Read Makhuwa-Shirima Yohaane 13 Bible Online

Yohaane 13 - Makhuwa-Shirima bible

Yohaane 13

¹Yaahanle ehuhu vakhaani ahinaaye mPaska*. Yeesu aasuwela weera yoophiya ehuhu eeraawe ahiyeke elapo ya vathi ni arowe wa Atiithi. Owo aahaasivela awawe yaari mweelaponi, aani aahaasivela mpaka ommaleloni.

²Yeera ereene vameesa ecaaka, ni Diyabu* aamusesera Yudasi Iskariyoti, mwaana a Simeyoni weera amvarihe Yeesu.

³Yeesu aasuwela weera Atiithi yaahiikaathi itthu sootheene vathi wa ikurusawe ni weera aarwiiye wa Muluku ni anaamuhokoleeletho Yoowo.

⁴Hiiho Yeesu aavenya vameesa, aakuxa mukaandyowaawe ni aahiitthukela etuwaaliya muyuununi.

⁵Vahoolowaya aahela maahi mbasiyani, anapacera orapiha inaawo sa oohuseraawe uukutthaka ni etuwaaliya yaari muyuununi.

⁶Aaphiya wa Simeyoni Pedru aamweerenle: “Apwiya mmwirapihe inaawosaka?”

⁷Yeesu aamwaakhula: “Nyuwo khamuniiwexexa vano yeeyo kingweerelaakani, mene ohoolowaya, mmwiiwexexe.”

⁸Pedru aaheera: “Hoye! Khamurwa murapiha inaawosaka!” Yeesu aamwaakhula: “Miyo kaahirapiha, nyuwo khamunkhala mpattaaka.”

⁹Simeyoni Pedru aamwaakhula: “Vano Apwiya, khasihiyono paahi inaawosaka, menetho matataaka nitho muruwaaka.”

¹⁰Yeesu aamwaakhula: “Yoowo orampe, ontthuneya paahi orapiha inaawo. Erutthwaawe yootheene yooreera. Nyuwo muri oorapeene khamuhiyonotho ootheene.

¹¹Vano, Owo aasuwela nnenesene taani eera amvarihe ni tivawo eenraawe weera khaahiyono ootheene arampe.

¹²Amalihaka orapiha inaawosaya, Yeesu aawara mukaandyowaawe ni aahokoleela vanipuroniwawe. Vano aahaakoha: “Nyuwo mohiiwexexa yeeyo Miyo koopakenlaakani?

¹³Nyuwo munkiitthana ‘Muhusiha’ ni ‘Apwiya’ ni vekhaikhai ti Yoomi.

¹⁴Vano, Miyo kireene Apwiyaanyu ni Muhusihaanyu kohoorapihani inaawosanyu, ontthuneya weera nyuwotho murapihaneke inaawosanyu.

¹⁵Miyo koowooniheraani ethoonyero weera mupake ntoko Miyo koopakenlaakani.

¹⁶Miyo kinooleelani vekhaikhai weera kheewowo epottha enaapwaha Apwiyaaya ntokotho khaawo namutthenga onimpwaha yoole omurumihale.

¹⁷Hapo nyuwo moosuwela itthu iya, mmwireelihiwe mwapaka seiya.

¹⁸Nkinoohimani nyuwo ootheene. Kohaasuwela yaawo kaathanlalaaka. Yeeyotho eneereiya weera ekwaniheriwe Yoolempwa*: ‘Yoole onca epaawaaka, ookivaha munyeethaawe.’

¹⁹Kinooleelani ehinaaye weereiya weera, yeereiya, nyuwo muroromele weera Miyo ti Yoowo.

²⁰Miyo kinoororomelihani: yoowo ommwaakhela yoole Miyo kinimurumihaaka, anaakaakhele Miyo, ni yoowo onkaakhela Miyo, ongwaakhela Yaawo akiruminghe.

²¹Uulumaka hiiho, Yeesu aathananaxa mmunepani ni aahima: “Kinooleelani weera vekhaikhai mmoha a nyuwo anaakivarihe.”

²²Oohuseraawe yaawehana ehimusuwelaka taani Owo aamuhimaawe.

²³Mmoha a yaawo, oohusera Yeesu aamusivelaawe, eera akilaantheene mukhwipimwawe.

²⁴Simeyoni Pedru aamwiinihera muru yoowo weera amukohe Yeesu mulopwana heeni Owo aamuhimaawe.

²⁵Amususeerelaka Yeesu, aamukoha: “Apwiya, taani?”

²⁶Yeesu aamwaakhula: “Yoole kineeraaka kimvahe epaawu ela yoomeyanyiwa eruweiweene musasaanini.” Vano, aruweyaka epaawu, aamvaha Yudasi Iskariyoti, mwaana a Simeyoni.

²⁷Acaakaru Yudasi epaawu, Satana aavolowa mmurimanimwawe. Vanonto Yeesu aamweerela: “Etthu muntthunaanyu opaka, mpake woowaakuveya.”

²⁸Khaawotho vameesa yiiwexenxe heeni Yeesu amweerenlaawe hiiho.

²⁹Woonaka weera Yudasi aari namalipelela a musurukhu, akina yuupuwela weera Yeesu aamweerela athume yeeyo entthuneya ofestani, hoye hoye aavahe etthu oohaawa.

³⁰Yudasi aahooca epaawu ni aavenya. Vano waari ohiyu.

³¹Avenyakaru, Yeesu aaweerela: “Vano Mwaana a mutthu oovuwihiwa, ni Muluku oovuwihiwa mwa Yoowo.

³²Muluku avuwihiwa mwa Yoowo, Mulukutho anaamvuwihe Mwaana muneenaawe ni anaamvuwihe woowaakuveya.

³³Axinamwanaaka, kinookhala nlelo ehuhu vakhaani paahi ni nyuwo. Nyuwo mmwikaasaase ni ntoko kaaleenlaaka aYuda, Miyo kinooleelani nyuwotho: weiwo kinrowaakawo, khamungwera orowawo.

³⁴Kinoovahani nlamulo nnyowani: weera musivelaneke. Ntoko Miyo koosivelaakani nyuwo, ontthuneya weera mooteene yoowo nyuwotho musivelaneke.

³⁵Hiiho ootheene eniisuwele weera nyuwo muri oohuseraaka: nyuwo mwasivelana mukina ni mukhwaawe.”

³⁶Simeyoni Pedru aamukoha: “Apwiya, munrowa woowi?” Yeesu aamwaakhula: “Weiwo kineeraaka kirowe, nyuwo khamungwera okitthara vaanaano va, mene mmwikitthare vahoolo.”

³⁷Pedru aamukoha: “Apwiya, heeni miyo kihingweraaka woottharani Nyuwo vaanaano vaava? Kinimoovahererani okumaaka!”

³⁸Vano Yeesu aamwaakhula: “Nyuwo mmwikivaherere okumaanyu? Kinoororomelihani weera, ohinaaye wiipa muthupi, mmwikirune imaara tthaaru!”