Makhuwa-Shirima Deuteronomiyo 10 Bible Online

Deuteronomiyo 10 - Makhuwa-Shirima bible

Deuteronomiyo 10

¹Ehuhuweene yeele Yave aakeerela: “Mwaattule itthaabwa piili sa maluku ntoko seiye soopacera ni mukaattamele vamwaako. Mwaapaketho Arka* a mwiri.

²Miyo kinoolepa vatthaabwani masu yaarimo soopacera mwa seiyo mpwenxaanyu. Vano mwiikaathi mwa Arkani*.”

³Hiiho kaahaapaka Arka* a mwiri wa akaasiya*, kinaattula itthaabwa piili sa maluku ntoko seiye soopacera, kinawela vamwaako kikuxaleene itthaabwa piili.

⁴Yave aalepamo yeele aalempaawe woopacera, eyo tiiyo Malamulo Muloko, mwa yaawo oothalihenraaweni vamwaako, mmooroni, vanihukuni na muthukumano. Vanonto, Yave aakinnyerera,

⁵kinahokolowa kikhuruwaka vamwaako, kiniikaathi itthaabwa piili mwa Arkani* kaapankaaka. Vano siri mwemmo ntoko Yave aakilamulenlaawe.

⁶Vano, aYixrayeli yaattimula mmahimeni sa aYaakani erowaka oMosera. Weiwo okhwenlaawewo Aharoni, anavithiwa ni Mwanawe, Eleyazari, ti aamurandenle osaserdoti*.

⁷Okhuma vaavaale yaarowa oGudegoda ni vahoolowaya oYotebata, elapo yoosareya maxaapwa.

⁸Ehuhuweene yeele Yave aathanla epuumba ya aLeevi weera yaateexe Arka* a wiiraana a Yave; yeemele vamaithoni wa Muluku erumeelaka ni weera elaleiyeke mareeliho mwa Nsinanawe, ntoko empakeyaaya olelo.

⁹Tivawo aLeevi ahikhalannaaya ettima hoye hoye yoohiyeriwa variyari wa axunnaya eenre Yave akhalaka yoohiyeriwaaya, ntoko Owo aaroromelinghaawe.

¹⁰Vanonto, kaakhala vamwaako wookwana mahuku miloko mixexe ntoko kaapankaaka emaara yoopacera ni Yave aakiiwatho emaara ele. Owo khaatthunne woophwatani.

¹¹Yave aakeerela: “Murowe ni mwahoolele muloko mphironimwaya weera wakuxe elapo kaalipelenlaaka makholowaaya woovahani.”

¹²Vanonto, aYixrayeli, otthuna wa Yave Mulukwaanyu ti weera mmoove Yave Mulukwaanyu, mweette mphironimwawe, munsivele, munrumeele ni murimaanyu ni okumaahu wootheene, ni

¹³weera mwiiwelele malamulo ni ikano sa Yave miyo kinoovahaakani olelo wa mpuhaanyu.

¹⁴Wiirimu wootheene ni elapo ya vathi vamoha ni sootheene sirimo ti sa Yave Mulukwaanyu.

¹⁵Yave aahaatthuna makholowaanyu, aasivelaka ni aahoothanlani nyuwo, muri ikhapirasaya, variyari wa miloko sootheene, ntoko onooneyaaya olelo.

¹⁶Tivawo, siineleye mirimasanyu ni muhikhaletho oottiyamaaru,

¹⁷niwoko Yave Mulukwaanyu ti Muluku a miluku ni Yave aasipwiiya; Muluku Mutokweene, Ooweraxa ni Oowoopiha, oohinthalu, akhoottaka makhwankwa.

¹⁸Owo onniwaakiha akwaasuni ni asinaamukhweli amusivelaka namarwa amvahaka yooca ni yoowara.

¹⁹Mwaasivele anamarwa niwoko nyuwosa mwaaritho anamarwa wExipitu.

²⁰Mmoove Yave Mulukwaanyu ni munrumeeleke. Mumvarexexe Yoowo mulipelaka Nsinanaweru.

²¹Owo ti ottottopeleyawawe, Mulukwaanyu mwa Yoowo oopakenleni sootikhiniha sitokotoko ni soowoopiha moonnaanyu ni maithwaanyu.

²²Makholowaanyu yaarongwe wExipitu yaari miloko mithannamiili, mene vano Yave Mulukwaanyu oowaandyeererasani ntoko ithenyeeri sa wiirimu.