Read Makhuwa-Shirima Deuteronomiyo 14 Bible Online

Deuteronomiyo 14 - Makhuwa-Shirima bible

Deuteronomiyo 14

¹Nyuwosa ti anamwane a Yave Mulukwaanyu. Muhipophe naari muhicemelane niwoko na anamakhwa.

²Nyuwosa ti muloko wootteeliheriwa Yave Mulukwaanyu. Yave ohoothanlani nyuwosa variyari wa miloko sootheene sa elapo ya vathi weera mukhale mulokwaawe woosiveleyaxa.

³Muhikhuureru ekhoottihiwe.

⁴Inama sootthuniheriwa okhuura ti iya: Emombe, ekhondoolo, epuri,

⁵eveyado*, naahe, puttukhu, ekhomaci, etthove, enaari ni ekhondoolo ya mmwaako.

⁶Ontthuniheriwa omukhuura akhalaru mwaamunama orino nnaawo noothaleya makharu meeli ni oncukhula.

⁷Wa soothesene, variyari wa axinama athaleiye mankharu meeli ancukhula khoontthuniheriwa okhuura ekamelu*, hukula hoye hoye matthika. Sinoocukhularu inaawosaya khasithaleiye, tivawo sihitteenlaaya wa nyuwo.

⁸Ekhumbatho ti yoohitteela, niwoko eroothaleyaru nnaawo, kheencukhula. Muhikhuure inamasene seiyo hata muhitaveru erutthwaaya.

⁹Soopattuxiwa sootheene sinkhala mmaahini nyuwosa mukhuureke paahi sirino mapupha ni makamba.

¹⁰Vaheera muhikhuure sootheene iyo sihirino mapupha ni makamba, niwoko ti soohitteela wa nyuwosa.

¹¹Ontthuniheriwa omukhuura akhalaru mwaapalame ootteela.

¹²Wa soothesene, muneeraanyu muhikhuureke ti iya: Enaka, nrepo, nrepo nooripa,

¹³xaaka ooxeera, xaaka ooriipa hoye hoye yakhalaru ekhalelo ya xaaka,

¹⁴ikhalelo sootheene sa anakhuku,

¹⁵nikhakanttore, namame, haamaama, ikhalelo sootheene sa aahaamaama,

¹⁶esiisi, nikunkhuni, mwaacaace,

¹⁷xaattulamakula, khuruwela, engwasi,

¹⁸Ntiki, ikhalelo sootheene sa antiki, kokotthi ni nantuuthu.

¹⁹Ikhalelo sootheene sa axiitthu amvava ti soohitteela — muhikhuure.

²⁰Vaheera ikhalelo sootheene sirino mapupha siri sootteela mukhuureke.

²¹Muhikhuureru yakhalaru enama yoowiikhwela. Mumvaheke namarwa onkhala musidadenimwanyu weera akhuure hoye hoye munthumihere mmalapo mukina. Wa soothesene, nyuwosa ti muloko wootteeliheriwa Yave Mulukwaanyu. Muhimwaapeye mwaaxaana a epuri mmukakani wa amayawe.

²²Mvahe mpatta wanaamuloko wa yeeyo munruweraanyu vayaakhani.

²³Muceeke mpatta wanaamuloko wa etrigwaanyu, eviinyu enyowani, makhura ni matthaara ootheene a mihuwosanyu vamaithoni wa Yave Mulukwaanyu vanipuroni aneeraawe athanle ntoko woomakawo Nsinanawe weera muxuttere omuttittimiha Yave Mulukwaanyu wa mahuku ootheene.

²⁴Vaheera waari weera nipuro nno ti noorakamelaxa ni nyuwo mooreelihiwa ni Yave Mulukwaanyu muhiweraka orowano mipatta sanaamulokwaanyu, niwoko nipuro Yave Mulukwaanyu aneeraawe athanle ti noorakamelaxa,

²⁵vano muthumihe sanaamulokwaanyu ni muronghe eparatha* vanipuroni Yave Mulukwaanyu aneeraawe athanle.

²⁶Eparatha* eyo muthumeno muntthunaanyu: Imombe, ikhondoolo, eviinyu hoye hoye soowura sikina naari yakhalaru etthu muntthunaanyu. Vano nyuwo ni emusaanyu mwaceeke ni mwahakalalewo vamaithoni wa Yave Mulukwaanyu.

²⁷Muhaattiwaleru aLeevi ankhala musidadenimwanyu, niwoko awosa khaanono nipuro hata yoohiyeriwaaya.

²⁸Ommaleloni wa khula iyaakha tthaaru, muruuheke sanaamuloko sootheene sa soohepha sa eyaakha eyo ni muthokorore mmasidadenimwanyu.

²⁹Hiiho aLeevi ahikhalanne nipuro hoye hoye yoohiyeriwaaya ni anamarwa, akwaasuni ni asinaamukhweli ankhala mmasidadenimwanyu eceeke mpaka ovona ni Yave Mulukwaanyu onimooreelihani mmitekoni mumvaraanyu.