Read Makhuwa-Shirima Yohaane 1 Bible Online

Yohaane 1 - Makhuwa-Shirima bible

Yohaane 1

¹Ompacereroni naari Nsu, ni Nsu naari ni Muluku, ni Yooweene aari Muluku.

²Nno naari ni Muluku ompacereroni.

³Itthu sootheene saapattuxiwe ni Nsu nno. Kheewoworu etthu ekhanle nihipankaaya nenno.

⁴Okumi waari mwa Nenno, ni Nno naari waara wa atthu.

⁵Waara ommwaleela mpiphini ni epiphi kheewinne.

⁶Aari mulopwana aarummwe ni Muluku, nsinanawe Yohaane.

⁷Owo aahoowa ntoko namoona weera akhalele onamoona, ni hiiho atthu ootheene eroromele niwoko na yoowo.

⁸Owo muneenaawe khaahiyono waara, aarweenletho okhalela onamoona mwaha wa waara.

⁹Weera orwaaka mweelaponi Waara wa ekhaikhai, mwa Yoowo onaamwaleela atthu ootheene.

¹⁰Owo aari mweelaponi, elapo epattuxiwe ni Yoowo, elapotho khayaamusuwenle.

¹¹Aarweenle yaawo yaari awawe, mene awawe khayaamwaakhenle.

¹²Wa soothesene, wa yaale yaamwaakhenle, yaale anroromela mwa Nsinanawe, ohaavaha owera othatuwa anamwane a Muluku;

¹³yaale ahiyariwe ni ekhapira ya omutthu, hata ni otthuna wa erutthu, naari ni otthuna wa mulopwana, mene ayariwe wa Muluku.

¹⁴Nsu noothatuwa erutthu ni naakhala variyariwahu. Nohoona ovuwawaya, aani ovuwa wa Mwaana mmoharu aawiiye wa Atiithi, oosareya mahala ni ekhaikhai.

¹⁵Yohaane onnakhalela onamoona Nsu. Owo onnakhuwela, eeraka: “Owo ti Yoole kaamuhimmaaka: ‘Yoole ongwa ottuliwaka ti Mutokweenaaka, niwoko miyo kihinaaye okhala, Owo aakhala.’”

¹⁶Ootheene hiyo nohaakhela wa soowaattasawe mahala mwa mahala.

¹⁷Vano, nlamulo nivahiwe ni Moisesi, mahala ni ekhakhai erwiiye ni Yeesu Kristu.

¹⁸Khaawo omoonne Muluku, ahikhanle Mwanawe mmoharu ori vamoha ni Atiithi mwa Yoowo aasuwelihale.

¹⁹aYuda oYerusaleemu yaarumaaya asaserdoti* ni aLeevi weera emukohe aari taani, onamoona Yohaane aakhalenlaawe ti ola:

²⁰Owo aahima ni khaakhoontte, aani aahima mwaatthuni: “Nkihiyono Kristu.”

²¹Yaamukoha: “Vano, taani nyuwo? Eliya?” Owo aaheera: “Nkihiyono.” “Mprofeeti?” Owo aawaakhula: “Hoye.”

²²Ommaleloni yaamukoha: “Nyuwo taani? Munaakhule weera naaleele yaawo anirumme. Munghima eheeni sa muneenaanyu?”

²³Yohaane aawaakhula ni masu a mprofeeti Yesaya: “Miyo nsu ninkhuwela munikareni: ngwookolele ephiro Apwiya.”

²⁴aFarisi* akina yaarummwale

²⁵yaamukohakoha: “Vano, heeni mumpatisaanyu muhikhanle Kristu, hata Eliya, hata mprofeeti?”

²⁶Yohaane aawaakhula: “Miyo kimpatisa ni maahi; variyariwanyutho ookhala Mukina nyuwo muhimusuwenlaanyu.

²⁷Owo ti Yoowo onrwa ottuliwaka, ni miyo nkimphwanela otaphula miraamba sa ikwakwaattasawe.”

²⁸Itthu sootheene seiye seereiye oBetaniya okhopela wa oYordanu, weiwo Yohaane eeraawewo opatisa.

²⁹Oxaawaya Yohaane aamoona Yeesu amwaattamelaka ni aaheera: “Moone — Eputtiputthi ya Muluku emvenxa soottheka sa elapo ya vathi.

³⁰Ola ti Yoole kaamuhimmaaka, keeraka: ‘Ottuliwaka onimoorwa Mulopwana Mmoha ookipwaha miyo, niwoko miyo kihinaaye okhala, Owo aakhala.’

³¹Miyo muneenaaka nkaamusuwenle, mene niwoko na yeeyo miyo kirwiiyaaka opatiso ni maahi weera Owo awe ni ooniheriwe wa aYixrayeli.”

³²Vano Yohaane aakhalela onamoona ola: “Miyo kohoona Munepa okhuruwaka wiirimu ntoko ekhunda enamweemelela Yoowo.

³³Miyo nkaarwa omusuwela kahaaleeliwe ni Yoole okirumme opatiso ni maahi: ‘Yoole muneeraanyu mmoone omukhuruwelaka Munepa ni omweemelelaka — ti Yoowo ompatisa ni Munepa Wootteela.’

³⁴Miyo kohoona ni kinnakhalela onamoona weera Ola Mwaana a Muluku.”

³⁵Oxaawaya Yohaane aaritho vaavaale vamoha ni eeli a oohuseraawe.

³⁶Amoonakaru Yeesu aviraka, aaheera: “Mmoone — Ola Eputtiputthi ya Muluku!”

³⁷Emwiiwakaru uulumaka yeeyo, oohusera ooweeli ale yaamutthara Yeesu.

³⁸Arukunuwaka ni awoonaka Yeesu ooweeli emuttharaka, aahaakoha: “Muntthuna eheeni?” Awo yaamwaakhula: “Rabi (entaphulela ‘Muhusiha’), muphiyenre woowi?”

³⁹Owo aawaakhula: “Murweeke ni munimoona.” Vano yaarowa oxekuwa, yaahoona Owo aaphiyenraawewo ni yaakhala vamoha ni Yoowo nihuku nootheene nne.

⁴⁰Andreiya, munneiye Simeyoni Pedru, aari mmoha a eeli ale yiiwale seiye Yohaane aahimmaawe ni yaamutthanre Yeesu.

⁴¹Oopacera aamphwannyaawe aari Simeyoni, munneiye ni aamweerela: “Noomphwanya Mesiya (eyo tiiyo Kristu).”

⁴²Vano aamurongha wa Yeesu. Yeesu aangweha yoowo ni aamweerela: “Nyuwo ti Simeyoni, mwaana a Yohaane. Mmwiitthaniwe Kefasi, entaphulela Pedru.”

⁴³Oxaawaya Yeesu aahuupuwela orowa oGalileiya. Aamphwannyaawe Filipe, aamweerela: “Mukitthareke.”

⁴⁴Filipe, aari oBetisayida, hiiho ntoko Andreiya ni Pedru.

⁴⁵Owo aamphwanya Nataneyeli ni aamweerela: “Noomphwanya Yoole aamulempaawe Moisesi mmalamuloni, nitho mwa Yoowo maprofeeti yaamulempaaya: Yeesu muNasarete, Mwaana a Yoseefe.”

⁴⁶Nataneyeli aamukoha: “Nasarete? Enoowereya orwawo etthu yooreera?” Filipe aamweerela: “Ngwe ni moone.”

⁴⁷Amoonaka Nataneyeli akhuveelaka, Yeesu aaheera: “Mmoone — muYixrayeli a ekhakhai ni oohilokottheya.”

⁴⁸Nataneyeli aamukoha: “Mukisuwenle woowi?” Yeesu aamwaakhula: “Miyo kiwoonneni mwaaraanyu nlelo vathi wa mwiri wa efiigu, Filipe ahinaaye owiitthanani.”

⁴⁹Vano Nataneyeli aahima: “Muhusiha, nyuwo Mwaana a Muluku, Mwene a aYixrayeli.”

⁵⁰Yeesu aamweerela: “Munroromela niwoko keenraaka kiwoonneni vathi wa mwiri wa efiigu. Nyuwo mmoone itthu sitokotoko soopwahaxa seiya.”

⁵¹Aapwahereratho: “Miyo kinooleelani ekhaikhai: Nyuwo munimoona wiirimu woohuleya ni andyelo a Muluku ewelaka ni emukhuruwelaka Mwaana a mutthu.”