Read Makhuwa-Shirima Deuteronomiyo 31 Bible Online

Deuteronomiyo 31 - Makhuwa-Shirima bible

Deuteronomiyo 31

¹Moisesi aawuulumelatho aYixrayeli ootheene masu ala:

²“Vano kirino iyaakha ncira ni miloko miili ni nkingweratho woohoolelani. Yave aakeerela: “Khamunlapuwa Yordanu.”

³Yave Mulukwaanyu muneenaawe onoomulapuwa ohoolowanyu. Owo onoophwata miloko iyo ohoolowanyu ni nyuwosa munookuxa elapwaaya. Yoxuwatho onoomulapuwa ohoolowanyu, ntoko Yave eenraawe.

⁴Yave anaapakele iyo yeeyo aampakenlaawe Sihoni ni Ogi, mamwene a awAmori mwa yaawo Owo aaphwantaawe vamoha ni ilaposaya.

⁵Yave onoowinnyererasani ni nyuwosa mpakele iyo sootheene seiye koolamulenlaakani.

⁶Mukhaleke oolipa ni oominya murima. Muhoove hata muhitteenguwe seiyo, niwoko Yave Mulukwaanyu onookhala ni nyuwo. Khoohiyani meekhiinyu.”

⁷Vanonto, Moisesi aamwiitthana Yoxuwa, anamweerela vamaithoni wa aYixrayeli ootheene: “Mukhaleke oolipa ni oominya murima, niwoko ti nyuwo munimuhoolele muloko ola mweelaponi Yave aaroromelingaawe waavaha makholowaaya ni mwaakaweleke ntoko yoohiyeriwaaya.

⁸Yave muneenaawe onimoohoolelani ni onookhala ni nyuwo. Khoohiyani meekhiinyu. Muhoove hata muhiporore.”

⁹Hiiho Moisesi aalepa Nlamulo nna, anaavaha asaserdoti* yaari anamwane a Leevi mwa yaawo yaateexa Arka* a Wiiraana a Yave aavahakatho ahooleli ootheene a aYixrayeli.

¹⁰Vahoolowaya Moisesi aahaalamulela: “Ommaleloni wa khula iyaakha ithannapiili, vayaakhani ya omalihiwa ikoongori sootheene, mweehuhuni ya Efesta ya mmikotthani,

¹¹aYixrayeli ootheene ereene vamaithoni wa Mulukwaanyu vanipuroni Owo aneeraawe athanle, vano mwaasomelekewo Nlamulo nna mwaatthuni.

¹²Mwathukumanyihe muloko — asilopwana, asithiyana, anamwane ni anamarwa ankhala mmasidadenimwanyu weera yiiwe ni exuttere omoova Yave Mulukwaanyu ettharaka oororomeleyeene masu ootheene a Nlamulo nna.

¹³Anamwanaaya ahisuwenle Nlamulo nna yiiweke ni exuttereke omoova Yave Mulukwaanyu mukhalaka mweelaponi mwa yeeyo muneeraanyu mwakuxe munlapungweene Yordanu.”

¹⁴Yave aamweerela Moisesi: “Nookhuveela nihuku munkhwaanyu. Mmwiitthane Yoxuwa ni mwiixoonihereke Muheemani mwa Muthukumano weiwo kineeraaka kamukhalihe namarandelaanyu.” Hiiho Moisesi ni Yoxuwa yaarowa, eniixoonihera Muheemani mwa Muthukumano.

¹⁵Vano Yave aahiixoonihera wa yaawosa Muheemani ntoko nrimbu na mahutte neemenleene vamulako wa eheema.

¹⁶Yave aamweerela Moisesi: “Nyuwo munimwiitthuuwa vamoha ni makholowaanyu ni muloko ola woowaakuveya onooraruwasa, ottharaka miluku sikina sa elapo oneeraaya wavolowe. Awosa anookihiya, ehipwatthaka wiiraana kaapakenlaaka.

¹⁷Nihuku nenenenno sinimwaapattela isarasaka ni Miyo kinimwaattiwalasa kaareraka ettuli ni awosa anoophwatiwa. Onimwaarweela ohaawa ni mahooxo matokotoko ni nihuku nno eniyeere: “Mahooxo ala annikhumelelela onihingyaawe Mulukwaahu.”

¹⁸Woohihovela, nihuku nno kinimwaareratho ettuli niwoko na sootakhalasaya sootheene apankaaya ekokhorelaka miluku sikina.

¹⁹Vano mwiilepelase ecipo ela ni mwaaxuttihe aYixrayeli ngwiipihaka. Eniikhale namoonaaka wa yaawosa.

²⁰Kaavoleihaka mweelaponi yoosareya mukaka ni oravo, mwa yeeyo kaaroromelinghaaka ni nlipelo makholowaaya, ni yaacaaka, enavona, siweettelaka nnenesene, awosa eniikokhoreleke miluku sikina elapaka ekikhoottaka Miyo ni enanarihaka wiiraanawaka.

²¹Saarweelaka irisa ni makacamiho mancipale, ecipo ela enimwaakhalela onamoona, niwoko ekhapiraaya kheettiwala ela. Koosuwela sootthunasaya, kihinaayeru waavoleiha mweelaponi kaaroromelinghaaka ni nlipelo.”

²²Hiiho nihuku nne Moisesi aalepa ecipo ela, anaaxuttiha aYixrayeli.

²³Yave aamvaha Yoxuwa, mwaana mulopwana a Nuni nlamulo nna: “Mukhaleke oolipa ni oominya murima, niwoko nyuwo munoohoolela muloko wa aYixrayeli mweelaponi kaaroromelinghaaka ni nlipelo ni Yoomeene kinookhala ni nyuwo.”

²⁴Moisesi amalihakaru olepa masu ootheene a nlamulo nna mulivurini,

²⁵aahaalamulela aLeevi yaateexa Arka* a Wiiraana a Yave:

²⁶Mukuxe elivuru ela ni mwiikaathi mukhwipi mwa Arka* a Wiiraana a Yave Mulukwaanyu. Eniikhalewo ntoko namoona wa nyuwosa.

²⁷Koosuwela moota mumvaanyaanyu ni ettiyamaarwaanyu. Nyuwosa mwaamvaanya Yave miyo kireene nlelo ni okumi kikhalaka ni nyuwo, ankha kaakhwaaka!

²⁸Mwaathukumanyihe ahooleli ootheene a ipuumbasanyu ni anamalamula ootheene weera Miyo kuulume masu ala ootheene yiiwaka, kikhalihaka wiirimu ni vathi ntoko anamoonaaya.

²⁹Vano koosuwela weera kikhwiyeene, woohihovela nyuwosa munoovirikanyiha muhapuwaka ephiro koolamulenlaakani otthara. Mahuku a muhoolo, nsoomoreleni irisa, niwoko nyuwosa mmwipakase soonanara vamaithoni wa Yave muntannyeraka isarasawe ni seiyo mumpankaanyu.”

³⁰Vanonto Moisesi aahuuluma masu a ecipo yootheene ela yiiwiwaka ni muthukumano wootheene wa aYixrayeli: