Read Makhuwa-Shirima Deuteronomiyo 8 Bible Online

Deuteronomiyo 8 - Makhuwa-Shirima bible

Deuteronomiyo 8

¹Mwiipasoope woowiiwelela malamulo ootheene ala kinoovahakani olelo weera nyuwosa mukhalase ni okumi, mwaandyeererane ni mwakuxase elapo Yave aaroromelinghaawe ni nlipelo makholowaanyu.

²Muupuwelele moota Yave Mulukwaanyu oweettihalaaweni munkwahani wootheene munikareni wookwana iyaakha miloko mixexe iye. Owo aahooyevihasani awootakani murima, eerelaka osuwela yeeyo eri mmirimanimwanyu ni mwaariki mwiiwelele malamulowaawe hoye hoye mwaahiiwelela.

³Aahooyevihasani, anoohiyasani mvoliwaka etala. Vahoolowaya aahoocihasani ni emana* mwa yeeyo hata nyuwo naari makholowaanyu yaahaasuwenlaaya. Owo aatthuna wooxuttihani weera mutthu khankhala ni okumi niwoko na yooca paahi, mene na masu ootheene anrweela wa Muluku.

⁴Soowarasanyu khasathaalaru ni inawosanyu khasiiparu muyaakhani miloko mixexe iye.

⁵Musuwele vamurimaniwanyu weera Yave Mulukwaanyu onoolakani nyuwo ntoko mulopwana onimulakaawe mwanawe.

⁶Mwiiwelele malamulo a Yave Mulukwaanyu mweettaka mphironimwawe, munttittimihaka.

⁷Yave Mulukwaanyu onooroihani mweelaponi yooreeraxa; elapo yoosareya nyooloko, maratta ni anaattuuttu antthimaka mmaxaapwani ni mmanyaakoni;

⁸elapo ya etrigu, esevada*, ematta ya iwuuva*, nyiri sa efiigu* ni sa irooma*, makhura a sooliveira* ni oravo;

⁹elapo mwa yeeyo ehinthowaayawo yooca ni ehinghalelaayawo etthu; elapo ya nyala siraayano iyuuma ni mmattumuxanimwaya ongwereyaaya othipa ebronze*.

¹⁰Muciiyeene munavona, munttottopele Yave Mulukwaanyu niwoko na elapo yooreera oovanghaaweni.

¹¹Mwiipasoope weera muhimuttiwale Yave Mulukwaanyu, muhiyaka wiiwelela malamulowaawe, ikanosawe ni soorumasawe miyo kinoovahasaakani olelo.

¹²Mmuupuwelele Yave niwoko, mwaacaaka ni mwaavonaka, mwaatekaka impa sooreera, mwiitekihaka,

¹³mihuwosanyu musurukhwaanyu ni sooreelasanyu sootheene saandyeerereyaka,

¹⁴vano onoowereya othatuwa oowiixoona munttiwalaka Yave Mulukwaanyu ookhumihaleni wExipitu, elapo ya okaporo.

¹⁵Owo aaweettihasani munikareni ntokotoko ni noowoopiha; elapweene yeele yoowuuma ni yoohikhala maahi erino inowa ni awalisi oohapala. Owo aahokhumiherasani maahi vamwala

¹⁶anoocihasani emana* munikareni, mwa yeeyo yahaasuwenlaaya makholowaanyu. Aapaka yeeyo weera ooyevihaseni awootakani murima, eerelaka sootheene siweettelaseni nnene.

¹⁷Onoowereya wiixeerela: “Mihakhu sootheene iya kiwenre ni eruswaaka ni ikurusaka.”

¹⁸Vaheera mmuupuwelele Yave Mulukwaanyu niwoko ti Yoowo onoowerihani ophwanya mihakhu aakhulelihaka hiiho wiiraanawawe aalipelenlaawe makholowaanyu, ntoko onooneyaaya olelo.

¹⁹Nyuwosa mwamuttiwala Yave Mulukwaanyu muttharaka ni mulapaka miluku sikina weera mukokhorele ohoolowaya, kinoororomelihasani olelo weera vekhaikhai munoophwatiwa.

²⁰Moohimwiiwelelani Yave Mulukwaanyu, nyuwosa munoophwatasiwa ntoko saapakiwaaya miloko sikina mwa seiye Yave aaphwantaawe ohoolowanyu.