Read Makhuwa-Shirima Yohaane 11 Bible Online

Yohaane 11 - Makhuwa-Shirima bible

Yohaane 11

¹Vano, mulopwana mmoha iitthaniwa Lazaru aamvoreiwa. Aakhala oBetaniya, muttetthe wa Mariya ni munneiye Marta.

²Mariya mwa yoowo murokoriye Lazaru aavoreiwa, aari Mariya yoowo aattikitthenle Apwiya ni aawuukuntthe inaawosaya ni mayihaawe.

³Vano axirokoriye yaamuruma omweerela Yeesu: “Apwiya, yoole munimusivelaanyu onoovoreiwa.”

⁴Iiwalaawe yeeyo, Yeesu aaheera: “Eretta eyo kheehiyono eneera emwiive. Ti wa ovuwa wa Muluku weera Mwaana a Muluku avuwihiwe niwoko na yeeyo.”

⁵Yeesu aamusivela Marta, munneiye ni Lazaru.

⁶Vekhaikhai, iiwaka weera Lazaru aamvoreiwa, aakhala mahuku meelitho weiwo aaraawewo.

⁷Vahoolowaya, aaweerela oohuseraawe: “Nrowe nihokoleele oYudeiya.”

⁸Awo yaamweerela: “Muhusiha, vanaanoweene aYuda yaaheerera woovonyani maluku. Hata hiiho, muntthuna ohokoleelawo?”

⁹Yeesu aawaakhula: “Nihuku khaninono iwoora muloko ni piili? Yoowo oneetta othana khankwattuliwa, niwoko onimoona ngwaarani mwa elapo ya vathi.

¹⁰Eettaka ohiyu, onookwattuliwa niwoko mwa yoowo khoowowo waara.”

¹¹Amalihaka ohima yeeyo, aapwaherera aweerelaka: “Nthamwenaahu Lazaru onookona, kinkelatho weiwo weera kamvenxe.”

¹²Oohuseraawe yaamwaakhula: “Apwiya owo akona, onoolama.”

¹³Yeesu uuluma mwaha wa okhwawawe, oohuseraawetho yuupuwela weera Owo aahima paahi sa ikhove.

¹⁴Vano Owo aahaaleela nnenesene: “Lazaru ohookhwa,

¹⁵ni niwoko na nyuwo koohakalala Miyo nkaakhanlewo weera nyuwo muroromele. Nrowe wa yoowo.”

¹⁶Vano, Tomaxi, iitthaniwa Didimu, aaweerela oohusera akina: “Nrowetho weera nakhwe ni Yoowo.”

¹⁷Aphiyaka, Yeesu aahoona weera Lazaru aari munihiyeni wookwana mahuku maxexe.

¹⁸Orakamelana oBetaniya ni oYerusaleemu waari ikilomeetru* sookwana ixexe

¹⁹ni aYuda ancipale yaarowa omuxekura Marta ni Mariya weera yaapepese niwoko na oriheya wa murokoraya.

²⁰Iiwalaawe Marta weera Yeesu onoophiya, aavenya weera amukumanane, mene Mariya aahala owaani.

²¹Marta aamweerela Yeesu: “Apwiya, mwaari wenno, murokoraka saano ahikhwiiye.

²²Koosuwelatho weera, hata vaanaano va, Muluku anoovaheeni sootheene muneeraanyu mumvekele.”

²³Yeesu aamweerela: “Murokorinyu onoovenyerera.”

²⁴Marta aamwaakhula: “Koosuwela weera anaavenyerere moovenyererani wa nihuku nookisera.”

²⁵Yeesu aamweerela: “Miyo ti Ovenyerera ni Okumi. Yoole onkiroromela Miyo, hata akhwe, anaakhale ni okumi,

²⁶ni yoowo onkhala ni okumi ni onkiroromela Miyo, kharwa akhwa wa mahuku ootheene. Munroromela yeeyo?”

²⁷Owo aamwaakhula: “Aani Apwiya, miyo koororomela weera Nyuwo Kristu, Mwaana a Muluku eera aweeke elapo ya vathi.”

²⁸Amalihaka ohima yeeyo, aarowa owaani ni amwiitthanaka vakhwipi Mariya, aamweerela: “Muhusiha ori va ni onoowiitthanani.”

²⁹Iiwaka yeeyo, Mariya aavenya woowaakuveya ni aarowa wa Yoowo.

³⁰Yeesu nlelo eera ahinaaye ovolowa mmuttettheni, mene aari vanipuroni aakumannaaweno Marta.

³¹aYuda yaari ni Mariya mpaani empepesaka, yoonaka weera owo aavenya woowaakuveya ni aakhuma, yaamutthara yuupuwelaka weera owo aakela onihiyeni weera iinlewo.

³²Aphiyaka vanipuroni aaraawe Yeesu ni amoonaka Yoowo, Mariya ahuuramela inaawosawe ni aamweerela: “Apwiya, mwaari wenno, murokoraka saano ahikhwiiye.”

³³Amoonaka Mariya ni aYuda yaamuhoonle yiinlaka, Yeesu aathananaxa ni aariipiwa murima.

³⁴Owo aamukoha: “Mmwiyaathiye woowi?” Awo yaamwaakhula: “Ngwe ni moone, Apwiya.”

³⁵Yeesu aahiinla.

³⁶Vano aYuda yaaheera: “Moone moota Owo aamusivelaawe.”

³⁷Akinatho a yaawo yaaheera: “Owo aahunle maitho a mutthu oohoona khaawera omooceeliha mulopwana owo okhwa?”

³⁸Yeesu, athanananxeene veeli, aarowa onihiyeni. Naari nikhuku ni nluku ntokotoko niikaathiwe vamulako.

³⁹Owo aaheera: “Mvenxe nluku.” Marta, murokoriye aakhwiiye aamweerela: “Apwiya owo onimunkhaxa niwoko aakwana mahuku maxexe.”

⁴⁰Yeesu aamweerela: “Miyo nkooleenleni weera mwaroromela, munimoona ovuwa wa Muluku?”

⁴¹Vano yaavenxa nluku. Yeesu aaweha osulu ni aaheera: “Tiithi, Miyo kinootthapelani niwoko mookiiwa.

⁴²Koosuwela weera munkiiwa mahuku ootheene, mene kineera yeeyo mwaha wa muloko wa atthu ori va, weera ororomele weera Nyuwo mukirumihale.”

⁴³Amalihaka ohima yeeyo, Yeesu aakhuwelaxa: “Lazaru, mukhumele vaate!”

⁴⁴Ookhwa aakhuma ni matata ni inaawo sivitikeleliweene esaanda ni ekhovaawe ekhuneeliweene ekuwo. Yeesu aaweerela: “Mvenxe esaandaawe ni munghiye arowe.”

⁴⁵Ancipale a aYuda yaarwiiye omuxekura Mariya, yoonaka yeeyo Yeesu aapankaawe, yaamuroromela.

⁴⁶Akinatho a yaawo yaarowa wa aFarisi* ni yaahaaleela yeeyo Yeesu aapankaawe.

⁴⁷Vano ahooleli a asaserdoti* ni aFarisi* yaalattula muthukumano wa eSineedriyu*. Awo yaakohana: “Neereke hai? Iwo ori Mulopwana Owo apakaka ineneero sootikhiniheya.

⁴⁸Hiyo namuhiya hiiho, ootheene eniimuroromele, vano aRooma eniiwe ni eniinanarihe nipuronahu nitho mulokwaahu.”

⁴⁹Mmoha a yaawo, iitthaniwa Kayafasi, wa eyaakha yeele aari mutokweenexa a asaserdoti*, aaheera: “Nyuwo khamuniiwexexa etthu!

⁵⁰Khamwiiwexenxe weera fataari akhwe mutthu mmoha wa muloko wa atthu, ohikhanle oriheya muloko wootheene?”

⁵¹Owo khaahima yeeyo iihimaka muneenaawe, mene areene mutokweenexa a asaserdoti* eyaakha yeele, aathalihera otthuna wa Muluku weera Yeesu eera akhwele muloko wa aYuda.

⁵²Ohikhanle paahi wa muloko wa aYuda, menetho wa anamwane a Muluku amwaramwareiye weera aathukumanyihe mmulokoni mmoha.

⁵³Hiiho evenyero vaavaale awo yaavaanela omwiiva.

⁵⁴Tivawo Yeesu eetteettaawe mwaatthuni eriyari ya aYuda. Ohiyanawaya aahiivenxa arowaka elapo emoha vakhiviru wa nikare, wa muttetthe mmoha wiitthaniwa Efrayimi aakhalaawewo ni oohuseraawe.

⁵⁵Ekhuveelaka ehuhu ya mPaska* a aYuda, atthu ancipale a elapo yeele yaarowa oYerusaleemu weera ekwanihere ikhovelelo sa orapiha ahinaaye mPaska*.

⁵⁶Atthu yaapwaherera omwaasaasa Yeesu ni Mpaani mwa Muluku yannakohana: “Munuupuwela hai? Weeraka Owo anaawe ofestani?”

⁵⁷Vano, ahooleli a asaserdoti* ni aFarisi* yaavaha malamulo weera mukina asuwela nipuro oraawe Yeesu, aaleele weera emvare.