Read Makhuwa-Shirima Yohaane 17 Bible Online

Yohaane 17 - Makhuwa-Shirima bible

Yohaane 17

¹Ahimaka yeeyo, Yeesu aaweha osulu ni aavekela: “Tiithi, ehuhu yoophiya. Mumvuwihe Mwaninyu weera Mwaninyu oovuwiheni.

²Vano mwaamvaha Mwaana ikuru soolamula omutthu wootheene weera aavahe okumi woohimala ootheene Nyuwo mumvanghaanyu.

³Okumi woohimala ti ola: weera awo yoosuweleni Nyuwo, Muluku mmoharu a ekhaikhai, ni emusuwele Yeesu Kristu mwaamurumihalaanyu.

⁴Miyo kihoovuwihani mweelaponi ya vathi, kikwaniheraka muteko mwaakivanghaanyu opaka.

⁵Vano Atiithi, mukivuwihe vamoha ni Nyuwo ni ovuwa iwe kaaraakano khalayi ni Nyuwo ehinaaye okhala elapo ya vathi.

⁶Miyo kohaathupululela Nsinananyu yaale mukivanghaanyu mweelaponi ya vathi. Awo yaari awinyu ni mookivaha ni awo yaahiiwelela maswaanyu.

⁷Vano awo ansuwela weera sootheene mukivanghaanyu singwa wa Nyuwo.

⁸Miyo kohaaleela masu mukivanghaanyu ni awo ahaakhulela. Mwa yeeyo awo ansuwela vekhaikhai weera Miyo kirwiiye wa Nyuwo, ni yaaroromela weera mwaakiruma.

⁹Miyo kinnadyoonttelela wa yaawo. Nkindyoonttelela wa amalapo, mene wa yaale mwaakivanghaanyu niwoko ti awinyu.

¹⁰Ootheene kiraakano ti awinyu, ni ootheene muraanyuno ti awaka. Miyo kimvuwihiwa mwaha wa yaawo.

¹¹Miyo nkirwa kikhalatho mweelaponi, mene awo nlelo ari mweelaponi ni, Miyo kinrowa wa Nyuwo. Tiithi Ootteela, ngwaakihe awo mwa Nsinananyu, Nsina nno mwaakivanghaanyu weera ekhale mmoha ntoko Hiyo nraahu mmoha.

¹²Kaaraaka ni yaawo, kaawaakiha ni kaahaalipelela mwa Nsina mwaakivanghaanyu. Khaawo mmoha a yaawo oriheiye, ahikhanle yoole mwaana a oriheya weera ekwaniheriwe Yoolempwa*.

¹³Vano kinrowa wa Nyuwo, mene kinghima itthu iya Miyo nlelo kireene mweelaponi weera awo ekhalane ohakalalawaka woowaatta.

¹⁴Kaahaavaha maswaanyu, ni amalapo yaahaathanya, niwoko awo khaahiyono a elapo ya vathi ntoko Miyo kihikhanlaakatho.

¹⁵Nkindyoonttelela weera mwaavenxe mweelaponi ya vathi, mene weera ngwaakihe wa namatakhala.

¹⁶Awo khaahiyono a mweelaponi ntoko Miyo kihikhanlaakatho.

¹⁷Mwaatteelihe mwa ekhaikhai; maswaanyu ti ekhaikhai.

¹⁸Ntoko mwaakiruminghaanyu mweelaponi, hiihotho Miyo kohaarumiha mweelaponi.

¹⁹Miyo kinimwiitteeliha niwoko na yaawo, weera awotho ekhale ootteelihiwa mwa ekhaikhai.

²⁰Nivekelonaka khanihiyono paahi wa yaawo. Kindyoonttelelatho wa yaale eniikiroromele niwoko na mutthengaaya

²¹weera ootheene ekhale mmoha, Tiithi, ntoko Nyuwo muraanyu mwa Miyo ni Miyo mwa Nyuwo, ni weera awo ekhaletho mwa Hiyo. Hiiho amalapo eniiroromele weera Nyuwo mwaakirumiha.

²²Kohaavaha ovuwa mwaakivanghaanyu weera awo ekhale mmoha ntoko Hiyo nraahu mmoha:

²³Miyo mwa yaawo ni Nyuwo mwa Miyo. Kimvekela weera omoharuwaaya okhale wookwanela weera amalapo esuwele weera Nyuwo mwaakirumiha ni mwaahaasivela, hiiho ntoko mwaakisivenlaanyu.

²⁴Tiithi, kintthuna weera awo mwaakivanghaanyu ekhale vamoha ni Miyo weiwo kiraakawo, ni weera yoone ovuwawaka, ovuwa mwaakivanghaanyu, niwoko mwaakisivela ehinaaye ephattuwelo ya elapo ya vathi.

²⁵Tiithi oororomeleya, orookhalaru weera amalapo khayoosuwenleni, Miyo kohoosuwelani, ni yaawo ari awaka aansuwela weera mwaakirumiha.

²⁶Miyo kohaasuweliha Nsinananyu, ni nkipwaherere opaka yeeyo weera osivelawene weiwo mwaakisivenlaanyu, okhale mwa yaawo ni Miyotho kikhale mwa yaawo.”