Read Makhuwa-Shirima Deuteronomiyo 20 Bible Online

Deuteronomiyo 20 - Makhuwa-Shirima bible

Deuteronomiyo 20

¹Mwarowa waawanano amwiittanaanyu ni moona ikavalu*, ikaaro sa ikavalu* ni anakhotto oowaattaxa waapwaha awinyu, muhiwoove, niwoko Yave Mulukwaanyu ookhumihaleni wExipitu, onookhala ni nyuwosa.

²Nyuwosa yaaphiyeraka ehuhu yoowana, musaserdoti* aroweke ohoolo wa anakhotto ni aweereleke:

³“Mwiiwe aYixrayeli, olelo munimwaawanano amwiittanaanyu. Muhiporore hata muhoove hoye hoye muhaatteenguwe naari muhiwoovase.

⁴Yave Mulukwaanyu onimoohoolasani oowanelasakani mwa amwiittanaanyu weera oowinihaseni.”

⁵Asitokweene eweereleke anakhotto: “Akhala mukina otenke empaawe ahinavolowa, owo ahokoleeleke owannyawe weera ahikhwele okhottoni empaawe eyo avolowaka mukina.

⁶Akhala mukina ophatteiye ematta ya iwuuva* ahinaca, owo ahokoleeleke owannyawe weera ahikhwele okhottoni iwuuvasawe siciwaka ni mukina.

⁷Akhala mukina uurale ahinavolowa othela, owo ahokoleeleke owannyawe weera ahikhwele okhottoni mwaariye atheliwaka ni mukina.”

⁸Vanonto, asitokweene a anakhotto yaandyeerereke: “Akhala mukina onoova ahilipaka murima, owo ahokoleeleke owannyawe weera axunneiye aYixrayeli ehipoporasetho.”

⁹Asitokweene emalihaleene wuuluma ni anakhotto, yaathanleke ahooleli oowaalamulela anakhotto.

¹⁰Nyuwosa mwaarowaka owanano esidade, mwaarumihele toko mutthenga wa murettele.

¹¹Amaki awo yaakhulela ehulaka maselaaya, anookhala ipotthasanyu yoovarelasakani miteko sooviha.

¹²Vaheera awo yakhootta mutthenga wa murettele, enoowananani, vano mwarice esidade.

¹³Yave Mulukwaanyu aawinnyererakani mmatatanimwanyu, ngwiivakasemo asilopwana ootheene ni ekatana.

¹⁴Mwaha wa asithiyana, anamwane, mihuwo ni itthu sootheene sikina musidadeni — mukuxeke ntoko soohuhula. Mukhalanaseke seiyo muneeraanyu mwaahuhule amwiittanaanyu mvahiwaanyu ni Yave Mulukwaanyu.

¹⁵Ti hiiho ontthuneyaaya opakela isidade sootheene soorakamela sihikhanle sa miloko mwaattamannaanyu.

¹⁶Vaheera mmasidadeni mwa miloko Yave Mulukwaanyu onoovahaaweni ntoko yoohiyeriwa mwiive sootheene sirino okumi.

¹⁷Mwaaphwate aHiti, awAmori, aKanaani, aPerizi, aHivi ni aYebusi, ntoko Yave Mulukwaanyu oolamulenlaaweni.

¹⁸Mwaahaaphwata, animooxuttihani opaka itthu soonanara sootheene ampakaaya elapaka milukusaya ni nyuwo munoomutthekela Yave Mulukwaanyu.

¹⁹Mwaaricaka esidade mweehuhuni yoowaatta, muwananakano weera mukuxe, muhiphwate nyirisaya muuhaka ni epaso, niwoko nyuwosa munimooca soowiimasaya. Muhuuhe niwoko iyo khasihiyono atthu wooweera nyuwosa murice.

²⁰Muuheke nyiri musuwenlaanyu weera khasiniima sihivareleyaka muteko woowookuttelelani mpaka ophwateya esidade mungwananaanyuno.