Read Makhuwa-Shirima Deuteronomiyo 13 Bible Online

Deuteronomiyo 13 - Makhuwa-Shirima bible

Deuteronomiyo 13

¹Vano iikhumeleliha variyariwanyu mprofeeti hoye hoye akhalaru onloha sa muhoolo oolaleerakani eneneero yootikhiniheya hoye hoye marikarika, ni

²eneneero eyo hoye hoye marikarika awo owo uulummaawe yakhumelela, aneera: “Nrowe, nitthare miluku sikina soohisuwanyeya, nilape,”

³vano muhiiwelele masu a mprofeeti hoye hoye namaloha owo. Yave Mulukwaanyu ongwootani murima weera oone mwaamusivelaka ni murimaanyu ni okumaahu wootheene.

⁴Muntthare ni munttittimihe Yave Mulukwaanyu paahi. Mweettele malamulowaawe mmwiiwelelaka. Munrumeele ni mumvarexexe Yoowo.

⁵Mprofeeti hoye hoye namaloha owo iiviweke, niwoko oolaleiya amvirikanyihelaka Yave Mulukwaanyu, mwa Yoowo ookhumihaleni wExipitu ni owooponleni mweelaponi ya okaporo. Owo aatthuna woohapuxani mphironi Yave Mulukwaanyu oolamulenlaaweni otthara. Mmalihe yoonanara variyariwanyu.

⁶Hata munninyu, mwaninyu mulopwana hoye hoye muthiyana, mwaarinyu munimusivelaanyu naari nthamwenaanyu xaxaxa ootannyani muxiirini eeraka: “Nrowe nilape miluku sikina” — miluku hata nyuwo naari makholowaanyu yahaasuwenlaaya —

⁷seiyo sa miloko sinkhala mukhwipimwanyu, sikhalaka vakhiviru hoye hoye soorakamela okhuma mpatta mmoha wa elapo mpaka mukina,

⁸muhiviriyeliwe hata muhiwiiwelele anghimaaya. Muhimmorele ikharari naari muhimwaakihe.

⁹Vekhaikhai, mmwiive. Ntatananyu nikhaleke noopacera omwiiva ni vahoolowaya matata a muloko wootheene.

¹⁰Mumvonye maluku mpaka okhwa, niwoko oheerera woohapuxani mphironi mwa Yave Mulukwaanyu mwa Yoowo ookhumihaleni wExipitu ni owooponleni mweelaponi ya okaporo.

¹¹Hiiho aYixrayeli ootheene anoosuwela yeeyo, animoova, ni khawowo a nyuwo anaapake yoonanara ntoko eyo.

¹²Mwiiwa yeeriwaka weera esidade emoha emoha Yave Mulukwaanyu onoovahaaweni weera mukhalemo,

¹³aakhumelela anamatakhala variyariwanyu ni awosa ahaahapuxa amakaaya yeeraka: “Nrowe nilape miluku sikina” — seiyo muhisuwenlaanyu,

¹⁴vano mukohakohe nnenesene yakhala ettiitthu. Moonelelela weera yoheereya etthu eyo yookhootteya yoonanara variyariwanyu,

¹⁵vekhaikhai, ngwiivaseke amakaaya ootheene ni ekatana. Mphwate woomalela esidade eyo ngwiivaka amaki ni axinameene.

¹⁶Muthukumanyihe soohuhula sootheene eriyari nipuwa nihinthoiwa ni muhise woomalela esidade ni soohuhulasaya sootheene ntoko yoomveleelela Yave Mulukwaanyu. Nikhalewo nthala mahuku ootheene ni ohiraseliweruwo.

¹⁷Muhiphwanyaniweru elakeliwe ophwatiwa weera Yave akurunuxe isarasawe. Owo onimoomoreliwani ikharari, anaawaandyeerereni ntoko aaroromelinghaawe ni nlipelo makholowaanyu,

¹⁸niwoko noomwiiwelela Yave Mulukwaanyu muttharaka malamulo ootheene kinoovahaakani olelo ni mumpakelaka yeeyo eri yoowaakhuleleyaawe.