Read Makhuwa-Shirima Deuteronomiyo 6 Bible Online

Deuteronomiyo 6 - Makhuwa-Shirima bible

Deuteronomiyo 6

¹Ala ti malamulo, ikano ni soolamula sootheene Yave Mulukwaanyu aakileenlaawe weera kooxuttihaseni wiiwelela mweelaponi munrowaanyu okuxa.

²Mooteene yoowo, nyuwosa anamwaniinyu ni anamwanaaya mmwimoove Yave Mulukwaanyu mahuku ootheene a okumaanyu ni mmwiiwelele ikanosawe ni soolamulasawe sootheene kinoolamulelasaakani weera owaatteleni okumi.

³Mwiiwe aYixrayeli ni mwiiwelelase weera sootheene siweetteleni nnene mwaattaka mulaponi waattiyaayawo mukaka ni oravo, ntoko oororomelihalaaweni Yave Muluku a makholowaanyu.

⁴Mwiiwe aYixrayeli: Yave Mulukwaahu ti Yave Mmoharu.

⁵Munsivele Yave Mulukwaanyu ni murimaanyu wootheene, okumaanyu wootheene ni ikurusanyu sootheene.

⁶Malamulo ootheene ala kinoovahaakani olelo ekhaleke vamurimaniwanyu.

⁷Mwaaxuttiheke anamwaniinyu. Mwaathalihere nyuwosa mwaakilaathiki owaani; mweettaka mphironi, mwiixaatalelaka hoye hoye mwaavenyaka.

⁸Mutthukelele ala ntoko eneneero mmoononi ni vayuuciniwanyu.

⁹Mwalepe musereemuni sa impasanyu ni vamulakowanyu.

¹⁰Vano Yave Mulukwaanyu onimoovoleihani mweelaponi aaroromelinghaawe ni nlipelo makholowaanyu Abrahaamu, Isaki ni Yakobe woovahani nyuwosa; elapo ya isidade sitokotoko ni sooreera nyuwosa muhitenkaanyu,

¹¹ni impa soosareya itthu sooreerela muhilimmaanyu, ihime muhithimpaanyu ni imatta sa iwuuva* ni sooliveira* nyuwosa muhiphatteiyaanyu. Vanonto, iyo saakhumelelaka nyuwosa mwaacaaka, munatteeliwa murima,

¹²mwiipasoope weera muhimuttiwale Yave ookhumihaleni wExipitu, elapo ya okaporo.

¹³Mmoove Yave Mulukwaanyu, munrumeele Yoowo paahi ni mulipele Nsinanaweru.

¹⁴Muhitthare miluku sikina sa miloko sa mukhwipimwanyu,

¹⁵niwoko Yave Mulukwaanyu ori variyariwanyu ti Muluku a ehace ni isarasawe nsoopattelaseni ni Owo onimoophwatasani mulaponi.

¹⁶Muhimoote murima Yave Mulukwaanyu ntoko mwaapankaanyu oMasa.

¹⁷Mwiiwelele nnenesene malamulo a Yave Mulukwaanyu ni ikano ni sooruma Owo oolamulenlaaweni.

¹⁸Mpake yeeyo eri ya ekhaikhai ni yooreera wa Yave weera sootheene siweetteleni nnenesene. Hiiho munoovolowa mukuxaka elapo yooreera Yave aaroromelinghaawe ni nlipelo makholowaanyu,

¹⁹awoomolaka amwiittanaanyu ootheene ohoolowanyu, ntoko Yave aaroromelinghaawe.

²⁰Muhoolommo, anamwaniinyu yookohani: “Malamulo, ikano ni sooruma iya Yave Mulukwaahu oolamulenlaaweni sintaphulelani?”

²¹Vano mwaaleele: “Naari ipottha sa Farawu* wExipitu, mene Yave aanikhumihawo ni ntata nooweraxa.

²²Yave aapaka vamaithoniwahu ineneero sootikhiniheya sitokotoko ni soowoopihaxa wExipitu, amuhooxaka Farawu* ni emusaawe yootheene.

²³Vaheera Owo aanikhumihawo aniruuhaka nno elapo aaroromelinghaawe ni nlipelo makholowaahu.

²⁴Yave aanilamula wiiwelela ikano sootheene iya ni omoova Yave Mulukwaahu weera nireereliwe mahuku ootheene wuureliwaka okumaahu, ntoko nraahu olelo.

²⁵Vano neettela nlamulo nootheene nna vamaithoni wa Yave Mulukwaahu ntoko onilamulenlaawe, vano wu onuukhale waakhuleliwa ni Muluku.”