Read Makhuwa-Shirima Deuteronomiyo 5 Bible Online

Deuteronomiyo 5 - Makhuwa-Shirima bible

Deuteronomiyo 5

¹Moisesi aahaathukumanyiha aYixrayeli ootheene anaweerela: “Mwiiwe aYixrayeli ikano ni sooruma kinooleelaakani olelo. Muxuttere ni mweettele nnenesene.

²Yave Mulukwaahu aanikhalihera wiiraana oHorebi.

³Yave aanikhalihera wiiraana ni hiyo ootheene nri ni okumi olelo; khoohiyono ni makholowaahu.

⁴Yave aahuuluma ni nyuwo ttunda ttunda mmooroni vamwaakoni.

⁵Ehuhuweene yeele miyo kaari variyari wa nyuwosa ni Yave weera koothalihereni masu a Yave, niwoko mwaamoova mooro ole muhitthunaka owela mwaako. Vano Muluku aaheera:

⁶“Miyo ti Yave Mulukwaanyu, mwa Yoowo ookhumihaleni wExipitu, elapo ya okaporo.

⁷Muhikhalane miluku sikina okihiya Miyo.

⁸Muhiipakele ecaambulo ya miluku sikina mulikanxeraka yakhalaru etthu eri wiirimu hoye hoye vathi, naari mmaahini.

⁹Muhikokhorele seiyo naari muhilape, niwoko Miyo, Yave Mulukwaanyu, ti Muluku a ehace. Miyo kinaattaruxa anamwane niwoko na soottheka sa asitithaya mpaka ekhapira yanaararu ni yanaaxexe ya yaawo ankithanya.

¹⁰Vaheera kinaakosoopa ni onnene yaawo ankisivela ni aneettela malamulowaaka — mpaka ikhapirasaya macira muloko.

¹¹Muhinyemule Nsina na Yave Mulukwaanyu, niwoko vekhaikhai Yave onimuttaruxa yoowo onnyemula Nsinanawe.

¹²Muttittimihere nihuku na eSaabadu mutteelikaha, ntoko Yave Mulukwaanyu oolamulenlaaweni.

¹³Mahuku mathannamosa a khula esimana mvareke mitekosanyu sootheene,

¹⁴mene nihuku nanaathannameeli ti eSaabadu ya Yave Mulukwaanyu. Nihuku nno muhivareru muteko nyuwo, hata anamwaniinyu asilopwana naari asithiyana, hata arumeiyaanyu asilopwana hoye hoye asithiyana, emombaanyu, buurwaanyu, naari wakhalaru muhuwaanyu, hata anamarwa ankhala musidadenimwanyu weera arumeiyaanyu asilopwana ni asithiyana yiitthuuwe, ntoko nyuwo muniitthuuwanyu.

¹⁵Muupuwelele weera mwaari ipottha wExipitu ni weera Yave Mulukwaanyu aahookhumihaniwo ni ntata noolipaxa ni moono wooweraxa. Tivawo Yave Mulukwaanyu oolamulenlaaweni ottittimihera nihuku na eSaabadu.

¹⁶Mwaattiitiimihe atithinyu ni amayinyu ntoko Yave Mulukwaanyu oolamulenlaaweni weera woorakameleni okumi ni sootheene siweetteleni nnenesene mweelaponi Yave Mulukwaanyu onoovahaaweni.

¹⁸Muhiraruwe.

²⁰Muhikhale namoona oowootha a mukhwiinyu.

²¹Muhimwiinlele mwaara a mukhwiinyu. Muhiinlele vaate wa mukhwiinyu, hoye hoye emattaawe naari epottha elopwana hoye hoye ethiyana, naari emombaawe, hata buurwaawe, naari yakhalaru yawawe.

²²Ala yaari masu uulummaawe Yave aleelaka muthukumano wootheene arumihaka, vamwaako mmooroni, mmahutteni ni mpiphini, ahaandyeereraka makina. Vahoolowaya aalepa yaawo vatthaabwani piili sa maluku, anakinnyerera.

²³Nyuwosa mwiiwakaru nsu nikhumaka mpiphini, mwaako ovarelaka, yaakaattamelasa asitokweene ootheene a ipuumbasanyu ni ahoolelaanyu.

²⁴Vano mwaaheera: “Yave Mulukwaahu oonoonihera ovuwawawe ni waarawawe ni nohiiwa nsunawe nikhumaka mmooroni. Olelo nohoona weera onoowereya mutthu opwaherera ni okumi, naari Muluku uulumaleene ni yoowo.

²⁵Vanonto, khanintthuna okhwa. Mooro mutokotoko ola onoonihisa. Napwaherera wiiwa nsu na Yave Mulukwaahu, nnimookhwa.

²⁶Vekhaikhai khawowo mutthu mweelaponi otonke wiiwa nsu na Muluku Mukumi nikhumaka mmooroni, ntoko hiyo niiwalaahu, anapwaherera ni okumi.

²⁷Moisesi, mwaattamele nyeenyu ni mwiiwe sootheene Yave Mulukwaahu aneeraawe ahime. Vahoolowaya munithalihere sootheene Yave Mulukwaahu ooleenlaaweni. Hiyo nniiwe ni nneettele.”

²⁸Yave aahiiwa sootheene mwaakeerenlaanyu, anakeerela: “Miyo kohiiwa yeeyo muloko ola oweerenlaayani ni sootheene weenraaya wohuuluma nnene.

²⁹Ohaawelawaka ti weera owo opwaherere otthuna okittittimiha ni wiiwelela malamulowaaka ootheene weera weetteleye nnene muloko owo ni anamwanaaya wa mahuku ootheene!

³⁰Murowe, mwaaleele weera ehokoleele muheemanimwaya.

³¹Vaheera nyuwo mukhale va ni Miyo weera kooleeleni malamulo ootheene eyo tiiyo ikano ni sooruma sootheene nyuwo muneeraanyu mwaaxuttihe. Vano awosa yeetteleke mweelaponi Miyo kinaavahaaka ntoko yawayeene.”

³²Tivawo, mwiipasoope woopaka sootheene Yave Mulukwaanyu oolamulenlaaweni; muhihapuweru.

³³Mweetteke mahuku ootheene mphironi Yave Mulukwaanyu oolamulenlaaweni weera mukhale ni okumi, sootheene siweetteleni nnene, ni mahukwaanyu yaandyeerereye mweelaponi muneeraanyu mukuxe.