Read Makhuwa-Shirima Yohaane 10 Bible Online

Yohaane 10 - Makhuwa-Shirima bible

Yohaane 10

¹Miyo kinoororomelihani weera yoole ohimvolowa munikhoolani na ikhondoolo aviraka vamulako, mene ongwela nipuro nikina, owo ti namwiiya ni mutakhali.

²Yoole omvolowa vamulako ti mukukhuli a ikhondoolo.

³Namalipelela a mulako onoomuhulela mukukhuli nsele ni ikhondoolo sinimwiiwa nsunawe. Owo onniitthanela masina a ikhondoolosawe ni onnakhumihera vaate.

⁴Akhumiheraka vaate ikhondoolosawe, owo onoohoolela ni iyo sinoomutthara niwoko soosuwela nsunawe.

⁵Khasirwatho simutthara oohisuwanyeya, vekhaikhai, nsimutthawe yoowo niwoko khasisuwenle nsu na mutthu oohisuwanyeya.”

⁶Yeesu aapaka niphwanaphwaniho nne, mene awo khayiiwexenxe yeeyo aaleenlaawe.

⁷Vano Yeesu aahima veeli: “Kinooleelani ekhaikhai: Miyo ti mulako wa ikhondoolo.

⁸Ootheene yaarwiiye kihinaaye Miyo, yaari anamwiiya ni anamatakhala, mene ikhondoolo khasaawiiwale.

⁹Miyo ti mulako. Yoowo omvolowa wa Miyo anaavuluxiwe. Anaavolowe, anaakhume ni anaaphwanye sooca.

¹⁰Namwiiya onrweela wiiya, wiiva ni ophwata paahi. Miyo kaarweenle weera atthu ekhalane okumi, aani okumi woowaattaxa.

¹¹Miyo ti Mukukhuli ooreera. Mukukhuli ooreera omvaherera ikhondoolo okumaawe.

¹²Namuteko ooliveliwa khahiyono muneene a ikhondoolo. Hiiho, oonaka weera mwiici onimoowa, onoohiya ikhondoolo ni onootthawa. Vano mwiici onoovara ikhondoolo ni onoomwaraxa.

¹³Owo ontthawa niwoko ti ooliviwa ni khampwattha ikhondoolo.

¹⁴Miyo ti Mukukhuli ooreera. Koosuwela ikhondoolosaka ni iyo sookisuwela,

¹⁵hiiho ntoko Atiithi akisuwenlaaya ni Miyotho kohaasuwela. Miyo kimvaherera ikhondoolo okumaaka.

¹⁶Kookhalano ikhondoolo sikina sihikhanle sa nikhoola nna. Ontthuneya weera Miyo kikukhuletho iyo. Iyo nsiiwe nsunaka ni hiiho nsikhale nikhoola nimoha sikhalanaka Mukukhuli mmoha paahi.

¹⁷Tivawo Atithaka ankisivelaaya, niwoko kimvaha okumaaka weera kikuxetho yoowo.

¹⁸Khaawo onkaakha okumaaka, mene Miyo kimvaherera yoowo niwoko na olakelawaka. Kookhalano ikuru woovaha ni wookuxatho. Nlamulo nna kaakhenle wa Atithaka.”

¹⁹Waakhumelelatho onyakulihana variyari wa aYuda niwoko na masu ale.

²⁰Ancipale a yaawo yaaheera: “Owo orino munepa woonanara ni ti naanepa! Heeni nimmwiiwaahu?”

²¹Akinatho yaaheera: “Masu ala khaahiyono a Mulopwana orino munepa woonanara. Munepa woonanara onoowera ohula maitho a mutthu oohoona?”

²²Vano, yaakhala efesta ya wuupuwelela otteelihiwa wa Empa ya Muluku oYerusaleemu. Waari mulaala

²³ni Yeesu aari Mpaani mwa Muluku aviraka mpithela wa Salomoni.

²⁴aYuda yaathukumana emurukureenreene emweerelaka: “Mpaka yaakhani hiyo nneeraahu niweherere yoowaakhulaanyu? Nyuwo mwaari Kristu, munileele mwaatthuni.”

²⁵Yeesu aaweerela: “Miyo kohooleelani, mene khamunroromela. Miteko Miyo kimpakaaka mwa Nsina na Atithaka, sinnakikhalela onamoona;

²⁶nyuwotho khamunroromela niwoko khamuhiyono a ikhondoolosaka.

²⁷Ikhondoolosaka sinniiwa nsunaka; Miyo koosuwela iyo ni iyo sinnikitthara.

²⁸Miyo kimvaha okumi woohimala ni iyo khasirwa siriheya. Khaawo aneera awere okaakha mmatatanimwaka.

²⁹Atithaka akivanghe seiyo ti oowaapwaha ootheene. Khaawo aneera awere owaakha mmatatani mwa Atithaka.

³⁰Miyo ni Atiithi nri mmoharu.”

³¹aYuda yaattottatho maluku weera emvonye,

³²mene Yeesu aaweerela: “Miyo koowooniherani miteko sincipale sooreera sinrweela wa Atiithi. Niwoko na muteko heeni wa seiye nyuwo muntthunaanyu okivonya maluku?”

³³aYuda yaamwaakhula: “Hiyo khannoovonyani maluku niwoko na muteko wooreera, mene niwoko na oveiha. Vano, murookhalaru mutthu paahi mohiixoonihera ntoko Muluku!”

³⁴Yeesu aawaakhula: “Kheelempwe munlamulonimwanyu: ‘Miyo keenre weera nyuwo muri miluku’?

³⁵Hapo Muluku oowiitthana miluku yaale nnaarweela nsu na Muluku — ni Yoolempwa* kheenooceeleya —

³⁶ankha Yoole Atiithi amutteelinghaaya ni amuruminghaaya mweelaponimu? Vano, heeni nyuwo munkootheraanyu weera kinooveiha keeraka weera kiri Mwaana a Muluku?

³⁷Miyo kaahipaka miteko sa Atithaka, muhikiroromele.

³⁸Kapakatho miteko sa Atithaka, orookhalaru weera khamuntthuna okiroromela, muroromele mwa miteko weera musuwele ni mwiiwexexe weera Atiithi ari mwa Miyo ni Miyotho mwa Yaawo.”

³⁹Awo yaaheerera veeli omvara, mene Owo aahoopowa mmatatanimwaya.

⁴⁰Vano Yeesu aalapuwatho oYordanu ni aarowa vanipuroni nne Yohaane aapatisaawe mmahukuni oopacera a mutekwaawe. Aakhalawo

⁴¹ni atthu ancipale yaarowa weiwo aaraawewo yeeraka: “Ori mweeraru Yohaane ahinatoke opaka eneneero yootikhiniheya, sootheene owo aahimaawe mwaha wa Mulopwana Ola saari sa ekhaikhai.”

⁴²Ni weiwo ancipale yaamuroromela Yeesu.