Read Makhuwa-Shirima Deuteronomiyo 18 Bible Online

Deuteronomiyo 18 - Makhuwa-Shirima bible

Deuteronomiyo 18

¹Asaserdoti* ari aLeevi — vekhaikhai epuumba yootheene ya aLeevi — ehikhalane elapo naari yoohiyeriwa vamoha ni aYixrayeli akina. Awosa elameleke sooveleeleliwa Yave vayikho, niwoko eyo ti yoohiyeriwaaya.

²Awosa kheekhalanoru yoohiyeriwa variyari wa axunnaya; Yave ti yoohiyeriwaaya, ntoko aaroromelinghaawe.

³Vano muloko waamveleelaka mwaamombe hoye hoye ekhondoolo, asaserdoti* yaakheleleke wa aYixrayeli ootheene eniirowe opaka yooveleela, okhuma emombe mpaka akhalaru mwaamunama khakope, nandere ni nipwiipwi.

⁴Mwaavahetho mpatta wa ohepha woopacera wa etrigu, eviinyu enyowani, makhura ni mapururu a ikhondoolosanyu soopacera ometthiwa.

⁵Yave Mulukwaanyu aahaathanla yaawosa ni ekhapiraaya variyari wa ipuumba sootheene weera erumeeleke mwa Nsina na Yave wa mahuku ootheene.

⁶muLeevi onkhala yakhalaru esidade ya aYixrayeli atthuna orowa wa nipuro Yave aneeraawe athanle,

⁷owo arumeeleke mwa Nsina na Yave Mulukwaawe ntoko aLeevi akina anrumeelawo vamaithoni wa Yave.

⁸Owo aakheleke mpattaawe ntoko aLeevi akina ahaalikelelaka musurukhu aneeraawe aakheleke soothumiha sooreela sa emusaawe.

⁹Mwaavolowaka mweelaponi Yave Mulukwaanyu onoovahaaweni, muhaasaase otakiha itthu sa ohuureya simpakaaya miloko sa mwemmo.

¹⁰Muhitthunihere variyariwanyu okhala mutthu anaamuhise mwanawe mulopwana hoye hoye muthiyana ntoko yooveleela; onaasa ihako hoye hoye ompaka macitta; malavi, okhwiri,

¹¹naari madyiini, onuuluma mwa nsina na minepa, onkoha minepa hoye hoye anamakhwa.

¹²Ootheene ampaka itthusene seiyo ti sa mwiikho wa Yave. Owo onoomola miloko iyo ohoolowanyu niwoko na miteko soonanara iyo.

¹³Mukhale oohikhalano nthowa vamaithoni wa Yave Mulukwaanyu.

¹⁴Miloko nyuwo muneeraanyu moomole singwiiwelela anamacitta ni anahako. Vaheera mwaha wa nyuwo — Yave Mulukwaanyu khootthuniherani opaka seiyo.

¹⁵Yave Mulukwaanyu onookhaliherani mprofeeti ntoko miyo oothanliwa variyari wa axunninyu. Mmwiiwelele yoowo.

¹⁶Ti yeeyo mwaamvekenlaanyu Yave Mulukwaanyu oHorebi nihuku nenenenne na muthukumano mweenraanyu: “Khanintthuna wiiwa nsu na Yave Mulukwaahu naari woonatho mooro mutokotoko ola weera nihikhwe.”

¹⁷Vano Yave aakeerela: “Awosa khaanootha.

¹⁸Kinimwaavahasa mprofeeti ntoko nyuwo variyari wa axunnaya kihelaka maswaaka mmwaanomwawe ni owo onimwaathalihera sootheene kineeraaka kimulamulele.

¹⁹Yoowo aneera aahiiwelele maswaaka yaawo aneeraawe uulume mprofeeti mwa Nsinanaka, Miyo muneenaaka kinoomuthoriha.

²⁰Vaheera mprofeeti oneera weera onuuluma mwa Nsinanaka yakhalaru etthu Miyo kihimulamulenlaaka wuuluma, hoye hoye mprofeeti onuuluma mwaha wa miluku sikina, iiviweke.”

²¹Onoowereya wiixeerela: “Nnisuwele hai mutthenga ohinrweela wa Yave?”

²²Yeeyo aneeraawe uulume mprofeeti mwa Nsina na Yave yaahikhumelela hoye hoye yaahikwaniheriwa, mutthenga owo khuulumme Yave. Ti masu a mprofeeti owo paahi. Muhimoove.