Read Makhuwa-Shirima Yohaane 16 Bible Online

Yohaane 16 - Makhuwa-Shirima bible

Yohaane 16

¹Kinooleelani sootheene iya weera nyuwo muhikwattuliwe.

²Nyuwo mmoomoliwe muSinagogani*. Vekhaikhai, eniiphiye ehuhu yaawo eneera ewiiveeni, eniyuupuwele weera animurumeela Muluku epakaka yeeyo.

³Eniipake itthu iyo niwoko khayaasuwenle Atiithi, hata Miyo.

⁴Kinooleelani yeeyo weera, yaphiya ehuhu, muupuwelele yeeyo Miyo kooleenlaakani. Nkooleenleni yeeyo ompacereroni niwoko kaari ni nyuwo.

⁵Vano, kinrowaaka wa Yaale akiruminghe, khaawo mmoha a nyuwo onkikoha: ‘Munkela woowi?’

⁶Niwoko kuulumale itthu iya, mirimasanyu soosareya othanana.

⁷Vano Miyo kinooleelani ekhaikhai weera ti wa mpuhaanyu Miyo kinrowaaka. Miyo kaahirowa, Namalaka kharwa ooweelani. Vano Miyo karowa, nkoorumiheleni Namalaka.

⁸Owo aarwaaka, anaaviriyele elapo ya vathi mwaha wa soottheka, moota woowaakhuleliwa ni Muluku ni wa nthorihelo.

⁹Wa soottheka niwoko atthu khaankiroromela Miyo;

¹⁰wa moota woowaakhuleliwa ni Muluku niwoko Miyo kinrowa wa Atiithi ni nyuwo khamurwa mukoonatho;

¹¹ni wa nthorihelo niwoko mutokweene a elapo ya vathi ela oothorihiwa.

¹²Kookhalano sincipale sowooleelani, mene vaanaano vaava khamungwera ovilela seiyo.

¹³Vano, waarwaaka Munepa wa ekhaikhai, Owo onuuweettiheni mweekhaikhaiyini yootheene. Khoorwa wuuluma yawayaru, oniwuulume paahi yeeyo oneeraaya wiiwe ni oniwoolaleereni seiyo sineera sirwe.

¹⁴Owo onuukivuwihe niwoko oniwaakhele yeeyo eri yawaka ni oniwoosuweliheni yeeyo.

¹⁵Sootheene siri sa Atiithi, siritho sawaka. Tivawo keenraaka weera Munepa oniwaakhele yeeyo eri yawaka ni oniwoosuweliheni.

¹⁶Ehuhu vakhaani ni khamurwa mukoona, ni vahoolotho vakhaani mmwikoonetho.”

¹⁷Akina a oohuseraawe yaaheerelana: “Eheeni yeeyo Owo oneeraawe: ‘Ehuhu vakhaani ni khamurwa mukoona’ ni ‘vahoolowaya vakhaani mmwiikoonetho’ ni ‘niwoko kinrowaaka wa Atiithi?’”

¹⁸Vano yannakohana: “Eheeni yeeyo oneeraawe: ‘vahoolowaya vakhaani’? Khanniiwexexa yeeyo Owo onghimaawe.”

¹⁹Yeesu aasuwela weera yaahaawela omukohakoha mwaha wa yeeyo. Vano aaweerela: “Nyuwo munkohana mukina ni mukhwaawe yeeyo kaatthunaaka ohima kuulumaka: ‘Ehuhu vakhaani ni khamurwa mukoona, ni vahoolowaya vakhaani mmwikoonetho?’

²⁰Kinooleelani vekhaikhai weera nyuwo mmwiinle ni mmwilalamike elapo ya vathitho eniihakalale. Nyuwo mmwithanane, mene othananawanyu onuutatuxiwe ohakalala.

²¹Muthiyana aayaraka, onimoona ovoreiya niwoko ehuhuwaawe yoophiya, mene mwanawe ayariwa, owo onoottiwala ohaawa niwoko na ohakalala wa oyariwa mwaana mweelaponi ya vathi.

²²Enkhumelela hiihotho ni nyuwo: vano eri ehuhu yoothanana wa nyuwo, mene Miyo nkiwooneeni emaara ekina, ni nyuwo mmwihakalale ni khaawo aneera avenxe ohakalala iwo.

²³Nihuku nenenenno, nyuwo khamurwa mukikohatho naari etthu. Miyo kinoororomelihani weera Atithaka eniyoovaheeni sootheene muneeraanyu muvekele mwa Nsinanaka.

²⁴Mpaka vano nlelo khamunaaye ovekela etthu mwa Nsinanaka. Muvekele ni mmwaakhele weera ohakalalawanyu okhale wookwanela.

²⁵Kiri mweeraru kuulumaleene ni maphwanaphwaniho, enimoowa ehuhu Miyo kineeraaka kihuulume mooteene yoowo, mene nkuulume nnenesene mwaha wa Atithaka.

²⁶Nihuku nenenenno nyuwo mmwaavekele Atiithi mwa Nsinanaka. Nkinghima weera Miyo nkaavekele Atiithi mwaha wa nyuwo,

²⁷niwoko Atiithi aneenaaya animoosivelani, mweenre nyuwo mukisivelaka ni muroromela weera Miyo kirweenle wa Muluku.

²⁸Miyo kaarwiiye wa Atiithi, kinavolowa elapo ya vathi; vano kinoohiya elapo ya vathi ni kinoohokoleela wa Atiithi.”

²⁹Oohuseraawe yaamweerela: “Vano munuuluma nnenesene, ohikhanle ni maphwanaphwaniho.

³⁰Vano ninoowera woona weera moosuwela itthu soothesene ni khoontthuneya weera nookohakoheni etthu. Tivawo ninroromelaahu weera Nyuwo murwiiye wa Muluku.”

³¹Yeesu aawaakhula: “Vano nyuwo munoororomela?

³²Enkhuveela ehuhu, aani yoophiya, nyuwo muneeraanyu mmwaramwareiye khula mutthu wa owannyawe. Nyuwo mmwikihiye meekhaaka. Wa soothesene, Miyo nkikhanle meekhaaka niwoko Atithaka ari ni Miyo.

³³Miyo kooleenleni itthu iya weera mukhalane murettele mwa Miyo. Mweelaponimu mmwikhaleno soohooxa, wa soothesene, mulipihere murima. Miyo koowina elapo ya vathi.”