Read Makhuwa-Shirima Yohaane 12 Bible Online

Yohaane 12 - Makhuwa-Shirima bible

Yohaane 12

¹Mahuku mathannamosa ahinaaye mPaska* Yeesu aaphiya oBetaniya aakhalaawe Lazaru, mwa yoowo aamvenyereringhaawe mookhwaani.

²Weiwo yaamurehererela yooca Yeesu. Marta arumeelaka, Lazaru areene mmoha a yaale yaakilaathiye vameesa ni Yoowo.

³Vano Mariya aakuxa mukoomba woosareya makhura ooreera a enardu* yaari makhura oorikaxa. Aattikitthela inaawo sa Yeesu ni aamuukuttha ni mayihaawe. Ni empa yaasareya ni wunkhela wa makhura ale.

⁴Mmohatho a oohuseraawe, Yudasi Iskariyoti, mwa yoowo eera amvarihe Yeesu, aattaandawula:

⁵“Heeni makhura ala ahithumihiwaaya ni musurukhu enavahiwa atthu oohaawa? Saangwina idinaariyu 300.”

⁶Owo khuulumme hiiho aapwatthaka atthu oohaawa, mene niwoko aari namwiiya. Ntoko namalipelela a nihottha na musurukhu, annakhovelela ovenxa yeeyo yaaheliwamo.

⁷Yeesu aamwaakhula: “Munghiye muthiyana mmuretteleni. Yeeyo opankaawe eri ya nihuku na ovithiwawaka.

⁸Vano, atthu oohaawa eniikhale ni nyuwo mahuku ootheene, mene Miyo nkinrowa okhala ni nyuwo mahuku ootheene.”

⁹Yeereiyaka hiihaale, atthu ancipale a aYuda, yoonelelaka weera Yeesu aari vaavaale, yaahoowa khoohiyono paahi omoona Yeesu, menetho Lazaru, yoowo Yeesu aamvenyereringhaawe mookhwaani.

¹⁰Hiiho ahooleli a asaserdoti* yaavaanela weera emwiivetho Lazaru,

¹¹woonaka weera niwoko na yoowo ancipale yaahaahiya aYuda emuroromelaka Yeesu.

¹²Oxaawaya, atthu ancipale yaarwiiye ofestani yaahiiwa yeeriwaka weera Yeesu eera aphiyaka oYerusaleemu.

¹³Yaakuxa iphandi sa nivare ni yaavenya weera yamukumanane ekhuwelaka: “Hosana*! Ooreelihiwa ti Yoowo ongwa mwa Nsina na Apwiya! Ooreelihiwa ti Mwene a aYixrayeli!”

¹⁴Yeesu aamphwanya buuru mwaaxaana ni aangwela ntoko elempwaaya:

¹⁵Ohoove mwaana muthiyana a Siyoni. Woone, Mwenaawo aneera awaaka angwenleene buuru mwaaxaana.

¹⁶Ompacereroni oohuseraawe khayiiwexexa yeeyo. Paahi vahoolo wa ovuwihiwa wa Yeesu, awo yaahiiwexexa weera yeeyo yaalempwe yaari mwaha wa Yoowo ni weera itthu iye saamukhumelenle Yoowo.

¹⁷Atthu ancipale yaari ni Yoowo aamulamulenlaawe Lazaru okhuma munihiyeni ni aamvenyererihale mookhwaani, yaapwaherera omwaramwaxa etthu yeereiye.

¹⁸Atthu ancipale yaavenya erowaka omukumanano, niwoko yaahiiwa yeeriwaka weera Owo aapaka eneneero ele yootikhiniheya.

¹⁹Hiiho aFarisi* yaaheerelana: “Ngwehe, khaniwenre etthu. Moone moota elapo yootheene enimuttharaaya Yoowo!”

²⁰Wa yaawo yaarongwe ofestani weera yamulape Muluku, yaakhala aGrego akina.

²¹Awo yaamwaattamela Filipe aari oBetisayida wa oGalileiya ni nivekelo nimoha: “Apwiya, nintthuna omoona Yeesu.”

²²Filipe aarowa omuleela Andreiya, ni ooweeli vamoha yaamuleela Yeesu.

²³Yeesu aawaakhula: “Yoophiya ehuhu ya ovuwihiwa wa Mwaana a mutthu.

²⁴Miyo kinooleelani ekhaikhai weera enuku emoha ya etrigu yaahimorela vatthayani ni yaahikhwa, eniikhale emoha paahi. Yakhwatho, eniyiime soowiima sincipale.

²⁵Yoowo onsivela okumaawe anaayeleele, mene yoowo onthanya okumaawe mweelaponimu, anaasungere okumi woohimala.

²⁶Yoowo onkirumeela, ontthuneya okitthara, ni kiraakawo, murumeiyaaka anaakhalewotho. Atithaka eniimuttittimihe yoowo onkirumeela.

²⁷Vano munepaaka woothananaxa ni nkeere eheeni? Tiithi, mukivuluxe mwa ehuhu yeela! Hoye, kirweenle vekhaikhai wa yeeyo; wa ehuhu yeela.

²⁸Tiithi, mvuwihe Nsinananyu!” Vano naahoowa nsu na wiirimu: “Miyo koovuwiha ni nkivuwihetho.”

²⁹Atthu ancipale yaari vaavaale ni yiiwale yaaheera weera waakukutteiya. Akina yaaheera weera ndyelo aamuulumela.

³⁰Yeesu aaweerela: “Nsu nno nohoowa niwoko na nyuwo, ohikhanle wa Miyo.

³¹Yoophiya ehuhu ya nthorihelo na elapo ya vathi ela. Vano mutokweene a elapo ya vathi anoomoliwe.

³²Miyo, kaattukhuliwaka vatthayani, nkaapurulele ootheene wa Miyo.”

³³Owo aahima yeeyo weera awoonihere moota wa okhwa eeraawe ahaawe.

³⁴Atthu ancipale yaamweerela: “Nohiiwa munlamuloni weera Kristu anaakhale mahuku ootheene. Mungwera hai weera: ‘Ontthuneya ottukhuliwa Mwaana a mutthu?’ Taani Yoowo Mwaana a mutthu?”

³⁵Vano Yeesu aaweerela: “Wa ehuhu vakhaani nlelo, waara onuukhale variyariwanyu. Mweette nlelo mureeneno waara weera epiphi ehoovareni niwoko yoole oneetta mpiphini khasuwenle onkelaawewo.

³⁶Muroromele mwa waara nlelo mureeneno weera muthatuwe anamwane a waara.” Amalihaka wuuluma, Yeesu aavenya ni aawiipitha yaawo.

³⁷Aari mweeraru apankeene Yeesu ineneero sootikhiniheya sootheene iye vamaithonimwaya, awo khayaamuroromenle.

³⁸Eyo yeereiye weera ekwaniheriwe masu a mprofeeti, Yesaya yeenre: Apwiya, taani ororomenle mutthengaahu ni wataani ooniheriwe moono wa Apwiya?

³⁹Tivawo awo yahaaweraaya ororomela niwoko, ntoko Yesaya eenraawe nipuro nikina:

⁴⁰Aatatuxa oohoona maithwaaya ni ahuumiha mirimasaya weera ehoone ni maithwaaya, hata ehiiwexexe ni murima, hata ehirukunxe mirimasaya, ni Miyo kihaalamihe.

⁴¹Yesaya aahima yeeyo niwoko aahoona ovuwa wa Yeesu ni aahuuluma sa Yoowo.

⁴²Hata hiiho, asitokweene ancipale yaamuroromela Yoowo. Khayaalapatho nroromelonaya niwoko na aFarisi*, yoovaka woomoliwa muSinagogani*.

⁴³Vano yaasivela ovuwa wa atthu, ohikhanle ovuwa wa Muluku.

⁴⁴Yeesu aaheera akhuwelaka ni nsu ntokotoko: “Yoowo onkiroromela Miyo, khankiroromela Miyo paahi, menetho Yaale akiruminghe.

⁴⁵Yoowo onkoona, ongwoona Yaale akiruminghe.

⁴⁶Miyo kaarweenle mweelaponimu ntoko Waara weera atthu ootheene ankiroromela Miyo, ehipwaherere okhala mpiphini.

⁴⁷Akhala mukina oniiwa maswaaka ni ahineettela, Miyo nkinimuthoriha. Vano, nkirweenle othoriha elapo ya vathi, mene weera kivuluxe.

⁴⁸Ookhala mphuki wa yoowo onkhootta ni ohinaakhulela maswaaka. Masu maneenexa kinghimaaka, eniimuthorihe nihuku noomalihera.

⁴⁹Vano nkiixuulumenle muneenaaka, mene Atiithi akiruminghe yaakilamulela yoohima ni yoowuuluma.

⁵⁰Koosuwela weera nlamulonaya ti okumi woohimala. Tivawo, yeeyo kinghimaaka ti nnenesene yeeyo Atiithi akirummaaya ohima.”