Read Makhuwa-Shirima Deuteronomiyo 11 Bible Online

Deuteronomiyo 11 - Makhuwa-Shirima bible

Deuteronomiyo 11

¹Munsivele Yave Mulukwaanyu mwiiwelelaka soorumasawe, ikanosawe, malamulowaawe ni sootthunasawe mahuku ootheene.

²Muupuwelele weera anamwaniinyu khaasuwenle naari khayoonne olaka wa Yave Mulukwaanyu, ovuwawawe, ntatanawe ni moonowaawe woolipaxa.

³Nyuwosa mwaahoona ineneero ni sootheene sikina aampakenlaawe Farawu*, mwene a wExipitu ni elapwaaweene yootheene.

⁴Mwaahoona yeeyo aapakenlaawe anakhotto a wExipitu, ikavalusaya* ni ikaarosaya sa ikavalu*, moota aatutuxenraawe ni maahi a Ephareiya Yooxeera, awosa yoottharelelasaayani ni moota Yave aaphwantaawe khuluwi.

⁵Mwaahoonatho yeeyo oopakenlaaweni munikareni mpaka ophiyawanyu nipuro nno,

⁶ni yeeyo aampakenlaawe Datani ni Abirami, anamwane asilopwana a Eliyabi, muRubeni, yaattakaneenlaaya vathi ni imusisaya, iheemasaya ni sootheene yaarinaaya aYixrayeli yoonaka.

⁷Mwaahoona ni maithwaanyu itthu sitokotoko sootheene iye Yave aapankaawe.

⁸Tivawo, mwiiwelele malamulo ootheene kinoovahaakani olelo weera mphwanye ikuru soovolowela ni owina elapweene yeeyo munrowaanyu, ni

⁹weera mukhale ni okumi mahuku mancipale mweelaponi Yave aaroromelinghaawe ni nlipelo waavaha makholowaanyu ni ikhapirasaya, elapo waattiyaayawo mukaka ni oravo.

¹⁰Elapweene yeeyo munrowaanyu okuxa kheehiyono ntoko elapo ya wExipitu mwa weiwo munkhumaanyuwo ni mwaalaanyuwo inuku munahelela, ntoko muttimbeni.

¹¹Vaheera elapo munrowaanyu okuxa okhopela Yordanu ti elapo ya nyaako ni mareyareya ehinthowaayamo epula.

¹²Ti elapo Yave Mulukwaanyu onkosoopaawe; maithwaawe annapwaherera owehawo okhuma ompacereroni mpaka ommaleloni wa eyaakha.

¹³Tivawo mwiiwelela oororomeleyeene malamulo kinoovahaakani olelo, munsivelaka Yave Mulukwaanyu, munrumeelaka ni murimaanyu ni okumaanyu wootheene,

¹⁴vano, kinoorumihela epula elapwaanyu ehuhu yootthuneya; epula mutthulo ni epula ya mulaala, weera muhephe etrigwaanyu ni mukhaleno eviinyu enyowani ni makhura.

¹⁵Elapo eyo enookhalano woocihamo mihuwosanyu ni nyuwo munimooca mpaka ovona.

¹⁶Mwiipasoope weera muhilokotthiwe muhapuxeriwaka olapa miluku sikina mukokhorelaka ohoolowaya.

¹⁷Mwa yeeyo, isara sa Yave sinimoopattelasani ni Owo onoowala erimu weera ehirupe epula ni etthaya ehimelihe etthu. Hiiho munoophwatiwa woowaakuveya mweelaponi yooreera Yave onoovahaaweni.

¹⁸Muhele vamurimani ni mmuupuweloni maswaaka ala; ngware vantatani ni mutthukelele vayuuci ntoko eneneero.

¹⁹Mwaaxuttihaseke anamwaniinyu malamulo ala mwaathaliheraka nyuwosa mukilaathiyeene owaani hata mweettaka mphironi naari mwiixaatalelaka hoye hoye mvenyaka.

²⁰Mwalepe musereemuni sa impasanyu ni vamulakowanyu.

²¹Hiiho nyuwosa ni anamwaniinyu mmwikhale ni okumi mahuku mancipale mweelaponi Yave aaroromelinghaawe ni nlipelo makholowaanyu; aani wa mahuku ootheene.

²²Mwiiwelela moota woororomeleya malamulo kinoovahaakani olelo munsivelaka Yave Mulukwaanyu, mweettaka mphironimwawe moothemwene mumvarexexaka Yoowo,

²³vano Yave onimoomola miloko sootheene iyo ohoolowanyu ni nyuwosa munoohuhula miloko soowaatta ni soolipa woopwahani nyuwo.

²⁴Mmapuroni moothemwene muneeraanyu mvire eniikhale awinyu. Elapwaanyu eniikhume munikareni mpaka oLibanu ni okhuma mooloko Efratesi mpaka ephareiya ya mpatta ninkela nsuwa.

²⁵Khaawo eniyoowereeni. Yave Mulukwaanyu onoottenguwiha ni woova miloko sootheene sa elapo muneeraanyu murowewo, ntoko Yave Mulukwaanyu oororomelinghaaweni.

²⁶Nnene! Kingwooniherani olelo nreeliho ni nlapho.

²⁷Nyuwosa munooreelihiwa mwiiwelela malamulo a Yave Mulukwaanyu miyo kinoovahasaakani olelo,

²⁸vaheera munoophwatiwa nyuwosa mwaahiiwelela malamulo a Yave Mulukwaanyu muhapuwaka mphironi kinoolamulelaakani olelo, mulapaka miluku sikina soohisuwanyeya.

²⁹Yave Mulukwaanyu ooronghakani mweelaponi yeeyo munrowaanyu okuxa, mwalaleiye mareeliho vamwaako oGerizimi ni nlapho vamwaako wEbali.

³⁰Ntoko musuwenlaanyu nyaako iyo siri okhopela Yordanu, mpatta ninkela nsuwa wa musewe, ninnelaayawo nsuwa, vakhiviru wa nyiri sitokotoko sa oMore, elapo ya aKanaani ankhala wAraba yookhuveela oGiligali.

³¹Nyuwosa muhanle vakhaani omulapuwa Yordanu weera mwakuxe elapo Yave Mulukwaanyu onoovahasaaweni. Mwaakuxaka ni mwaakhalakamo,

³²mwiipasoope weera mwiiwelele ikano ni malamulo ootheene kinoovahasaakani olelo.