Read Makhuwa-Shirima Deuteronomiyo 3 Bible Online

Deuteronomiyo 3 - Makhuwa-Shirima bible

Deuteronomiyo 3

¹Vahoolowaya naahokolowa nikuxeraka musewe onkela oBaxani ni Ogi, mwene a oBaxani, vamoha ni anakhottwaawe ootheene yaanirweela weera eniwaneno wEdereyi.

²Yave aakeerela: “Muhimoove, niwoko koomwinnyerera mmatatanimwanyu ni anakhottwaawe ootheene nitho elapwaawe. Mumpakele yeeyo mwaampakenlaanyu Sihoni, mwene a awAmori, aalamula oHexiboni.”

³Hiiho Yave Mulukwaahu aaninnyereratho mmatatanimwahu Ogi, mwene a oBaxani ni anakhottwaawe ootheene. Hiyo naawiiva nihimuhiyakaru mutthu.

⁴Ehuhuweene yeele naakuxa isidadesawe sootheene. Aani naakuxa isidade miloko mithannamosa sootheene sa elapo yootheene ya wAregobi, omwene wa Ogi oBaxani.

⁵Isidade iye sootheene saalipiheriwa ni ixiri soorakama ni masele ni anampattika. Ohiya seiye saakhala mittetthe sincipale sikina sahaarino ixiri.

⁶Hiyo naamaliha ophwata ntoko naampakenlaahu Sihoni, mwene a oHexiboni, niphwataka isidade sootheene niwiivakatho alopwana, athiyana ni anamwane ootheene.

⁷Wa soothesene, naakuxa mihuwosaya ni soohuhula sa isidade ntoko soowaakha okhottoni.

⁸Ti hiiho naakuxalaahu ehuhuweene yeele ilapo sa mamwene meeli a awAmori mpatta ninkhuma nsuwa oYordanu, ekhumme vareyareyani na wArenoni mpaka mwaako wa oHeremoni.

⁹Vano aZidoni yiitthana Heremoni “Siriyoni” ni awAmori yiitthana “Seniri.”

¹⁰Naakuxa isidade sootheene sa muttuttuwani, sa oGiliyade, sa oBaxani mpaka oSaleka ni wEdereyi siri isidade piili sa omwene wa Ogi oBaxani.

¹¹Vanonto Ogi, mwene a oBaxani, aahanle yooworu ni okumi variyari wa aRefayimi. Ekaamaawe yaari ya eyuuma yaakhalano miringo iya: imeetru* ixexe mweerakameloni ni emeetru* emoha ni wookwanaka imeetru* piili mweekhuveeloni. Eyo nlelo eri oRabati wa awAmoni.

¹²Sa ilapo naakuxalaahu kaahaavaha aRubeni ni aGadi elapo mpatta wa ottuttuwani wa wAroweri, mukerekhere mooloko wArenoni vamoha ni eriyari ya elapo ya mmanyaakoni sa oGiliyade ni mittetthesaya.

¹³Kaavaha eriyari ya epuumba ya Manaxe seiye saahanle sa oGiliyade ni oBaxani wootheene, omwene wa Ogi. Elapo yootheene ya wAregobi oBaxani khalayi yaasuweliwe ntoko elapo ya aRefayimi.

¹⁴Yahiri, mmoha a ekhapira ya Manaxe, aakuxa elapo yootheene ya wAregobi mpaka omwiinanoni wa aGexuri ni aMahaakati. Elapo ele yaattehiwa nsinanaya moota wooweera mpaka olelo oBaxani oniitthaniwa Hawoti Yahiri.

¹⁵Kaamvaha Makiri elapo ya oGiliyade.

¹⁶Kaahaavaha aRubeni ni aGadi elapo ekhumme oGiliyade mpaka nreyareya na wArenoni, mwiinano waavira eriyariru wa nreyareya, ni okhuma vaavaale mpaka mooloko Yaboke ori mwiinano ni awAmoni.

¹⁷Mwiinaanowaaya wa mpatta ninkela nsuwa waari Yordanu wAraba okhuma oKinereti mpaka Ephareiya ya wAraba (eyo tiiyo Ephareiya ya Maakha), mukerekhere mwaako oPisega.

¹⁸Ehuhuweene yeele kaahoolamulelasani ha: “Yave Mulukwaanyu ohoovahasani elapo ela weera mukuxe. Anakhottwaanyu ootheene oolikaneene owana elapuweleke ohoolo wa axunninyu aYixrayeli.

¹⁹Axaarinyu, anamwaniinyu, mihuwosanyu sincipale kisuwenlaaka weera ti sawinyu muhiyeke mmasidadeni koovanghaakani

²⁰mpaka Yave aneeraawe awiitthuuwihase axunninyu ntoko koopakenlaakani ni mpaka awosa eneeraaya ekuxetho elapo Yave Mulukwaanyu onaavahasaawe, okhopela Yordanu. Vahoolowaya khula mutthu a nyuwo ahokoleeleke nipuro kimvanghaaka.”

²¹Ehuhuweene yeele kaamulamulelatho Yoxuwa: “Mohoona ni maithwaanyu yeeyo Yave Mulukwaanyu aapakenlaawe mamwene meeli ale. Yave onoopakela mooteene yoowo omwene wootheene muneeraanyu mvirase.

²²Muhiwoovase, Yave Mulukwaanyu onoowanelasani nyuwo.”

²³Ehuhuweene yeele kaamudyoonttelela Yave:

²⁴“Ii! Adonai Yave, moopacera omoonihera murumeiyaanyu ovuwawanyu ni ntatananyu nooweraxa. Khawowo muluku mukina wiirimu naari elapo ya vathi ongwera opaka mitekosanyu ni sootikhiniha mumpakaanyu.

²⁵Mukihiye kilapuwele okhopela Yordanu weera koone elapo yooreera, elapo yooreera ya mmanyaakoni ni oLibanu.’

²⁶Wa soothesene, Yave aakinyoonyeriwa ahikiiwelelaka. Yave aaheera: “Waatta! Muhikileeletho seiyo.

²⁷Mwangweleke mwaako Pisega mpaka vatthomelani ni mwawehe mipatta sootheene. Moone elapo ni maithwaanyu, niwoko nyuwo khamunlapuwa Yordanu.

²⁸Vanonto, mwamulamulele Yoxuwa, mwamulipihaxe murimaawe, niwoko ti yoowo anaahoolele muloko ola mpaka okhopela ni anaawerihe waakhela elapo nyuwo muneeraanyu mweere woona paahi.”

²⁹Hiiho naakilaathi vareyareyani ohoolo wa oBeti-Peyori.