Read Makhuwa-Shirima Deuteronomiyo 12 Bible Online

Deuteronomiyo 12 - Makhuwa-Shirima bible

Deuteronomiyo 12

¹Ti seiya ikano ni malamulo sintthuneya nyuwosa weettela wa mahuku ootheene a okumaanyu mukhalaka mweelaponi Yave Muluku a makholowaanyu oovanghaaweni ntoko yoohiyeriwa.

²Mwaphwateke woomalela mapuro ootheene mmanyaakoni soorakamela, mmattumuxani ni vathi wa nyiri weiwo miloko sinlapaaya milukusaya.

³Mwaaphwate altaaraaya mwaapwexakase amarimbwaaya ootteelihiwa ni mwahise nyirisaya soothipeleliwa sa Axera. Mwakakatthanye icaambulo sa milukusaya mmalamalihaka masinaaya mmapuroni awo.

⁴Muhimulape Yave Mulukwaanyu ntoko awo anlapaaya milukusaya.

⁵Ohiyanawaya, mwaasaase nipuro Yave Mulukwaanyu aneeraawe athanle variyari wa ipuumbasanyu sootheene weera ahelewo Nsinanawe ntoko woomakawawe. Ti weiwo ontthuneya orowa

⁶mukuxaka sooveleelasanyu soohisa ni sa enama, mipatta sanaamuloko, samahala sooreerela, mwa seiyo mwaaroromelinghaanyu omvaha, sooveleela sa otthunawanyu ni matthaara a mihuwosanyu sootheene.

⁷Weiwo mmwace ni ohakalala vamaithoni wa Yave Mulukwaanyu, nyuwosa ni imusisanyu, niwoko na mitekosanyu sooreera sootheene eenre Yave Mulukwaanyu ooreelihakani.

⁸Muhipakewo yeeyo mumpakaanyu wenno — khula mutthu apakaka ontthunaawe,

⁹niwoko nlelo khamunaaye ophiya vanipuroni noowiitthuuwa ni yoohiyeriwa Yave Mulukwaanyu onoovahasaaweni.

¹⁰Munoomulapuwa Yordanu mwiitekihaka mweelaponi Yave Mulukwaanyu onoovahasaaweni ntoko yoohiyeriwa ni Owo onimoovahani owiitthuuwa amwiittanaanyu ootheene yoorukureenreni weera mukhale oolipeene.

¹¹Vahoolowaya mwarowe nipuro Yave Mulukwaanyu aneeraawe athanle ntoko woomakawo Nsinanawe. Wu mwaronghe sootheene kinoolamulelaakani — sooveleelasanyu soohisa ni sa enama, mipatta sanaamulokwaanyu, samahala sooreerela ni seiyo sootheene mwaaroromelinghaanyu omvaha Yave.

¹²Mwahakalalewo ohoolo wa Yave Mulukwaanyu — nyuwosa, anamwaniinyu asilopwana ni asithiyana, ipotthasanyu asilopwana ni asithiyana ni aLeevi ankhala mmittetthenimwanyu mwa yaawo ahikhanleno elapo hoye hoye yoohiyeriwa.

¹³Mwiipasoope weera muhihisere sooveleelasanyu soohisa nakhalaru nipuro nnoosivelani.

¹⁴Mwahisere paahi vanipuroni Yave Mulukwaanyu aneeraawe athanle mwa emoha ya ipuumbasanyu ni iwo mweetteleke sootheene miyo kinoolamulelaakani.

¹⁵Wa soothesene, ontthuniheriwa owiiva yakhalaru asinamaanyu mmittettheni ni okhuura enama muntthunelaanyu, ntoko onkhuureeliwaawe naahe hoye hoye eveyado* ettharihiwaka mareeliho Yave Mulukwaanyu onoovahaaweni. Yaale aniinanela mpaka ahiniinanela ekhuureke.

¹⁶Wa soothesene, muhikhuure ni ephomaaya; mwavuuvihereke vathi ntoko maahi.

¹⁷Muhiceru mmittetthenimwanyu mpatta waanaamuloko wa etriguwaanyu, eviinyuwaanyu enyowani naari makhuraanyu hata matthaara a mihuwosanyu, sooveleela sa otthunawanyu hata samahala sooreerela, hoye hoye yakhalaru etthu mwaaroromelinghaanyu omvaha Yave.

¹⁸Ohiyanawaya, muceeke iyo vamaithoni wa Yave Mulukwaanyu vanipuroni Yave Mulukwaanyu aneeraawe athanle — nyuwosa, anamwaniinyu asilopwana ni asithiyana, ipotthasanyu asilopwana ni asithiyana ni aLeevi a mittetthesanyu. Mwahakalalele ohoolo wa Yave Mulukwaanyu sootheene mpankaanyu.

¹⁹Mwiipasoope weera muhaattiwale aLeevi mahuku ootheene a okumaanyu mweelaponimwanyu.

²⁰Yave Mulukwaanyu aandyeerenreene elapwaanyu ntoko oororomelinghaaweni ni mwaatthunaka okhuura enama mweeraka: “Ninghaawela okhuura enama vakhaanene,” vano mwakhuure muntthunelaanyu.

²¹Vanonto, nipuro Yave Mulukwaanyu aneeraawe athanle weera nikhalewo Nsinanawe noorakamelanixa, mwawiive asinama a muhuwo Yave Mulukwaanyu oovanghaaweni, ntoko koolamulenlaakani. Vano mwakhuureke mmittetthenimwanyu enama muntthunelaanyu.

²²Mukhuureke ntoko onkhuureliwaawe naahe hoye hoye eveyado*. Okhuma aniinanela mpaka ahiniinanela ekhuureke.

²³Muhikhuureru ni ephomaaya niwoko ephome ti okumi ni khoontthuniheriwa okhuura okumi ni enama.

²⁴Muhikhuureru ni ephomaaya; mwavuuvihereke vathi ntoko maahi.

²⁵Muhikhuure weera sootheene siweetteleni nnene nyuwosa ni anamwaniinyu woopaka yeeyo eri yoowaakhuleleya vamaithoni wa Yave.

²⁶Wa soothesene, mukuxe itthusanyu sootteeliheriwa ni seiye mwaaroromelinghaanyu omvaha Yave murowanaka vanipuroni Yave aneeraawe athanle.

²⁷Mwapakewo sooveleela soohisa valtaarini* a Yave Mulukwaanyu, eyo tiiyo enama ni ephome. Ephome ya sooveleelasanyu yiittheliweke okhwipi wa altaari* a Yave Mulukwaanyu, mene enama mwakhuureke.

²⁸Mwiipasoope weera mwiiwelele malamulo ala kinoovahasaakani weerela sootheene siweetteleni nnene nyuwosa ni anamwaniinyu wa mahuku ootheene woopaka yeeyo eri yooreera ni yoowaakhuleleya vamaithoni wa Yave Mulukwaanyu.

²⁹Yave Mulukwaanyu onoophwata ohoolowanyu miloko munrowelaanyu owina ni woomola. Vaheera moomonleene ni mwiitekihaleene mulaponimwaya,

³⁰ni siphwatiweene, mwiipasoope weera muhilokotthiwe ni muhicalele milukusaya mweeraka: “Miloko iya sinlapa hai milukusaya? Nipake hiihotho.”

³¹Muhimulape Yave Mulukwaanyu mooteene yoowo simpakaaya miloko iyo, niwoko saalapaka milukusaya, iyo simpaka itthu soonanara soohiyanahiyana mwa seiyo Yave onthanyaawe. Awosa mpaka anaahisa anamwanaaya mmooroni ntoko sooveleela wa milukusaya.

³²Mwiipasoope weera mpake sootheene kinoolamulelaakani. Muhaandyeerere malamulo makina naari muhivukule malamulo a Yave.