Read Makhuwa-Shirima Deuteronomiyo 33 Bible Online

Deuteronomiyo 33 - Makhuwa-Shirima bible

Deuteronomiyo 33

¹Ti yaala mareeliho aavanghaawe Moisesi, mulopwana a Muluku, aareelihaka aYixrayeli ahinaaye okhwa:

²Owo aaheera: “Yave ohoorwa arweelaka oSinayi, akhumaka ntoko nsuwa iixooniheraka wa yaawo oSeyiri. Aahaarela mulokwaawe vamwaako oParani. Aarwa ni ancipalexa a ootteela a mpatta wa ohitto, okhuma mukerekhere nyaako.

³Vekhaikhai ti Nyuwo munsivela mulokwaanyu; ootteela ootheene ari mmatatanimwanyu. Ootheenaawo annookokhorelani yiiwaka mahusihowaanyu,

⁴eyo tiiyo Nlamo Moisesi aanivanghaawe; yoohiyeriwa ya muthukumano wa Yakobe.

⁵Owo aari Mwene a oYexuruni yaathukumannaaya mapwattapwattha a muloko vamoha ni ipuumba sa aYixrayeli.

⁶Rubeni akhaleke ni okumi ahikhwaaka ni asilopwanaawe yaatteke.”

⁷Wa Yuda aaheera: “Ii! Yave! Mwiiwe okhuwela wa Yuda, Munghokoloxere mulokwaawe. Matataawe ekwaneleye ni weera aphwanye ekhavihero aawananaka amwiittanaawe!”

⁸Wa Leevi aaheera: “Ii! Yave! Tumimi ni Urimaanyu* mohaavaha arumeiyaanyu oosiveleya ari aLeevi. Mwaamoota murima oMasa; mwaanyakulihanano mmaahini a oMeriba.

⁹Leevi aaweerela atithawe ni amayawe: “Awosa nkingwoonelamo.” Khaapwantthe axunneiye hata anamwanaawe aathokorora maswaanyu ni wiiraanawanyu.

¹⁰Owo onimuxuttiha ikanosanyu Yakobe ni Nlamulonanyu wa aYixrayeli. Owo onoohiserani erubani* ohoolowanyu apakaka sooveleela soohisa sookwanela valtaarininiwanyu.

¹¹Ii! Yave! Mureelihe wiilipiherawawe wootheene ni mwaakhulele mitekosawe. Nnyaanye ovaanya wa amwiittanaawe weera awosa ehimweemeleletho.”

¹²Wa Benyamini aaheera: “Oosiveleya a Yave onookhala oolipeene vamoha ni Yoowo, niwoko Owo onimwaakiha mahuku ootheene ni wa yoowo onimusivelaawe oniitthuuwa mmatatanimwawe.”

¹³Wa Yoseefe aaheera: “Yave areelihe elapwaawe ni nikame nooreeraxa ninrweela osulu, wiirimu. Areelihetho maahi moowiixera;

¹⁴areelihiwe ni soohepha siniitthwihiwa ni nsuwa ni sooreerela sinruuwerihiwa ni mweeri.

¹⁵Areelihiwe ni soovaha sooreerela soothanliwa mmanyaakoni sa khalayi ni ethaadyira ya mmattumuxani yoohimala.

¹⁶Areelihiwe ni soowiima sooreerela sa mulaponi soowaattaxa ni murima wooreera wa Yoole aamukhumelenle muniphuwani nivarelaka. Mareeliho ala ootheene emurweele Yoseefe; vayuuci ya oothanliwa variyari wa axunneiye.

¹⁷Moovuwani owo ori ntoko ntthaara na emombe elopwana. Manyakaawe ari ntoko manyaka a enari, mwa yaawo aneeraawe avulalihekeno miloko sa elapo yootheene. Hiiho ti macira macireene a epuumba ya Efrayimi ni Manaxe.”

¹⁸Wa Zebuloni aaheera: “Zebuloni ahakalale mmikwahanimwawe ni Isakari muheemanimwawe.

¹⁹Awosa eniithukumanye miloko omwaako, ni iwo eniipakewo sooveleela sa ekhaikhai; epakaka efesta ni sooreela sa mphareiya, ni mihakhu soovithiwa mweehaavanimwaya.

²⁰Wa Gadi aaheera: “Ooreelihiwa akhale Muluku omvanghe Gadi elapo etokotoko! Owo iixaatalenle ntoko mwatto akhuuraka nipita ni nikarakasa.

²¹Aahiithanlela elapo yooreerela; mpatta wa ehooleli aathokororeliwaawe. Oothatuwa mutokweene a muloko, attharaka ekhaikhai ya Yave ni ikano soowaalamulelano aYixrayeli.”

²²Wa Dani aaheera: “Dani ti mwaaxaana a mwatto onrwa atuphaka wookhuma oBaxani.”

²³Wa Nafitali aaheera: “Nafitali ti oosareya mareeliho a Yave ni murimaawe wooreera; yoohiyeriwaawe ti mpatta wa ohitto ni mpatta wa mphareiya.”

²⁴Wa Axeri aaheera: “Ooreelihiwa ti Axeri variyari wa anamwane ootheene ni ookupaleya variyari wa axunneiye ootheene. Onookhalano makhura mancipale aneeraawe aneelihekemo inaawosawe.

²⁵Anampattika a nselenawe eniikhale a eyuuma ni ebronze* ni ikurusawe nsipwaherere mahuku ootheene.

²⁶Khawowo onlikana ni Muluku a Yexuruni oneetta wiirimu weera ookhavihereni, aani oneetta moovuwani mmahutteni.

²⁷Muluku ti wootthawelawanyu woohimala; nyoonosawe soohimala ti olipawanyu. Owo onoowoomola amwiittanaanyu ohoolowanyu eeraka: “Waaphwatase!”

²⁸Hiiho aYixrayeli anookhala oomaaleleya; naattuuttu a Yakobe ori oolipeene mweelaponi ya etrigu ni eviinyu enyowani mwa mwemmo ninttonyeraayamo nikame na wiirimu.

²⁹Ooreelihiwa ti nyuwo, muloko wa aYixrayeli! Khaawo oreeringwe ntoko nyuwo; Yave ti oovulunxeni. Owo ti yoowiixaakiheraanyu ni Ekatanaanyu yoowina! Amwiittanaanyu animookokhorelani, mene nyuwo mmwaanyikalele.”