Read Makhuwa-Shirima Deuteronomiyo 23 Bible Online

Deuteronomiyo 23 - Makhuwa-Shirima bible

Deuteronomiyo 23

¹Inoko* hoye hoye yaawo enanarihiwe elopwanaaya ehivolowe mmuthukumanoni mwa Yave.

²Yoowo oraruwiwe ahivolowe mmuthukumanoni mwa Yave, ni ekhapiraaweene mpaka ekhapira yanaamuloko.

³Ahikhaleru ngwAmoni naari mMowabe hata yakhalaru ekhapiraawe mpaka ekhapira yanaamuloko anaavolowe mmuthukumanoni mwa Yave.

⁴Awosa khayoociceenreni ekuxaleene mphironi yooca ni maahi, mukhumaka wExipitu. Ohiyanawaya yaamuliva Bileyami, mwaana mulopwana a Beyori a oPetori wArami-Naharayimi weera oolaphaseni.

⁵Wa soothesene, Yave Mulukwaanyu khwaamwaakhulenle Bileyami; nlapho naathatuwa nreelihonanyu niwoko na woosivelaniwawe Yave Mulukwaanyu.

⁶Muhiiraaneno mookuminimwanyu wootheene.

⁷Muhimuthanye ngwEdomi, niwoko ti munninyu. Muhimuthanyetho ngwExipitu, niwoko mwaari anamarwa mweelaponimwawe.

⁸Anamwane a ekhapiwaraaya yanaararu evoloweke mmuthukumanoni mwa Yave.

⁹Mukonenleene weera mwaawaneno amwiittanaanyu, musembeke itthu soohitteela sootheene.

¹⁰Mmoha a anakhottwaanyu aahitteela niwoko na wiilohera, owo avenyeke mukonelingwe.

¹¹Vaheera, waaxekuwaka, owo iirapiheke ni, wiilaka, ahokoleeleke mukonelingwe.

¹²Mwathipeke ecumbusi okhwipi wa mukonelingwe mwa weiwo muneeraanyu murowe weera mwiitthuuweke.

¹³Khula nakhotto akhalaneke yoothipano ni aarowaka oxerexere mukonelingwe, athipekeno. Vahoolowaya uuheeleke mahiloka.

¹⁴Vano Yave Mulukwaanyu onneetteetta mukonenlaanyumo weera awaakihereni awinnyererakani amwiittanaanyu. Munkonelaanyumo otteelekemo weera Owo ahoone etthu yoohitteela variyariwanyu oohiyakani.

¹⁵Yootthawelelani epottha, muhihokoloxere wa apwiyaaya.

¹⁶Muhiyeke ekhalaka ni nyuwo entthunelaaya yakhalaru esidade eneeraaya ethanle. Muhihasule.

¹⁷Ahikhaleru muYixrayeli — mulopwana hoye hoye muthiyana — anaathatuwe puuta mpaani mwa miluku sikina.

¹⁸Muhironghe vaNipuroni Nootteela* na Yave Mulukwaanyu musurukhu woopuuta mulivelaka yoororomelihaanyu, niwoko eyo ti etthu ya mwiikho wa Yave Mulukwaanyu.

¹⁹Muhikokoce oliviwa yoopwaha mukopeliwaanyu wa munninyu — okhalaka musurukhu, sooca naari sakhalaru itthu sikina sinoowineleyani.

²⁰Nyuwosa mwaakokoceke anamarwa oliva woopwahaxa, vaheera muhimukokoce munninyu muYixrayeli weera Yave Mulukwaanyu ooreelihaseni mwa sootheene muneeraanyu mpake mweelaponi mumvolowaanyumo weera mwakuxe.

²¹Mwamuroromeliha etthu Yave Mulukwaanyu, muhipise okwanihera yeeyo niwoko vekhaikhai Owo onimoonyesererani okwanihera ni eyo eniithatuwe yootthekaanyu.

²²Wa soothesene, mwaahimuroromeliha etthu, khamukhalano nthowa.

²³Mukwanihere sootheene iyo muroromelihalaanyu, niwoko mpanke etthuna murima munroromelihaka Yave Mulukwaanyu.

²⁴Mwavolowa mmatta mwa iwuuva* ya mukhwiinyu, muceeke iwuuva* muntthunelaanyu, mene ehikhale muneeraanyu mukuxe.

²⁵Mwavolowa mmatta ya etrigu ya mukhwiinyu, mweere ottottattotta makala paahi, mene muhikuxere ecikwaakhwa weera mwaanyule etrigu ya mukhwiinyu.